Ebitsibu Ebikaleka Ithwabya n’Amaha

“Oko biro by’enyuma-nyuma hasyabya emighulhu yikalire.”​—2 TIMOTEO 3:1.

WANOWIRE​—kutse eriyilhangirira—​ekighuma ky’okwa bindu ebikitha obulighe ebiri ahikwa hano?

● Obulhwere obukalire kutsibu bwabiritha abandu bangyi.

● Enzalha yabiritha ebikumi by’abandu.

● Omusiki abiritha esyongumi sy’abandu n’abangyi kutsibu babirisighalha isibawithe ah’er’ikalha.

Omo myatsi eyikakwamako, wukendi lhangira ebindu ebikakukubalhaya ebihambire oko myatsi ng’eyi. Kandi wukendi lhangira ngoku e Biblia muyalhaghulha ngoku embere ng’eyi yanga bereho omwa buthuku obukahulhawamo “ebiro by’enyuma-nyuma.”

Aliwe ekighendererwa ky’emyatsi eyi, si ly’erikulighisya ngoku thuli omwa kihugho ekyoswire mw’ebitsibu. Obundi nawu wunemuyilhangirira ebitsibu ebi. Aliwe, emyatsi eyi yikolirwe erikuha amaha. Yikendi kangania ngoku eribererera ly’amaminyereri mukagha aya kikakanaya ngoku ‘ebiro by’enyuma-nyuma’ bikisiya ibyahwa. Kandi emyatsi eyi yikendi kania n’okwa malengekania w’abandu abakaghanaya ebikakanganaya ngoku thuli omwa biro by’enyuma-nyuma n’eriha esyonzumwa mbuya esyanga leka ithwaligha ngoku omughulhu owuwene ali hakuhi.