ERITHIMBAomwa kihugho kyosi, omwa buli kalikya n’edini, abandu bakasaba. Bakasaba ibane ibobene; bakasaba ibane omwa syogurupu. Bakasabira omo syokanisa, omo hekalu, omo syosinagogi, omo mizigiti, omo myaliro. Bangana kolesya emikeka y’emisabe, esyosapuli, esyosanamu, ebitabu by’emisabe, kutse emisabe eyiri okwa hibbaho eyikahanikawa okwa bidongo.

Emisabe yikaleka abandu ibabya mbaghane okwa bindu bihangikwa byosi okwa kihugho kino. Ni kwenene, ni bingyi ebya thusosenemu n’ebisoro. Ng’ibyo, thukayithagha ebyalya, omuka, n’amaghetse. Ng’ibyo, thukabuthawa, ithwabyaho, n’eriholha. (Omugambuli 3:19) Aliwe abandu basa babakasaba. Busana naki?

Obundi eky’erisubirya ekyolhobire kiri kithi eki ni kiyithawa kyethu. Erithwalira haghuma, erisaba y’enzira ngulhu eyo abandu bakahikiramo omwa mwanya ogho bakalhangira nga abuyirire kandi ow’erikotha. E Biblia yikakanganaya ngoku muthwahangikwa ithune n’eriyisunza ng’eryo. (Omugambuli 3:11) Buthuku bughuma Yesu Kristo mwabugha athi: “Obutseme buli oko basi ko bali n’obwagha bwa Nyamuhanga.”​—Matayo 5:3.

Ni ky’amenge eribugha thuthi “Obwagha bwa Nyamuhanga” bwa bukaleka abandu ibahimba amanyumba manene-manene n’ebindu bya kera eby’erikolesya omw’iramya, n’erikolesya esyosaha syosi esi bakasaba. Ni kwenene, abandi bakanayikethera amaaka wabu kutse eriyikethera abandi eriberererya ekiyithawa kyabu ky’eby’obunyakirimu. Aliwe, mbwino siwuli yilhangirira ngoku abandu sibawithe amaaka w’erithuwathikya ndeke? Thuli batseke kutsibu, engebe yethu ni nguhi, kandi sithwanga thoka eriminya eby’obuthuku obukasa. Oyuwithe amenge manene kutsibu, ow’amaaka manene, kandi oyukakotha musa, yuwanga thuha ebyo thukayithagha. Aliwe obwagha bwa Nyamuhanga obu obukaleka ithwasaba bw’obwahi?

Thakilengekaniako: Wune wathanza eribana obusondoli, amenge, kutse eby’erisubirya okwa bibulyo ebyo bandu bathe banga thoka erisubirya? Wune wathayowa iwukayithagha erihumulikanibwa hakabya ekitsibu ekikalire, iwukayithagha obusondoli okw’ithwamu okwa kindu ekikalire, kutse erighanyirwa omuthima akakuhandikirira?

Erikwamana ne Biblia, esyo ni nzumwa mbuya esikaleka ithwasaba. E Biblia ky’ekitabu eky’eriyikethera ekikakanaya okwa misabe, kandi kiri mw’eby’erileberyako by’emisabe ey’abalhume n’abakali bangyi abathaleghulha. Mubasaba erihumulikanibwa, obusondoli, erighanyirwa, n’eribana eby’erisubirya okwa bibulyo ebikalire kutsibu.​—Esyonyimbo 23:3; 71:21; Danieli 9:4, 5, 19; Habakuki 1:3.

Emisabe ng’eyo, nomuyanabya mbaghane, yabya iyinawithe ekya yisosenemu. Abosi abasaba babya ibanasi ekindu kikulhu ekyaleka emisabe yabu iyaliwa, mughulhu mungyi ekindu ekya bangyi munabwire bakagheghena. Babya ibanasi oyo batholere ibasaba.