E Biblia Yikahindulha Esyongebe

NI KYAHI ekyaleka omukali oyuli omo myaka yiwe eye 60 inialeka eriramya esyosanamu? Ni kyahi ekyaleka omukara ow’edini y’Ekishinto iniayighabulha okwa dini y’amabehi n’eribya Mukristayo? Omukali oyuwalemberawa n’abathe babuthi biwe erilhua okw’inabuthwa mwathoka athi erighumira emibere ey’eriyowa ng’oyuwabirisighanibwa? Lengekanaya okwa bya bandu aba bakabugha.

“Singakiri Mukobe w’Esyosanamu.”​—ABA DANSOU

ABUTHAWA: 1938

EWABU: BENIN

EBY’ENYUMA: OMURAMYA W’ESYOSANAMU

ENGEBE YAGHE ENYUMA: Nakulira e So-Tchahoué, ekyalu ekiri omwa kisesa hakuhi n’engetse. Ab’omwa kyalu kyethu ini basohi kandi ibakathunga esyonde, esyombene, esyombuli, esyombunu, n’esyongoko. Omwa kyalu kyethu simuli esyonguda, neryo abandu bakakolesaya amathu erighenda hano na halya. Kutsibu-tsibu bakahimba amanyumba wabu omwa mithi n’obunyatsi, nomwakine indi abandi bakanakolesaya amatafali. Erithwalira haghuma, abandu b’eyo ni banakwa. Nomwabine, obubi sibuswireyo ngoku kiri omwa syotawuni.

Ingakine mulere, thatha waghe mwathuthwalha ingye na mwali wethu omwa ngorwe, eyo thwakangiriribawa emirwa y’abasukulhu. Nabere nabirikulha, mun’imya Dudua (Oduduwa) erilhua omwa kalikya y’Abayoruba nga nyamuhanga waghe. Munahimbira nyamuhanga oyu kandi mughulhu mungyi iningabya inganemumuhongera ebinyangwa, amaghutha w’engasi, ebikome, esyongoko, ehirikuku, n’ebisoro muthina-muthina. Ebihongo ebi ibikalire ebbeyi kandi mughulhu mungyi ibikathwalha hakuhi obuli kindu ekya ngawitheko.

NGOKU E BIBLIA YAHINDULHA ENGEBE YAGHE: Nabere ingatsuka erigha e Biblia, mun’igha ngoku Yehova ya Nyamuhanga w’okwenene musa. Kandi munaminya ngoku syalirighira erikolesya esyosanamu omw’iramya. (Eriluayo 20:4, 5; 1 Abanya Korinto 10:14) Munaminya ekya ngatholere erikolha. Neryo munaghusa esyosanamu syaghe esyosi n’erilhusya omwa nyumba yaghe mw’ekindu kyosi-kyosi ekihambene n’eriramya ly’esyosanamu. Munaleka erikanirania n’esyombinga, kandi singakisangira omwa mirwa y’ewethu n’emirwa y’ebiriro.

Mukithanyolhobera​—omukali oyuli omo myaka yiwe eye 60​—erikolha esyombinduka esi. Banywani baghe, abahughu, n’abataka mubanyihakanisya n’erinyisekererya. Aliwe munasaba Yehova y’amaaka w’erikolha ekihikire. Munabana erihumulikanibwa omwa binywe ebiri omwa Emisyo 18:10, ebikabugha bithi: “Erina ly’Omwami Mukulhu [Yehova] ni Nyumba yisungulikire ikongothere; Omuthunganene akathibitha muyo iniabana obuholho.”

Ekindi ekyanyiwathikaya ly’erihindana okwa mihindano y’Abema ba Yehova. Eyo munayilhangirira olhwanzo lhw’Ekikristayo, kandi munatsema kundi abandu aba babya bakalengaho erighendera okwa bihano bye Biblia eby’esyongeso. Ebya nalhangira mubyaleka ingaligha ngoku Abema ba Yehova y’edini ey’okwenene.

