Omughulhu Owuwene ali Hakuhi!

“Omo kandi kathambi, ababi basyabulirana . . . Nikwa abakayikehaya basyikalha ndeke omwa kihugho, basyayitsemera omwa buholho bunene.”​—ESYONYIMBO 37:10, 11.

WUNANZIRE erilhangira obuminyereri obu bukabererera? Ahathe erithika-thika, iwukendianza. Hane esyonzumwa esilhangirikire esyanga leka iwikirirya ngoku eki kikisiya ikyabya.

Emyatsi ey’ahanyuma muyikakanaya okwa maminyereri make we Biblia awakakanganaya ndeke-ndeke ngoku thuli omwa “biro by’enyuma-nyuma.” (2 Timoteo 3:1-5) Nyamuhanga mwasondolha abahandiki be Biblia eriminyerera ebindu ebi nuku thwangabya n’amaha. (Abanya Roma 15:4) Eribererera ly’amaminyereri ng’aya kikamanyisaya kithi ebitsibu ebya thukabana lino bikisiya ibyahwaho.

Ni kyahi ekikendisyabya ebiro by’enyuma-nyuma bikahwa? Obwami bwa Nyamuhanga bukendi syathabalha abandu abosi. (Matayo 6:9) Thulebaye emibere eyo e Biblia yikakanayako eyikendi syabya okwa kihugho okwa buthuku obo:

● Sihendi syabya enzalha. “Engano yibyeho nene omo kihugho; n’ehithwa hyusule mw’ebyalya.”​—Esyonyimbo 72:16.

● Sihendi syabya amalhwere. “Kandi sihali ndulhani eyikendi syabugha yithi: Nyilhwere.”​—Isaya 33:24.

● Ekihugho kikendi syathasyuwanibwa. “Embwarara n’olhukurutsu byasyatsema, n’embwarara yasyatsanga n’erihulhukya omusanga ng’erikanga.”​—Isaya 35:1.

Aya ni maghuma w’okwa maminyereri make we Biblia awakahumulikanaya awakisiya iniabererera. Busana naki iwuthasaba Abema ba Yehova wuthi bakukanganaye ekikaleka ibayikethera ndeke-ndeke ngoku omughulhu owuwene ali hakuhi?