MUGHULHU mungyi Yesu iniakakangiriraya ebihambire okw’isaba. Omwa buthuku bwiwe, abakulhu b’amadini Abayuda ibakasabira “omo syongonde sy’esyombalhu.” Busana naki? “Balholhaweko n’abandu.” Ahathe erithika-thika, babya bakanza basimawe busana n’omubiiri wabu w’edini. Abanene ibakasaba emisabe miri-miri, ibasubirira muyo, erilengekania bathi “ebinywe byabu bingyi” by’ebikendi leka ibowibwa. (Matayo 6:5-8) Yesu mwabugha athi emisabe ng’eyo ni nubira busa, neryo abya iniakawathikaya ab’emithima myolho eriminya ebyo batholere ibayihighulhako bakasaba. Aliwe mwathasubulira okw’ikangirirya lisa ebindu ebya thuthatholere erikolha thukasaba.

Yesu mwakangirirya athi emisabe yethu yitholere iyakangania eriyisunza lyethu ery’erilhangira thuthi erina lya Nyamuhanga likabya libuyirire, Obwami Bwiwe bwase, kandi erisonda Liwe likolhawe. Kandi Yesu mwakangirirya athi kitholere erisaba Nyamuhanga y’ebiyithawa byethu. (Matayo 6:9-13; Luka 11:2-4) Omw’ikolesya eby’erileberyako, Yesu mwakangania ngoku thukayithagha erihathikana, erikirirya, n’eriyikehya thwamabya thwanzire emisabe yethu yowibawe. (Luka 11:5-13; 18:1-14) Kandi mwaghumya erikangirirya liwe erilhabira omwa ky’erileberyako kiwe.​—Matayo 14:23; Mariko 1:35.

Ahathe erithika-thika, erikangiriribwa eri mulyawathikya abigha ba Yesu eryuwania emisabe yabu. Kandi nibya, Yesu mwalinda erihika okw’ithumbi liwe ly’erighunzerera hano okwa kihugho eriha abigha biwe b’erisomo likulhu erihambire okw’isaba.

Yesu mwakolesya endambi nene omw’ithumbi liwe ly’erighunzerera akahumulikania abakwenda biwe abathaleghulha. Yabya ndambi eyitholere ey’eribisulha omwatsi muhyaka. Yesu mwabugha athi, “Ingye indi nzira, ingye indi mwatsi w’ekwenene, ingye indi ngebe. Sihali mundu oyukahika oku Thatha waghe athe kwingye.” Enyuma waho, mwabaha omulhaghe owakahumulikanaya ono: “Nasyakolha obuli mwatsi ogho mwasyabulya omo lina lyaghe, Thatha apipawe omu Mughalha. Emyatsi yosi mukabulhaya omo lina lyaghe, nasyakolhayo.” Iniakisiya iniaghunza omukania wiwe, mwabugha athi: “Erihika lino, simwethabulyaki omo lina lyaghe; mubulhaye, neryo mwasyabanakyo, obutseme bwenyu buthoke erihikana.”​—Yoane 14:6, 13, 14; 16:24.

Ebinywe ebi byabya bikulhu kutsibu. Ekitabu kighuma kikakanaya okw’eki kithi eyi yabya “mbinduka nene eyihambire okw’isaba.” Yesu syamanyisaya athi thutholere ithwamusaba omwakanya k’erisaba Nyamuhanga. Aliwe, abya iniakakyungulha enzira mbyaka eyikakolhaya oku Yehova Nyamuhanga.

Ni kwenene, mughulhu wosi Nyamuhanga akowa emisabe y’abaghombe biwe abathaleghulha. (1 Samweli 1:9-19; Esyonyimbo 65:2) Aliwe, eritsuka omughulhu Nyamuhanga akolha endaghane y’Emighambo n’Abaisraeli, ababya banzire emisabe yabu yowibawe babya batholere eriminya ngoku e Israeli kyabya kihanda ekyo Nyamuhanga abiriyisogha. N’enyuma waho, eritsuka okwa buthuku bwa Solomona, babya b’eriminya ngoku ehekalu w’omwanya agho Nyamuhanga asombolha busana n’erihayo obuhere. (Eryibuka Ebihano 9:29; 2 Emyatsi y’Emigulu 6:32, 33) Nomwabine, emiramirye eyi yabya y’obuthuku buke. Ngoku omukwenda Paulo ahandika, Emighambo eyahebawa Abaisraeli n’obuhere obwabya bukahebwayo okwa hekalu kyabya “kitsutsu buyira ky’emyatsi yuwene eyikendi syahulhuka. Siyirisosa kwenene emyatsi eyo.” (Abaebrania 10:1, 2) Ekitsutsu kyabya ky’erihwaho. (Abanya Kolosai 2:17) Eritsuka 33 E.K., obughuma obw’omundu awithe na Nyamuhanga bwabya isi bwanga thasyaseghemera okw’ikwama Emighambo ya Musa. Omwakanya k’ekyo, bukaseghemera okwowa oyo Emighambo yakanayako​—Kristo Yesu.​—Yoane 15:14-16; Abanya Galatia 3:24, 25.

