Obuminyereri 1. Emisiki

“Hasyabya emisiki minene-minene.”​—LUKA 21:11.

● Winnie, ow’omwaka mughuma n’emyezi ini, akalhusibawa omwa bisambukalirya by’enyumba omwa Haiti. Etimu y’abakakolera okwa tivi yikaripotinga okwa kitsinduli eki muyowa kalhukwe-lhukwe omwana oyu inianemulhaka. Omwana akalhama okwa musiki, aliwe ababuthi biwe bakaholha.

OBWEMA BUKAKANGANAYAKI? Omughulhu omusiki munene alhaba e Haiti omo Kwokubanza 2010, abandu abalhabire omu 300,000 mubaholha. N’abandi miliyoni 1.3 mubabya isibakiwithe bwikalho. Nomwakine indi omusiki we Haiti abya munene kutsibu, habya ihane n’eyindi misiki eyalhaba omwa bindi bihugho. Hakuhi emisiki eminene-minene 18 muyalhaba erithimba omwa kihugho ahakathi-kathi k’Okwakani 2009 n’Okwakani 2010.

NI MALENGEKANIA WAHI AWAKANYIRIRE? Si bugha indi emisiki yamayongera munabwire; busana n’etekinologia eyiriho, lino thukaminya kutsibu ko hali emisiki kwilhaba abandu abakera.

MBWINO AMALENGEKANIA AYA ANAHIKIRE? Thalengekania oku kino: E Biblia siyiri hira omuwatho okwa mughanzo w’emisiki eyangabere omwa biro by’enyuma-nyuma. Aliwe, yikabugha yithi “emisiki minene-minene” yangabere “ehandi n’ehandi,” eribya kighuma ky’okwa bindu ebyangabere omwa buthuku bw’embaghane buno.​—Mariko 13:8; Luka 21:11.

WUKALENGEKANAYA WUTHIKI? Mbwino thune mulhangira emisiki eminene-minene, ngoku Biblia yanalhaghulha?

Si y’emisiki misa eyikaleka ithwaghunzerera thuthi thuli omwa biro by’enyuma-nyuma. Aliwe, ni mighuma y’okwa maminyereri owane mubererera. Thalengekania okwa buminyereri bwakabiri.

[Eblabbu]

“Ithwe thusomire eby’emibere ey’ekithaka thukahulhayo mw’emisiki eminene-minene. Abandi abosi ibo bakahulhayo mw’ebindu by’obulighe.”​—KEN HUDNUT, U.S. GEOLOGICAL SURVEY.

[Ahalhuire Ekisasani]

© William Daniels/​Panos Pictures