1-2. Ni mibere yahi eyo abandu ba Yehova bangyi balimo, kandi bangana hambwako bathi?

THALEBYA ebindu bisathu bino: Mughalha wethu iniabanikamo obulhwere obukalire. Mughalha wethu oyuwithe emyaka nga 50 oyukakolha kutsibu iniabingwa okwa mubiiri, inialengaho erisondya owundi aliwe iniabulha. Mwali wethu omukekulhu omuthaleghulha iniabya isyanga thoka erikolha bingyi omwa mubiiri wa Yehova.

² Wamabya iwuwithe ebitsibu ebiri ng’ebiri ahighulhu aha, iwangana yowa nga siwukiwithe mughaso. Ebitsibu ebyo ibyangana leka iwabulha etseme, iwayowa mo wabbule, ibyahamba n’okwa ngolongana yawu n’abandi.

3. Sitani n’abandu biwe bakalhangira bathi engebe?

³ Amalengekania agho kihugho kiwithe oko ngebe ni wa Sitani. Sitani akathwalha abandu ng’abathawithe mughaso. Mwabwira Eva athi amathendiowa Nyamuhanga iniakendibya bwiranda, nomwakine indi abya inianasi ku mukendi lhwiririra olhuholho. Sitani anemusondolha eby’ekisubure, eby’ekipolitiki, n’eby’edini eby’ekihugho kino. Sikiriswekaya ab’ekisubure, abanya politiki, n’abakulhu b’amadini bangyi eribya n’amalengekania wa Sitani aw’erithendi sikya engebe y’abandu n’eriyowa lyabu.

4. Omo mwatsi ono thukendi kania okuki?

⁴ Erithend’ibya nga Sitani, Yehova iyo anzire ithwaminya ku thuli b’obughuli, kandi akathuwathikaya omughulhu thuli  omwa mibere eyangaleka ithwayowa nga sithuwithe mughaso. (Esy. 136:23; Abar. 12:3) Omwatsi ono akendi kangania Yehova nga akathuwathikaya athi omwa mibere eno: (1) Omughulhu thulhwere, (2) omughulhu thuli omwa bunakwa, na (3) omughulhu erikulha omo myaka likaleka ithwayowa nga sithuwithe ekya thwanga kolera Yehova. Thutsuke eriminya ekikaleka obuli mughuma w’okw’ithwe iniayikethera ngoku ni w’obughuli embere sya Yehova.

5. Ni kyahi ekikaleka iwaligha ngoku abandu ni b’obughuli embere sya Yehova?

⁵ Nomwakine indi thukolirwe omo lhuthuthu lhw’ekithaka, thuli b’obughuli kwilhaba omuthaka. (Enz. 2:7) Thulebaye esyonzumwa ndebe esikaleka ithwaminya ku thuli b’obughuli embere sya Yehova. Mwahangika abandu n’amaaka w’erigherererya emibere yiwe. (Enz. 1:27) Erikolha ekyo, mwathuhangika eribya ithulengire ebihangikwa byosi, n’erithuha ehamuli y’eritheya ekihugho n’ebisoro.​—Esy. 8:4-8.

6. Ni bindi byahi ebikaleka ithwaligha ngoku Yehova akalhangira abandu abathahikene mwa b’obughuli?

⁶ Nibya n’enyuma wa Adamu erisobya, Yehova mwalholha embere erilhangira abandu mo b’obughuli. Kundi akathulhangira mo b’obughuli bunene kutsibu, mwahayo Mughalha wiwe mwanze, Yesu, ng’endongolya busana n’ebibi byethu. (1 Yn. 4:9, 10) Eryanza thughasirawe omo ndongolya, Yehova akendi syalhubukya ababiriholha busana n’ekibi kya Adamu, “abathunganene n’ababi.” (Emib. 24:15) Ekinywe kiwe kikakanganaya ngoku thuli b’obughuli nomuthwangabya ithulhwere, ithuli banakwa, kutse ithukekelhuhire.​—Emib. 10:34, 35.

