KYABIRIBUWA indi gho musabe owakasubawamo kutsibu omwa misabe yosi y’Abakristayo Mbulha ekyo ni kwenene kutse eyihi, omusabe wa Yesu ow’eky’erileberyako​—okwa bundi buthuku owakahulhawamo Omusabe wa Thatha wethu​—omo kwenene abandu bangyi sibali yitheghererayagho ndeke. Esyomiliyoni sy’abandu bakasubirira omwa binywe byagho obuli kiro, obundi mughulhu mungyi omwa musibo wosi. Aliwe Yesu mwathabugha athi omusabe oyo iniakolesibwa athya. Thukaminya thuthi?

Yesu athali aha omusabe oyo, mwabugha athi: “Omughulhu mukasaba, simubye mukasubirira omwa binywe bithya-bithya [“bighumerere,” NWT].” (Matayo 6:7) Mbwino Yesu abya iniakayighanaya akaha ebinywe by’erihambira omwa muthwe n’eby’erisubiriramu? Eyihi nahake! Aliwe, Yesu abya iniakathukangiriraya ebya thutholere ithwasaba, kandi abya iniakathubwira ebya thutholere ithwabya ithun’ibukire erihira embere thukasaba. Leka thulebaye ndeke eby’abugha. Omusabe eyo ali omu Matayo 6:9-13.

Kwesi, Yesu ibukaya abigha biwe athi emisabe yosi yitholere iyaghendera Thatha wiwe, Yehova. Aliwe wunasi ekikaleka erina lya Nyamuhanga iryabya likulhu n’ekikaleka iryabya iritholere iriyirwa mwa libuyirire?

Eritsuka aha abandu bakathaberaho, erina lya Nyamuhanga eribuyirire lyabirikanibwako amabehi. Enzighu ya Nyamuhanga ya Sitani, abiryahulha Yehova mwa mubehi, Omuthabali oyuyitsomene oyuthawithe ehamuli y’erithabalha ebihangikwa Biwe. (Enzuko 3:1-6) Abangyi babiriligha ebya Sitani, omw’ikangirirya bathi Nyamuhanga ni mubi, ni mutsurumi, kutse ibabugha bathi sihali Muhangiki. Abandi nibya babirirwanisya erina liwe, erilhusya erina Yehova omwa syombindulha sye Biblia n’erighania abandu eririkolesya.

E Biblia yikakanganaya ngoku Nyamuhanga akendi ghunzaho obuthebulingirirania bwosi obu. (Ezekieli 39:7) Omw’ikolha eki, akendi berererya ebiyithawa byawu byosi n’erighunzaho ebitsibu byawu. Athi? Ebinywe ebikakwamako omwa musabe wa Yesu bikaha ky’erisubirya.

Munabwire, abakangirirya b’amadini bangyi bakabugha ebithasosene oko Bwami bwa Nyamuhanga. Aliwe ngoku abahulikiriri ba Yesu banabya basi, abaminyereri ba Nyamuhanga babya ibabirisangwa balhaghulha bathi Masiya, Omulhamya oyo Nyamuhanga abirisombolha angathabere Obwami obwangahindwire ekihugho. (Isaya 9:6, 7; Danieli 2:44) Bwangayirire erina lya Nyamuhanga mwalibuyirire omw’ibisulha amabehi wa Sitani n’erighunzaho Sitani n’emibiiri yiwe yosi. Obwami bwa Nyamuhanga bukendi syaghunzaho esyonyuhi, amalhwere, enzalha​—nibya n’olhuholho. (Esyonyimbo 46:9; 72:12-16; Isaya 25:8; 33:24) Wukabya wukasaba wuthi Obwami bwa Nyamuhanga bwase, wukabya iwukasaba wuthi emilhaghe yosi eyi yibererere.