Yesu mwatsukisya enzira ngulhu ey’erihikira Yehova, eriyimiyikalya ng’omunywani w’amaaka, oyukakyungulha enzira nuku Nyamuhanga owe n’erisubirya emisabe yethu. Ni kyahi ekikathokesaya Yesu erikolha eki busana nethu?

Kundi ithwe bosi thubuthirwe omo kibi, sihali omubiiri kutse obuhere obwa thwangahayo obwanga thwerya kw’ekibi eki kutse ekyanga thuthokesya eribya n’obughuma na Nyamuhanga wethu oyubuyirire, Yehova. (Abanya Roma 3:20, 24; Abaebrania 1:3, 4) Aliwe, Yesu mwahayo engebe yiwe eyihikene n’erilihira ebibi by’abandu abanzire erisuba oku Nyamuhanga. (Abanya Roma 5:12, 18, 19) Neryo abanzire erikolha ekyo bawithe akaghisa k’eribya ibanahenirye embere sya Yehova n’eribya ‘n’obwiranda bw’erihika’ embere sya Nyamuhanga​—aliwe ibanaly’ikiriraya omo kihongo kya Yesu n’erisaba omo lina liwe.​—Abanya Efeso 3:11, 12.

Thukabya thukasaba omo lina lya Yesu, thukakanganaya erikirirya lyethu hakiri omwa bindu bisathu bino ebihambire okwa lhukwamirwa lhwiwe omwa kighendererwa kya Nyamuhanga: (1) Ni “Kyana ky’Embuli kya Nyamuhanga,” oyo ekihongo kiwe kikaleka ithwaghanyirwa ebibi. (2) Yehova mwamulhubukya kandi lino akakolha ‘ng’omuhereri mukulhu’ omw’ihira omwa mikolere emighaso y’endongolya. (3) Iyo musa ya “nzira” ey’erihika oku Yehova omwa musabe.​—Yoane 1:29; 14:6; Abaebrania 4:14, 15.

Erisaba omo lina lya Yesu kikamuha ekitsumbi. Ekitsumbi ekyo kitholere, kundi erisonda lya Yehova liri lithi “abosi basyakukamira erisikya erina lya Yesu . . . , obuli mundu asyathulhughania ko Yesu Kristo ni Mukama, busana n’eriha olhukengerwa oku Nyamuhanga Thatha.” (Abanya Filipi 2:10, 11) Aliwe ekikulhu kutsibu, erisaba omwa lina lya Yesu kikaha Yehova y’olhukengerwa, oyuwahayo Mughalha wiwe nuku thughasirawe.​—Yoane 3:16.

E Biblia yikakolesaya ebitsumbi muthina-muthina n’amena erimukaniako nuku thuyitheghereraye ndeke obukulhu bw’ekitsumbi kya Yesu. Ebi bikaleka ithwayitheghererya ndeke emighaso mingyi eyikasa busana n’ebya Yesu abirikolha, anemukolha, n’eby’akisiya iniakolha busana nethu. (Lebaya akasanduko “ Olhukwamirwa Lhukulhu Olhwa Yesu”.) Kwesi kwenene, Yesu abirihebwa “erina erilhabire awandi mena.” * Abirihebwa ehamuli yosi omo lhubulha n’okwa kihugho.​—Abanya Filipi 2:9; Matayo 28:18.

Ni kwenene, thutholere ithwasaba omo lina lya Yesu thwamabya thwanzire Yehova athowe. (Yoane 14:13, 14) Aliwe sithwanzire eribera erisubirira omwa binywe “omo lina lya Yesu” ng’erithaberererya mukoro. Busana naki?

Thulebaye eky’erileberyako. Omukulhu w’ekampuni amakuthumira ebaruha, yanganabya iyughunzerere n’ebinywe “ningye owenyu.” Mbwino wukalhangira ebi inina binywe ebikakanganaya eriyowa ly’omukulhu oyo, kutse akakwama ebilhaghiro by’erihandikiramo ebaruha? Neryo erikolesya erina lya Yesu omwa misabe yethu litholere iryabya irinawithe enzumwa mbuya butsira erikwama kyabya ng’omukulhu w’ekampuni oyukakwama kya berererya mukoro omw’ighunzerera ebaruha yiwe y’athya. Nomwakine indi thutholere ‘ithwasaba butsira eriumbya,’ thutholere ithwasaba n’omuthima wethu wosi, butsira erikwama kya berererya mukoro.​—1 Abanya Tesalonika 5:17; Esyonyimbo 119:145.

Wanga yihighulha wuthi okw’ibya n’omutse w’erikwama kya kolesya buyira ebinywe “omo lina lya Yesu”? Busana naki iwuthaghanirya okwa mibere mibuyanga ya Yesu? Lengekanaya okwa by’abirikolha n’ebyo anayitheghekire erikukolera. Omwa musabe, sima Yehova kandi mupipe busana n’enzira mbuya eyo abirikoleseryamo Mughalha wiwe. Wukendibya wunemukolha ekyo, wukendyongera eriyikethera omulhaghe wa Yesu ono: “Ekinduki mwangasaba Thatha, asyabahakyo omo lina lyaghe.”​—Yoane 16:23, NWT.