7. Ni sindi nzumwa syahi esikaleka abaghombe ba Nyamuhanga ibaligha ngoku Yehova akabalhangira mo b’obughuli?

⁷ Hane esindi nzumwa esikaleka ithwaligha ngoku Yehova akathulhangira mo b’omughaso. Abirithuletha okwa lhuhandi lhwiwe kandi analhangire ko muthwatsemera engulhu yuwene. (Yn. 6:44) Thwabere thukatsuka eriyithunda hakuhi na Yehova, nayu mwa yithunda hakuhi nethu. (Yak. 4:8) Yehova kandi akakolesaya obuthuku n’akaghalha erithukangirirya, erikangania ku thuli b’obughuli embere siwe. Anasi nga thuli thuthi kandi anasi nga thwang’uwana thuthi. Kandi akathukunga kundi athwanzire. (Emi. 3:11, 12) Ebi bikakanganaya ngoku Yehova akathulhangira mo b’obughuli!

8. Ebiri omu Esyonyimbo 18:27-29 byangahamba bithi okwa mibere thukalhangira mw’ebitsibu byethu?

⁸ Abandi ibakalhangira Omwami Dawudi mwa muthya-muthya, aliwe abya inianasi ngoku Yehova amwanzire kandi ku akamuwathikaya. Ekyo mukyaleka iniathunga amalengekania awatholere okwa mibere eyo abyamo. (2 Sam. 16:5-7) Thwamabana ebitsibu, Yehova angana thuwathikya eribya n’amalengekania awatholere n’erithuwathikya erisingura ekitsibu kyosi-kyosi. (Soma Esyonyimbo 18:27-29.) Thwamabya ithunawithe obuwathikya bwa Yehova, sihali ekyanga thulemesya erimukolera ithunatsemire. (Abar. 8:31) Thulebaye emibere isathu eyo, kutsibu-kutsibu eyikayithagha ithwe eribya ithun’ibukire ngoku Yehova athwanzire kandi ku akathulhangira mwa b’obughuli.

9. Obulhwere bwangana leka ithwayithunga kw’amalengekaniaki?

⁹ Obulhwere bwangana thuhambako nabi, ithwayowa nga sithukiwithe mughaso. Thwangana yowa nabi abandi bakaminya obulhwere  bwethu kutse thukabya ithukayithagha okwa bandi kw’obuwathikya. Nibya n’omughulhu abandi bathasi ku thulhwere, thwanganabya ithunemuyowa nabi busana n’eribya isithukikolha bingyi. Okwa mighulhu eyikalire ng’eyo, Yehova akathuhumulikanaya. Athi?

10. Erikwamana na Emisyo 12:25, ni kyahi ekyanga thuwathikya omughulhu thulhwere?

¹⁰ Omughulhu thulhwere, “ekinywe kibuya” kyangana thuhumulikania. (Soma Emisyo 12:25.) Omwa Biblia, Yehova abirithuhiriramo ebinywe ebyuwene ebikathwibukaya ngoku thuli b’obughuli embere siwe nomuthwangabya ithulhwere. (Esy. 31:19; 41:3) Thwamabisoma ngendo nyingyi, Yehova iniakendi thuwathikya erirwanisya eriyowa erithatholere erikasa busana n’obulhwere.