NGOKU NABIRIGHASIRWA: Erighendera okwa misingyi ye Biblia kyabiringwathikya eryuwania obughuma bwaghe n’abaana baghe. Kandi ngayowa inabirilhusibwa kw’omuheke. Iningayilhuhaya omw’ihwerya ebindu byaghe okwa syosanamu bbule esithangwathikaya omwa nzira yosi-yosi. Lino ngaramaya Yehova, oyukayilhagha erighunzaho ebitsibu byethu kera na kera. (Eribisulirwa 21:3, 4) Ngatsemire kutsibu habw’eribya isingakiri mukobe w’esyosanamu, omwakanya k’ekyo, ngali mukobe wa Yehova! Nabiribana erithekana n’obutheya omw’iyo.

“Eritsuka Bulere Nabiribya Inganemusondya Nyamuhanga.”​—SHINJI SATO

ABUTHAWA: 1951

EWABU: JAPAN

EBY’ENYUMA: OMUKARA W’EDINI Y’EKISHINTO

ENGEBE YAGHE ENYUMA: Nakulira omwa kyalu omwa disitrikiti ye Fukuoka. Ababuthi baghe ini banya dini kutsibu; eritsuka omo bwana mubanyikangirirya erisikya esyonyamuhanga sy’Ekishinto. Mughulhu mungyi, ingye ng’omulhwana mulere iningabya inganemulengekania okwa mulhamu waghe kandi inganzire kutsibu eriwathikya abali omwa bitsibu. Ng’ibuka kiro kighuma ingane omwa premare omuhalimu akathubulya ebya thwanzire erisyakolha thwabirikulha. Abangasoma nabo babya bawithe ebilhubirirwa ebikalha-kalire, ng’erisyabya banya sayansi. Munabugha indi ekilhubirirwa kyaghe ni kolera Nyamuhanga. Obuli mundu mwanyisekerera.

Nabere nabirighunza esiniya, munaghenda okwa sukuru y’abakangirirya b’edini. Omw’ithendeka eryo, munabana omukara w’edini y’Ekishinto oyuwabya akakolesya obuthuku bwiwe bw’erilhuhuka omw’isoma ekitabu ky’ekidipa ky’ekirima. Kiro kighuma mwanyibulya athi, “Sato, wunasi eki nga ni kitabuki?” Nabya inabirilhangira ekidipa ky’ekitabu ekyo, neryo munasubirya indi, “Ni Biblia.” Mwabugha athi, “Obuli mundu oyuwanzire eribya mukara w’Ekishinto atholere iniasoma ekitabu eki.”

Aho n’aho munayaghulha e Biblia. Munahirayo ahuwene kutsibu omwa kabada yaghe y’ebitabu kandi iningatheghayayo ndeke. Aliwe mungathabana obuthuku bw’erisomayo, kundi esukuru iyikaleka ingabulha obuthuku. Nabere ingaghunza esukuru munatsuka erikolera okw’iramiryo ly’Ekishinto ng’omukara. Ekilhubirirwa kyaghe ky’omwa bulere mukyabya ikyamabererera.

Aliwe buthuku buke munalhuaho ingaminya ngoku eribya mukara w’Ekishinto sikyo nabya ingalengekania. Abakara bangyi isibawithire abandu b’olhwanzo kandi isibalibatsomana. N’abangyi isibawithe erikirirya. Omughuma w’okwa bakulhu-bakulhu mwahika n’okwa kiika ky’erimbwira athi: “Wamabya iwanzire wuthoke hano, wutholere iwakania oko myatsi y’amenge w’abandu misa. Erikania okw’ikirirya kithangirwe.”

Ebinywe ng’ebyo mubyanyighunza amani w’erilholha embere n’edini y’Ekishinto. Nomwakine indi munalholha embere n’omubiiri waghe okw’iramiryo eryo, munatsuka erilebya esindi dini. Aliwe, sihabya n’eyikabya nga yuwene. Nabere n’ongera erilebya esindi dini, ku nan’ongera indya erihwa amani. Munayowa nga sihali edini eyirimo okwenene.

NGOKU E BIBLIA YAHINDULHA ENGEBE YAGHE: Omwa 1988, munabana ow’edini y’Ekibbuddi oyuwanyihira mw’omuhwa w’erisoma e Biblia. Munalengekania okwa mukara w’Ekishinto oyuwanyibwira athi ngakole ikyan’ekyo kera. Munathwamu erighendera okw’ihabulha eryo. Nabere ingatsuka erisoma e Biblia, munalhuaho inayihwerya muyo. Ihakanayira ingasoma omwa kiro omwosi erihika aho ekyakakalha ky’eryuba kikendi lhangirikira omw’idirisa.

