E Biblia Yikahindulha Esyongebe

NI KYAHI ekyaleka Omurasta iniaghemba esyonzwiri siwe nyiri-nyiri n’erisingura omubere w’erisolholha abasungu? Kandi ni kyahi ekyathokesaya omulhwana omulhwi oyuwabya akakolha esyosente omw’ighulya ebibatsi ebikathamiraya erihindulha engebe yiwe? Thulebaye ebya bakabugha.

“Munasingura n’Omubere Waghe w’Akasolholho.”​—HAFENI NGHAMA

OW’EMYAKA: 34

EWABU: ZAMBIA

EBY’ENYUMA: OMURASTA

ENGEBE YAGHE ENYUMA: Nabuthirawa omwa kampu y’abathibithi e Zambia. Mama waghe abya iniabirithibitha erilhua e Namibia omwa buthuku bw’olhuhi kandi abya iniabiryingira omwa kithongole ekikahulhawamo South West Africa People’s Organization (SWAPO). Ekithongole ekyo kyabya kikalhwa n’abasirikali be South Africa ababya bakathabalha e Namibia okwa buthuku obo.

Emyaka yaghe eyosi 15 ey’obulere, munaghunzayo omwa syokampu sy’abathibithi. Abalere ab’omwa kithongole kye SWAPO mubakangiriribwa erilhwira okwa bwiranda bw’ekihugho kyabu. Muthwakangiriribwa eby’ekipolitiki n’eripona abasungu.

Nabere ingahikya emyaka 11, munanza erithunga ekofurumasiyo kutse eritebwaho ng’Omukristayo omwa dini ey’abya omwa kampu eyabyamo Abakatuliki, Abalutherani, Abapira n’abandi. Omupasta oyo nakanaya nayu mwanyighunza amani w’erithwa ekiika eki. Eritsuka-tsukana n’aho munaleka erikirirya indi Nyamuhanga aneho. Aliwe nabere nahikya emyaka 15, ingye erianza kutsibu omuziki we regge n’erianza erighunzaho obuthe bulingirirania bulebe obo Abaafrika abiraghulhu babya bakalhabamu mubyaleka ingayiyunga okwa gurupu y’Abarasta. Munakothya n’erilhuka esyonzwiri, erirya amarijuana, erileka erirya enyama, n’erilhwira obughabe bw’abiraghulhu. Nomwabine mundahindulha emibere yaghe y’obutswatswa kutse erileka erilebya esyovidiyo esy’amalhwa. Kandi munalholha embere erikolesya ebinywe by’ebitsumi.

NGOKU E BIBLIA YAHINDULHA ENGEBE YAGHE: Omwa 1995, ingakisiya inahikya myaka 20, munatsuka erilengekania kutsibu okwa ebya nganzire erikolha omwa ngebe yaghe. Iningasoma ebitabu byosi by’Abarasta ebyo nabya ingabana. Ebighuma by’okw’ibyo ibikakanaya okwa biri omwa Biblia, aliwe erisoborera eryo okw’ingye isiririyitheghereribawa. Neryo munathwamu eriyisomera e Biblia.

Enyuma waho, omunywani Omurasta mwanyiha ekitabu kye Biblia eky’erigha ekyahulhukibawa n’Abema ba Yehova. Munayisomera ekitabu eki ahabwaghe ingane mukolesya e Biblia. Enyuma waho, munabana Abema ba Yehova n’erilholha embere erigha nabu e Biblia.

Munalengaho kutsibu erileka erinywa ethaba n’erinywa bunene. (2 Abanya Korinto 7:1) Mun’uwania emisosere yaghe, namaghemba esyonzwiri syaghe, namaleka eribya ingalebya eponografe n’esyovidiyo sy’amalhwa, n’erileka erikolesya ebinywe by’ebitsumi. (Abanya Efeso 5:3, 4) Erighunzerera, munaleka n’omutse waghe w’erisolholha abasungu. (Emibiri 10:34, 35) Erikolha esyombinduka esi mwabya erileka omuziki ow’akakulha-kulhanaya akasolholho k’erangyi n’erileka abanywani baghe abakera, abangalekire ingasubira emibere yaghe eyakera.