11. Mughalha wethu mughuma mwayilhangirira athi obuwathikya bwa Yehova?

¹¹ Thalebya eky’erileberyako kya Jorge. Iniane mulhume mulere, mwahambwa obulhwere obwa muthanda kyamaleka iniayowa nga syawithe mughaso. Akabugha athi: “Sinabya ngayitheghekere eriyowa erya obulhwere bwanyilethera kutse esisoni esya bandu eribya bakanyisamalira. Obulhwere bwabere bunemwongera, munalengekania ngoku engebe yaghe yikendi hinduka. Mukyanyitha obulighe, kandi munasaba Yehova y’obuwathikya.” Yehova mwamuwathikya athi? “Kundi isinanga thasyathoka erikolha ekindu habw’obuthuku buuli, iningasoma milhondo mike-mike omwa kitabu kye Esyonyimbo eyikakanganaya eritsomana lya Yehova. Iningasubirira omwa emilhondo mike eyo obuli kiro, iyanyihumulikania n’erinyisikya omuthima. Endambi muyahika, namatsuka erilhangirika kw’etseme. Abandu mubatsuka n’eribugha bathi amalengekania waghe akabahimba. Munalhangira ngoku Yehova abirisubirya emisabe yaghe! Mwanyiwathikya erihindulha amalengekania  agho ngabya ngayiwitheko. Munatsuka erilengekania okwa bya Kinywe kiwe kikabugha okwa malengekania agho anyiwitheko nomunganalhwere.”

12. Omughulhu wulhwere, wanga kolhaki eribana obuwathikya bwa Yehova?

¹² Wamabya iwulhwere, yikethere ngoku Yehova anasi ebya wunemulhabamo. Musabe akuwathikaye wubye n’amalengekania awatholere omwa mibere eya wulimo. Neryo sondaya omwa Biblia mw’emyatsi eyikahumulikanaya eya Yehova abirihiramo. Lengekanaya okwa milhondo eyikakanganaya ngoku Yehova akalhangira abaghombe biwe mwa b’obughuli. Wamakolha ekyo, iwukendi lhangira ngoku Yehova ni mubuya okwa bosi abakamukolera buthaleghulha.​—Esy. 84:11.

13. Omwimaniri w’eka eribya isyakiwithe mubiiri kyanga leka iniayowa athi?

¹³ Obuli mwimaniri w’eka akanza iniabana ebiyithawa by’eka yiwe. Aliwe ibbwa mughalha wethu amabingwa okwa mubiiri, isyawithe ekyakolire. Inialengaho erisondya owundi, aliwe ibyalema. Ebyo ibyangana leka iniayowa nga syawithe mughaso. Erilengekania okwa milhaghe ya Yehova kyanga muwathikya kithi?

14. Ni nzumwa syahi esikaleka Yehova iniaberererya emilhaghe yiwe?

¹⁴ Mughulhu wosi Yehova akaberereraya emilhaghe yiwe. (Yos. 21:45; 23:14) Akakolha ekyo habw’esyonzumwa nyingyi. Kundi kikahamba okwa lina liwe libuya. Yehova abiribugha athi akendi tsomana abaghombe biwe abathaleghulha, kandi akayowa iniatholere eriberererya eriyilhagha eryo. (Esy. 31:1-3) N’ekindi, Yehova anasi ngoku ithukendi yowa nabi kutsibu amathendi tsomana ab’omw’ihiika liwe. Akayilhagha erithuha eby’ekimubiri n’eby’obunyakirimu, kandi sihali ekyanga  mukakirya eriberererya eriyilhagha eryo!​—Mt. 6:30-33; 24:45.

15. (a) Ni kitsibu kyahi ekya Bakristayo ab’omwa kighonye ky’erimbere babana? (b) Ni yikethera lyahi eriri omu Esyonyimbo 37:18, 19?

¹⁵ Thukabya thuk’ibuka ekikaleka Yehova iniaberererya emilhaghe yiwe, kyangana leka ithwaghumira ekitsibu ky’obunakwa ithunasikire. Thulebaye eky’erileberyako ky’Abakristayo ab’omwa kighonye ky’erimbere. Habere hakabya eriendereribwa omwa kithunga e Yerusalemu, “abandu bosi b’ekanisa mubapanzikanira omo bihugho . . . abakwenda bathe kubo.” (Emib. 8:1) Thalengekania okwa kyanga lhwiririremu. Obunakwa bunene! Abakristayo mubasighania amanyumba wabu n’esyosuburo syabu. Nomwabine, Yehova mwathabasighania; mubabya ibanatsemire. (Emib. 8:4; Ebr. 13:5, 6; Yak. 1:2, 3) Yehova mwawathikya Abakristayo abathaleghulha abo, nethu akendi thuwathikya.​—Soma Esyonyimbo 37:18, 19.