Ebyo nasoma mubyaleka inganza erisaba oku Nyamuhanga we Biblia. Munatsukira okwa musabe w’eky’erileberyako owali omu Matayo 6:9-13. Iningasubirira mugho obuli nyuma w’esyosaha ibiri​—nibya inganemukolha n’emibiiri yaghe w’Ekishinto.

Munathunga ebibulyo bingyi ebihambire okwa bya nabya ingasoma. Okwa buthuku obo, nabya inabirithahya, kandi nabya inganasi ngoku Abema ba Yehova bakakangiriraya abandu okwa Biblia kundi babya ibanabungire mukali waghe kera. Munasondya omwema mughuma n’erimubulya ebibulyo bingyi. Munatsema akakolesya e Biblia erisubirya obuli kighuma ky’okw’ibyo. Mwahiraho emitheghekere y’erinyisonderya Omwema omulhume ow’erinyeghesya e Biblia.

Buthuku buke enyuma waho, munatsuka erihindana okwa mihindano y’Abema ba Yehova. Okwa buthuku obo, mungathaminya ngoku omwa Bema mune n’abo abanasosaya nabi kera. Nomwabine, mubanyiramukya ibanatsangire kandi mubaleka ingayowa buholho.

Okwa mihindano eyo, mun’igha ngoku Nyamuhanga anzire abiba ibakangania ab’eka yabu b’olhwanzo n’eribaha ekitsumbi. Erihika okwa buthuku obo, nabya inabirihwerya amalengekania waghe okwa mubiiri waghe ng’omukara indi inabirigheghena mukali waghe n’abaana baghe babiri. Munatsuka eriminya ngoku iningabera erihulikirira ebyo ababya bakasyaramya babya bakabugha aliwe isindihulikirira ebya mukali waghe akabugha.

Erigha lyaghe lyabere linemulholha embere, mun’igha bindu bingyi ebihambire oku Yehova ebyaleka ingayithunda hakuhi nayu. Kwilhabirirya ekyanyihambako kutsibu w’amasako nga Abanya Roma 10:13, ahakabugha hathi: “Obuli mundu oyukalhakira erina ly’Omukama asyalhamibwa.” Natsuka erisondya Nyamuhanga eritsuka bulere, erighunzerera, munamubana!

Munatsuka eriyowa isingakitholere erikolera ahali eriramiryo ly’Ekishinto. Okw’itsuka, munabulha abandi nga bakendi lengekaniaki ingalhua omwa dini y’Ekishinto. Aliwe erilhua kera iningabya ingane muyibwira indi namabana Nyamuhanga w’okwenene ehandi iningendi yayo. Neryo omwa 1989, munathwamu erikwama obunyamuthima-thima bwaghe. Munasighania eriramiryo ly’Ekishinto neryo namahira engebe yaghe omwa byalha bya Yehova.

Sikyabya kyolho erisighania eriramiryo eryo. Abimaniri baghe mubanyitsurumira n’erilengaho erinyihathikana erithendi ghenda. Na kwilhaba aho ibbwa, mukyanyikalira kutsibu eribwira ababuthi baghe. Omwa nzira ingaya eka eyiri ababuthi baghe, munahangya-hangya kutsibu, namowa ekikuba ekirimulhuma n’amaghulhu iniali okw’ileghetsana! Omwa nzira, munimanamo mirundi mingyi ingasaba Yehova y’amaaka.

Nabere ingahik’eka, munakwa obuba bunene bw’eribabwira ekyamanyiretha. Muhalhaba esyosaha. Erighunzerera, enyuma w’erisaba kutsibu, munasoborera thatha waghe ya buli kindu. Munamubwira indi nabiribana Nyamuhanga w’okwenene kandi indi ngamalhua omwa Kishinto nuku ngamukolere. Thatha waghe mwasisira n’erikwa obulighe. Abandi bahughu baghe mubasa eka n’erianza erihindulha amalengekania waghe. Sinabya nganzire eriponesya efamile yethu, aliwe kandi munaminya ngoku erikolera Yehova kya kindu ekitholere erikolhwa. Obuthuku bwa bere bunemulhaba, ab’efamile yethu mubatsuka erinyisima busana n’erithwamu lyaghe.