Ebinywe bya Yesu ebyo bikakanganaya ngoku erisonda lya Nyamuhanga ni ry’ekwenene indi likendiyirwa okwa kihugho ngoku liri omwa lhubulha, eyo Nyamuhanga ikere. Erisonda lya Nyamuhanga silyathalemwa eribya omwa lhubulha; eyo, Mughalha wa Nyamuhanga mwalhwa na Sitani n’abamalaika biwe, mwabaghusa okwa kihugho. (Eribisulirwa 12:9-12) Ekindu kyakasathu eki omwa musabe w’eky’erileberyako, nakyo ng’eky’erimbere n’ekyakabiri, kikathuwathikaya erihwerya amalengekania okwa kindu kikulhu kutsibu​—erisonda lya Nyamuhanga butsira eryethu. Mughulhu wosi anzire erilethera ebihangikwa biwe byosi by’ebibuya. Nibya, n’omulhume oyuhikene ya Yesu mwabwira Thatha wiwe athi: “Erisonda lyawu, butsira eryaghe lyo likolhawe.”​—Luka 22:42.

Yesu kandi mwakangania ngoku thwangana saba busana n’ebiyithawa byethu. Sikibi erisaba Nyamuhanga y’ebiyithawa byethu bya buli kiro. Erithwalira haghuma, erikolha ekyo likathw’ibukaya ngoku Yehova yukaha “engebe n’omuka n’ebindu byosi okwa bandu abosi.” (Emibiri 17:25) E Biblia yikabisulha ngoku iyo ni mubuthi w’olhwanzo oyuwanzire eriha abaana biwe b’ebya bakayithagha. Aliwe ng’omubuthi mubuya, syangabaha ebya bakasaba byamabya isibyendi baghasira.

Mbwino kwenene hane amalholho agho wabirikolha embere sya Nyamuhanga? Wukana yithagha erighanyira liwe? Abangyi munabwire sibasi ekibi nga niki kandi ngoku ni kindu ekikalire. Aliwe e Biblia yikathubwira yithi ekibi y’enzuko y’ebitsibu byethu ebyosi, kundi ky’ekikaleka abandu ibaholha. Thukabuthawa ithune bakolha-nabi, ithwe bosi thukasobaya obuli ndambi, neryo amaha wethu w’obuthuku obukasa aseghemere okw’ighanyira lya Nyamuhanga. (Abanya Roma 3:23; 5:12; 6:23) Kikahumulikanaya eriminya ngoku e Biblia yikabugha yithi: “Iwe Mwami Mukulhu, wuli mubuya, kandi wukabuyira.”​—Esyonyimbo 86:5.

Mbwino wunasi ngoku wukayithagha kutsibu obutheya bwa Nyamuhanga? Abangyi sibali ligha ngoku ‘omubi,’ Sitani, aneho. Aliwe Yesu mwakangirirya ngoku Sitani aneho, nibya mwamwahulha mwa “muthabali w’ekihugho kino.” (Yoane 12:31; 16:11) Sitani abiritheba ekihugho kyosi eky’akathabalha, kandi anzire kutsibu erikuthebya, nuku siwulhole embere eribya n’obughuma obughumire na Thatha wawu, Yehova. (1 Petero 5:8) Aliwe, Yehova awithe obuthoki bunene kwilhaba Sitani kandi anzire kutsibu eritheya abamwanzire.

Ebya thwamabirilhangira omwa bikuhi omwa musabe wa Yesu w’eky’erileberyako sibirikanaya okwa buli kindu ekya thwanga saba. Wibuke, 1 Yoane 5:14 hakathubwira oku Nyamuhanga hathi: ‘Thwamabulya kindu omw’isonda liwe, akathwowa.’ Neryo isiwalengekanaya wuthi ehitsibu hyawu ni hike-hike kutsibu wuthi siwanga hibwira Nyamuhanga.​—1 Petero 5:7.

Kandi ibbwa endambi n’omwanya? Mbwino nabyo nina kikulhu?