Nabere nabirikolha esyombinduka esyo, munasondya ahali Ekisenge ky’Obwami eky’Abema ba Yehova n’eribulya nganangana yiyunga okwa dini eyo. Mubatsuka erigha naghe e Biblia. Nabere ingathwamu eribatizibwa ng’Omwema wa Yehova, ab’efamile yethu mubathatsema. Mama waghe mwanyibwira athi ngasombole eyindi dini yosi-yosi “y’Ekikristayo” butsira Abema ba Yehova. Omughuma w’okwa banyokolhome baghe oyuwabya awithe ekitsumbi kinene omwa gavumente, iniakabera erinyisekererya busana n’erithwamu lyaghe ly’eribya mughuma w’okwa Bema.

Aliwe, erigha okwa mibere Yesu aby’akakolonganiramu n’abandu n’erighendera okw’ihabulha liwe mukyangwathikya erighumira erihakanisibwa n’akasekereryo. Iningabya ingalinganisya ebya Abema bakakangiriraya n’ebya Biblia yikabugha, munaligha ngoku nabiribana edini y’okwenene. Ng’eky’erileberyako, bakaghendera okwa kihano kye Biblia eky’erithulira abandi. (Matayo 28:19, 20; Emibiri 15:14) Kandi sibaliyingiraya omwa by’ekipolitiki.—Esyonyimbo 146:3, 4; Yoane 15:17, 18.

NGOKU NABIRIGHASIRWA: Erigha erighendera okwa bihano bye Biblia kyabiringwathikya omwa nzira nyingyi. Ng’eky’erileberyako, erileka erirya amarijuana kyabirinyitheya okw’itsandya esyongumi sy’esyodola obuli kwezi. Singakilhotha ebilhotho ebithuwene, kandi amaghalha waghe abiryuwana omwa bulengekania na kinyamubiri.

Lino engebe yaghe yiwithe eyo yikalholha n’ekighendererwa ebyo nabya ingakandira kutsibu eritsuka bulere. Kandi ekikulhu kutsibu, lino ngayowa inabirithoka eriyithunda hakuhi na Nyamuhanga.—Yakobo 4:8.

“Nabir’igha erikakirya ekinigha kyaghe.”​—MARTINO PEDRETTI

OW’EMYAKA: 43

EWABU: AUSTRALIA

EBY’ENYUMA: OYUKAGHULHAYA EBIBATSI EBIKATHAMIRAYA

ENGEBE YAGHE ENYUMA: Eka yethu iyikahuma-huma ingakine mulere. Muthw’ikalha omwa hitawuni hike-hike, esyotawuni nene-nene, n’okwa bundi buthuku omwa malima eyiri abanya Australia abahambirire ekalikya. Ni bibuya bingyi ebya ng’ibuka omughulhu nabya n’abaana b’abanyoko-lhome n’abanyoko-lhome waghe—thukasoha, erihigha, erikolha esyo boomerangs, n’erikokothya ebindi bindu.

Thatha waghe abya mubboksa kandi mwatsuka erinyikangirirya amalhwa ingakine mulere kutsibu. Munanza eby’amalhwa omwa ngebe yaghe yosi. Omwa bulengwa, iningaghunza buthuku bunene inganywira omwa syobbara. Ingye na banywani baghe ithukapuma abandu nuku thulhwe. Ithukakolesaya emihamba n’ehithi hy’erisathamu ebbesibbolo erilhwa n’egurupu y’abandu nga 20 kutse banene okw’aho.

Munakolha esyosente omw’ighulya ebibatsi ebikathamiraya n’ebindu ebya abakakolera okwa mathu babya bak’iba. Kandi iningabana esyosente okw’abakaghulhaya ebibatsi ebikathamiraya kandi iningab’ubahisaya omw’ikolesya esyombundu n’esyopisto. Nabya ngawithe ekilhubirirwa eky’eribya mwithi. Emoto yaghe ini, Itha kutse ithawa.