16. Ni mibere yahi eyanga leka ithwayowa Yehova nga syakilhangire eriramya lyethu mwa ly’omughaso?

¹⁶ Thukabya thukakulha, thwangana tsuka eriyowa nga sithwanga thasyakolera Yehova ya bingyi. Omwami Dawudi angabya imwayowa athya anemukulha omo myaka. (Esy. 71:9) Yehova angathuwathikya athi?

17. Eky’erileberyako kya mwali wethu Jheri kikathweghesayaki?

¹⁷ Thulebaye eky’erileberyako kya mwali wethu ya Jheri. Mwakokibwa eribya omwa muhindano w’erithendekwa erisugha Ekisenge ky’Obwami, aliwe mwathanza erighenda. Mwabugha athi: “Ngali mukekulhu, ngali mukwakali, kandi singawithe ekyo ngasi ekyo Yehova angakolesya omwa mubiiri oyu. Singwithe mughaso.” Omwa malhaliyo w’erithendekwa eryo, mwabwira Yehova ebyosi  ebiri okwa muthima. Engyakya abere ahika okwa Kisenge ky’Obwami, abya iniakinayibulha ng’anatholere eribyaho. Omwa muhindano oyo, omughuma w’okwa syombuyi mwakangania athi ekikulhu ekikayithaghisibawa w’omuthima ow’eriligha erikangiriribwa na Yehova. Jheri akabugha athi: “Munayibwira nyithi ‘Ekyo nga nakiwithe!’ Munatsuka erilira ingaminya ngoku Yehova ali ku subirya omusabe waghe. Abya iniali ku nyikakasya ngoku nganawithe ekindu ky’omughaso eky’erimuha kandi ngoku anayitheghekire erinyikangirirya!” Jheri akabya akasubya emeso w’enyuma akabugha athi: “Munaghenda omwa muhindano oyo ingana kwire obuba, inganahwere amani, kandi ingana kwire engitsi. Aliwe munalhuamu inganasikire, erighuma, n’eriyowa mwa w’omughaso!”

18. E Biblia yikakanganaya yithi ngoku Yehova akalholha embere erilhangira eriramya ly’oyuwabirikulha omwa myaka mwa ly’omughaso?

¹⁸ Thukendibya thune mukulha omwa myaka, ambi ithwayikethera ngoku Yehova akendibya inianemuthukolesya. (Esy. 92:12-15) Yesu mwathukangirirya athi amaaka wethu kutse akaghalha kethu nomubyangabya bike, Yehova akalhangira ebya thukamukolera mwa by’omughaso. (Lk. 21:2-4) Lengekanaya okwa bya wanga thoka. Ng’eky’erileberyako, iwangana kania na Yehova, iwahira balikyethu omwa misabe, n’erihira abandi mw’omuhwa w’erisighalha bathaleghulha. Yehova akakulhangira ng’omukoli mulikyabu, butsira busana n’ebya wukathoka aliwe kundi wanzire erimwowa.​—1 Kor. 3:5-9.

19. Ni kakasya lyahi eryathukabana omu Abanya Roma 8:38, 39?

¹⁹ Thukasima eriramya Yehova, Nyamuhanga oyukalhangira abakamukolera mo b’obughuli! Mwathuhangika ithuli b’erikolha erisonda liwe, kandi eriramya ly’okwenene ly’erikathulethera etseme. (Erib. 4:11) Ekihugho nomukyanga thulhangira nga bathawithe mughaso, Yehova kwathe thulhangira athya. (Ebr. 11:16, 38) Thwamayowa nabi busana n’obulhwere, obunakwa, kutse erikulha omwa myaka, thutholere ithwibuka ngoku sihali ekyanga thughabulha okwa lhwanzo lhwa Thatha wethu w’elhubulha.​—Soma Abanya Roma 8:38, 39.