MBWINO erisaba iryanathuwathikya? E Biblia yikabugha yithi ee, kwenene emisabe y’abaghombe ba Nyamuhanga abathaleghulha yikabaghasira. (Luka 22:40; Yakobo 5:13) Erithwalira haghuma, omusabe angana thuwathikya bunyakirimu, omw’iyowa, nibya na kinyamubiri. Athi?

Thubughe thuthi omwana wawu iniahebwa ekihembo. Iwunemwendi mukangirirya wuthi kikaghunza erikwama kya yowa lisa kw’amasima? Kutse iwunemwendi mukangirirya wuthi akanganaye kw’amasima? Thukabya thukahira eryowa eryo thuwithe omwa muthima ly’omwa binywe, thukaleka iryalhangirika kandi ithwalighumya. Mbwino ekyo nina kwenene bikahika okw’ikania na Nyamuhanga? Ahathe erithika-thika! Thulebaye eby’erileberyako birebe.

Emisabe y’ewasingya. Thukabya thukasima Thatha wethu busana n’ebibuya ebya thukabana, thukahira amalengekania w’okwa mighisa yethu. Busana n’ekyo, ithwangan’ongera erisima, eritsema, n’eribya n’amalengekania awuwene.​—Abanya Filipi 4:6.

Eky’erileberyako: Yesu mwakangania erisima liwe busana n’emibere Thatha wiwe ahulikirira n’erisubirya emisabe yiwe.​—Yoane 11:41.

Erisaba ekighanyiro. Thukabya thukasaba Nyamuhanga y’ekighanyiro, thukaghumaya obunyamuthima-thima bwethu, ithwongera eriyisubamo, n’eryongera eriminya obulithohe bw’ekibi kyethu. Kandi thukayilhusayako omuheke w’eriyowa nabi busana n’erisobya.

Eky’erileberyako: Dawudi mwasaba akakangania eriyisubamo n’eriyikubyabwomo.​—Esyonyimbo 51.

Erisaba obusondoli n’amenge. Erisaba Yehova y’obusondoli kutse erithuha amenge agho thukayithagha erithwamu ndeke kyangana leka ithwabya n’eriyikehya ery’okwenene. Kyangana leka ithwibuka erilemererwa lyethu kandi ithwayikethera Thatha wethu w’elhubulha.​—Emisyo 3:5, 6.

Eky’erileberyako: Omw’iyikehya Solomona mwasaba obusondoli n’amenge aw’erithabalha Abaisraeli.​—1 Abami 3:5-12.

Erisaba omwa mughulhu w’obulighe. Thwamabwira Nyamuhanga y’ebiri okwa mithima yethu omughulhu thuli omwa bitsibu, ithukendi humulikana kandi ithwayikethera Yehova omwakanya k’eriyikethera amaaka wethu.​—Esyonyimbo 62:8.

Eky’erileberyako: Omwami Asa mwasaba omughulhu enzighu yiwe eyikalire yamubambira.​—2 Emyatsi y’Emigulu 14:11.

Erisaba busana n’abali omwa buyithawa. Emisabe ng’eyo yikaleka ithwayihighulha okw’iyitsomana ithwibene, kandi iyaleka ithwabya bandu abakakwira abandi b’obulighe kandi abakabalhumirirawa.

Eky’erileberyako: Yesu mwasaba busana n’abigha biwe.​—Yoane 17:9-17.

Emisabe y’eripipa. Thwamapipa Yehova busana n’emibiiri yiwe mibuyanga n’emibere yiwe, erisikya n’erisima ebya thumuwithire ibikendi ongera. Kandi emisabe ng’eyo yangana leka ithwayithunda hakuhi na Nyamuhanga wethu kandi Thatha wethu.

Eky’erileberyako: N’omuhwa munene Dawudi mwapipa Nyamuhanga busana n’ebihangikwa biwe.​—Esyonyimbo 8.

Owundi mughisa owakalhua omw’isaba ly’eribana “obuholho bwa Nyamuhanga, obulhabire amenge wosi.” (Abanya Filipi 4:7) Si kyolho eribana erithekana omwa kihugho ekitsandire kino. Nibya kikathughasira na kinyamubiri. (Emisyo 14:30) Mbwino erithekana likakwama kyasa busana n’akaghalha kethu? Mbwino hane ebikayithaghisibawa eribana erithekana?