Obuminyereri 2. Enzalha

“Hasyabya esyonzalha.”​—MARIKO 13:8.

● Omulhume akasondaya obusayiro omwa kyalu kye Quaratadji, omwa Niger. N’abahughu biwe bakalhua omwa yindi myanya eya haali omwa kihugho ekyo bakathibitha bakasagha enzalha. Nomwabine, omulhume anakesirye iyuwene okwa mukeka okwa kithaka. Busana naki ali iyuwene? Omukulhu w’obulhambu ya Sidi, akasoborera athi, “Syangathoka erilisya [eka yiwe] kandi syangathoka eribalhangira bakakwa n’enzalha.”

OBWEMA BUKAKANGANAYAKI? Omwa kihugho kyosi, hakuhi omundu 1 omwa bandu 7 syalibana ebyalya ebikaghunza obuli kiro. Bikongera ibbwa erikalha bikahika okwa bihugho by’omwa Afirika ebiri eyikwa we Sahara, kundi eyo omundu 1 omwa 3 syalibana ebyalya ebikaghunza ahabw’omughulhu muuli. Eriyitheghererya ekyo kya ndeke, thalengekania okw’eka eyirimo thatha, mama, n’omwana. Bamabana ebyalya ebyang’ughuthya abandu babiri basa, ababuthi ibakendi leka omwana atsuke erirya n’eryughutha, neryo ibbwa nindi oyukendirya ebikasaka? Thatha kutse mama? Eri ly’erithwamu eryo amaka ng’ayo atholere iniakolha obuli kiro.

NI MALENGEKANIA WAHI AWAKANYIRIRE? Ekithaka kikahulhukaya ebyalya bingyi ebikaghunza obuli mundu. Ebya ekithaka kikahulhukaya bitholere ibyakolesibwa ndeke.

MBWINO AMALENGEKANIA AYA ANAHIKIRE? Ni kwenene, munabwire abalimi bangana hulhukya byalya bingyi n’eribithwalha omwa yindi myanya kwilhaba kera. Ekitholere kiri kithi, esyogavumente sy’abandu sitholere isyakolesya ndeke ebyalya ebya kithaka kikahulhukaya erithoka erighunzaho ekitsibu ky’enzalha. Aliwe, nibya n’enyuma w’erilengesya erikolha eki ahabw’emyaka mingyi, babirilemwa.

WUKALENGEKANAYA WUTHIKI? Mbwino ebiri omu Mariko 13:8 binemubererera? Nomwakine indi hali engulha-kulhana omwa by’etekinologia, mbwino enzalha nina kindu ekikaghalhaya abandu omwa kihugho kyosi?

Emisiki n’enzalha bikakolhaya okwa kindi kindu ekiri omwa kiminyikalho ky’ebiro by’enyuma-nyuma. Thulebaye omwatsi owakakwamako.

[Eblabbu]

“Abaana abalhabire omwa kimu-kyakasathu abakaholha busana n’ekikuba ky’embeho, olhuturuko n’esindi ndwalha bakabya ibangana lhamire ku bathabya n’emirire mibi.”​—ANN M. VENEMAN, FORMER EXECUTIVE DIRECTOR OF THE UN CHILDREN’S FUND.

[Ahalhuire Ekisasani]

© Paul Lowe/​Panos Pictures