NGOKU E BIBLIA YAHINDULHA ENGEBE YAGHE: N’owa okwa Bema ba Yehova ingakine mulere. Nabere ingahika omwa myaka yaghe eya 20, ng’ibuka ingabulya mama waghe ng’anasi Omwema wosi-wosi. Enyuma w’ebiro bibiri, Omwema oyukahulhawamo Dixon mwakongotha okwa lhuyi lhwaghe. Enyuma w’erikanirania nayu ahabw’obuthuku, mwanyikokya okwa mihindano y’Abema ba Yehova. Munaghenda okwa mihindano kandi namabirighunza emyaka eyilhabire oku 20 inganemuhindana erihika na lino. Obuli kibulyo ekyo nabya ingwithe, Abema mubathoka erinyisubirya omw’ikolesya e Biblia.

Munatsema eriminya ngoko Yehova atsomene obuli mundu, nibya n’ababi. (2 Petero 3:9) Munaminya ngoku ni Thatha w’olhwanzo oyuwanga nyitsomana, nibya n’omughulhu sihali oyuwanga kolha ekyo. Kandi munahumulikana ingaminya ngoku angana ghanyira ebibi byaghe namahindulha emibere yaghe. Emilhondo ye Biblia eyiri omwa Abanya Efeso 4:22-24 muyanyihambako kutsibu. Emilhondo eyo muyanyihira mw’omuhwa ‘w’erileka emibere ya kera n’eribya muhya-muhya oyuwahangikawa omo kisosekanio kya Nyamuhanga.’

Mukyanyithwalira buthuku erihindulha engebe yaghe. Ininganaghunza ewiki isindi nathanywa ebibatsi ebikathamiraya, aliwe okwa wikendi, omughulhu ngali n’abanywani baghe, ingalemwa. Munaminya ngoku ngatholere ingayihighulha okwa banywani baghe namabya w’eryuwania engebe yaghe, neryo munathwamu erihumira omwa kindi kihugho. Abandi banywani baghe mubathwamu erinyitsindika omwa lhughendo lhwaghe, kandi munaligha. Omwa lhughendo olho, mubatsuka erirya amarijuana n’erinyiha. Munababwira indi nabirileka emitse eyo, neryo munathwa obunywani namalholha embere n’olhughendo lhwaghe. Enyuma waho munaminya ngoku banywani baghe babir’iba ebbank, omw’ikolesya embundu.

NGOKU NABIRIGHASIRWA: Nabere nabiriyihighulha okwa banywani abo, mukyanyolhobera erikolha esyombinduka esikayithaghisibawa omwa ngebe. Omwa 1989, munabya Mwema oyubatizibirwe. Nabere nabiribatizibwa, mwali wethu , mama waghe, na thatha waghe abosi mubanyiyiyungako omw’ikolera Yehova.

Lino namabirighunza emyaka 17 inganathahirye kandi ngawithe abaana baghe basathu abanzwa. Nabirigha erikakirya ekinigha kyaghe, nibya n’omughulhu ngapumawa. Kandi nabirigha erianza abandu erilhua ‘omwa bihanda, byosi, erangyi, n’omubughe.’ (Eribisulirwa 7:9) Ngayowa ebinywe bya Yesu ibyabirinyiberererako. Mwabugha athi: “Mwamabya mukakwama ebinywe byaghe, imuli bigha baghe kwenene. Kandi mwasyaminya ekwenene, n’omwatsi w’ekwenene asyabaha obwiranda.”—Yoane 8:31, 32.

[Eblabbu]

Erikolha esyombinduka esi mwabya erileka omuziki ow’akakulha-kulhanaya akasolholho k’erangyi

[Eblabbu]

Ingye na banywani baghe ithukapuma abandu nuku thulhwe. Ithukakolesaya emihamba n’ehithi hy’erisathamu ebbesibbolo erilhwa n’egurupu y’abandu nga 20 kutse banene okw’aho