Obuminyereri 6. Omubiiri w’Erithulhughania Omwa Kihugho Kyosi

“Engulhu yuwene y’Obwami eyi yasyatsuka erithulhughanibwa omwa kihugho kyosi.”​—MATAYO 24:14.

● Vaiatea ikere okwa kizinga ekiri haali omwa ngetse nene eya Pacific omwa kitsweka kya Tuamotu. Nomwakine indi Tuamotu yiri kw’ebizinga bike-bike hakuhi 80 ebiyitsatsangire omwa mwanya munene kutsibu, kw’ikere abandu 16,000 basa. Nomwabine, Abema ba Yehova babirihika oku Vaiatea n’abataka biwe. Busana naki? Kundi Abema ba Yehova banzire eribwira abandu bosi okwa ngulhu eyihambire oko Bwami bwa Nyamuhanga, nomubangabya ibikere hayi.

OBWEMA BUKAKANGANAYAKI? Omwatsi w’Obwami anemuhika omwa syongonde syosi sy’ekihugho. Omo mwaka wa 2010 musa, Abema ba Yehova mubaghunza esyosaha bbiliyoni nguma n’esyomiliyoni mukagha bakathulhughania engulhu yuwene omwa bihugho 236. Eki kikamanyisaya kithi, obuli kiro, obuli Mwema mwaghunza dakika 30 omwa mubiiri w’erithulira. Omo myaka ng’ikumi eyilhabire, babirihulhukya n’erighaba ebitabu ebiseghemere okwa Biblia ebilhabire omu bbiliyoni 20.

NI MALENGEKANIA WAHI AWAKANYIRIRE? Omwatsi we Biblia abirithulhughanibwa ahabw’esyongumi sy’emyaka.

MBWINO AMALENGEKANIA AYA ANAHIKIRE? Ni kwenene, abangyi bane muthulhughania omwatsi owahambire okwa Biblia. Aliwe, abangyi babirikolha ekyo habw’obuthuku buke kandi omwa bulhambu buke. Mbaghane n’ekyo, Abema ba Yehova bane muberererya omubiiri owatheghekenie, ow’erithulhughania engulhu yuwene eyikahika okwa syomiliyoni n’esyomiliyoni sy’abandu omwa kihugho kyosi. Abema ba Yehova babiriyitsingirira omwa mubiiri wabu w’erithulhughania nomwakine indi hane erihakanisibwa erikalire erilhua okwa bithongole by’abandu eby’amaaka kandi ebitsurumire kutsibu kwilhaba kera. (Mariko 13:13) Nomwabine, Abema ba Yehova sibali hebawa musara busana n’erithulira. Aliwe, bakayihayo erikolesya obuthuku bwabu, kandi bakaghaba ebitabu ahathe erithuha. Omubiiri wabu akasighikawa n’ebikahebawayo ahathe erikakwa.

WUKALENGEKANAYA WUTHIKI? Mbwino “engulhu yuwene ey’obwami” yine muthulhughanibwa omwa kihugho kyosi? Mbwino eribererera ly’obuminyereri obu kikamanyisaya kithi ebindu ebyuwene bikisiya ibyabya?

[Eblabbu]

“Yehova amabya iniakinakilighire, thukendi lholha embere erithulhughania engulhu yuwene ey’Obwami n’omuhwa, omw’ikolesya enzira yosi-yosi eyanga thokekana erihika okwa bandu.”​—2010 YEARBOOK OF JEHOVAH’S WITNESSES.