Obuminyereri 4. Erithendibya n’Olhwanzo omw’Eka

“Abandu basyabya . . . isibawithire ab’omw’eka yabu b’olhwanzo.”​—2 TIMOTEO 3:1-3, God’s Word Bible

● Chris akakolha n’egurupu eyikawathikaya abandu abakahambawako busana n’amalhwa w’omwa maka omwa North Wales. Chris akabugha athi: “Ng’ibuka omukali mughuma oyuwasa iniabiriswiribwa kutsibu indi mukyanyikalira erimuminyerera nomwakine indi nabya ingana mulholireko. Abandi bakali bakahuthalibawa kutsibu omw’iyowa indi sibanga thoka n’erisumba ameso wabu wukakania nabu.”

OBWEMA BUKAKANGANAYAKI? Omwa kihugho kighuma omwa Afirika, hakuhi omukali 1 omwa bakali 3 anakolirweko eby’obuthundirya iniakine mulere. Erisekulya eryakolhawa omwa kihugho ikyan’ekyo mulyakangania ngoku abalhume bangyi bakayowa ini kindu ekikalighirawa eriswirya bakali babu. Aliwe, si b’abakali basa abakahambawako busana n’amalhwa omwa maka. Ng’eky’erileberyako, omwa Canada, hakuhi abalhume 3 omwa balhume 10 bakali babu babiribaswirya kutsibu kutse eribakolha nabi.

NI MALENGEKANIA WAHI AWAKANYIRIRE? Erilhua kera habiribya ihane amalhwa omwa maka. Munabwire mukiri kw’ikanibwako kutsibu kwilhaba kera.

MBWINO AMALENGEKANIA AYA ANAHIKIRE? Omo myaka eya lino-lino amalhwa omwa maka abirikanibwako kutsibu kwilhaba kera. Aliwe eriminya ngoku hane ekitsibu eki kyanalekire amalhwa aya iniakeha? Eyihi nahake. Erithendibya n’olhwanzo omw’eka likaghenda likongera kutsibu.

WUKALENGEKANAYA WUTHIKI? Mbwino ebiri omu 2 Timoteo 3:1-3 bine mubererera? Mbwino abangyi sibawithire ab’omwa maka wabu b’olhwanzo olhunatholere ilhwayiretha?

Obuminyereri obwakathano obwa wune mulhangira bukabererera buhambire okwa bwikalho bwethu, ekihugho. Thalebya ekya Biblia yikabugha oko mwatsi oyu.

[Eblabbu]

“Amalhwa w’omwa maka ni kighuma ky’okwa bindu bibi ebikabya kutsibu ebithethwalhawa omwa b’ebilhaghiro. Erithakibaririra, omukali akaswiribawa n’omwanze wiwe mirundi 35 imwahikya omwatsi w’okwa polisi.”​—EMBUYI OMUKALI OYUKAKOLHA OKWA BY’AMALHWA W’OMWA MAKA OMWA WALES.