Nomwakine indi munathoka erileka erighenda okw’iramiryo ly’Ekishinto, nabya ingakinayithagha erihengulha amalengekania waghe. Engebe y’obukara yabya iyabirinyihathiramu. Munalengaho kutsibu eribirirwayo, aliwe ahosi-hosi aha ngakebera ihakabya ngahane ebikanyibukaya engebe ya kera.

Hali ebindu bibiri ebya nyiwathikaya eriyihamo amalengekania ayo. Eky’erimbere, munasondya omwa nyumba yaghe mw’ekyosi-kyosi ekyabya kihambangene n’edini yaghe eya kera. Neryo munabihisya ebyosi​—ebitabu, ebisasani, nibya n’ebindu eby’obughuli bunene. Ekyakabiri, munasondya ehighisa hingyi ehy’eriberamo n’Abema ngoku nangathoka. Olhwanzo lhwabu n’obuwathikya bwabu mubyanyiwathikya kutsibu. Lyolho-lyolho, engebe yaghe ya kera muyahwa omwa bulengekania.

NGOKU NABIRIGHASIRWA: Iningabere erilekererenia mukali waghe n’abaana baghe, ekindu ekyaleka ibayowa ibali omo mbwira. Aliwe nabere ingatsuka erighunza nabu buthuku, ngoku e Biblia yikabwira abiba, muthwabya banywani. Endambi muyahika, mukali waghe amanyiyiyungako omw’ikolera Yehova. Ithwe bosi haghuma na mughalha waghe, mwali waghe na mwira wiwe, lino thune bughuma omw’iramya ly’okwenene.

Ngabya ingalengekania okwa kilhotho kyaghe ingakine mulere eky’erikolera Nyamuhanga n’eriwathikya abandu, ngaminya ngoku nabiribana obuli kindu ekyo nabya ingasondya​—kandi na kwilhaba. Omwa binywe, sinangathoka erikangania nga ngasima Yehova ya bungahi.

“Munaminya ngoku hane ekinyibulirweko.”​—LYNETTE HOUGHTING

ABUTHAWA: 1958

EWABU: SOUTH AFRICA

EBY’ENYUMA: ERIYOWA NG’OYUWABIRISIGHANIBWA

ENGEBE YAGHE ENYUMA: Nabuthirawa e Germiston, omwa tawuni y’abakayithoka eyirimu erithakulha eby’obughuli omuthabya erithwa kutsibu ebilhaghiro. Ababuthi baghe mubathwamu erinyiha abandi bandu erinyirembere busana n’eriyowa bathi sibangathoka erinyirembera. Imunamaghunza biro 14, ababuthi abawithe olhwanzo mubanyimya kandi munabalhangira nga mama na thatha. Nomwabine, nabere naminya ekera yaghe, eriyowa imunasighanibwa mukyanyilyambya. Munatsuka eriyowa nga sindi w’okwa babuthi abanyikulhaya kandi nga sibali nyiyitheghereraya nahake.

Nabere nahikya myaka nga 16, munatsuka erighenda omwa syobbara, eyo ingye n’abanywani baghe ithukahotholha n’erihulikirira abimbi b’omuziki. Nabere nahikya myaka 17, munatsuka erinywa ethaba. Munanza ngabya muke-muke ng’omusika oyo nabya ingalhangira okwa tivi akathererera ethaba. Nabere nahikya myaka 19, munatsuka erikolera e Johannesburg, eyo nayisanga inamabiringira lhuba omwa kigurupu ekithuwene. Muhathalhaba buthuku inde natsuka erikolesya olhulimi lhubi, erinywa kutsibu ethaba, n’erinywa kutsibu obwabu okwa wikendi.

Nomwabine, ingayikamburire kutsibu. Iningabya inganemukolha ebisasayizi n’erisatha omupira w’abakali n’eyindi misathu. Kandi munahiraho akaghalha erisoma, kyamaleka ingayikolera erina omwa by’ekombyuta. Busana n’ekyo, munabana ndeke esyosente, kandi abanene mubalhangira ingali omwa ndeke. Aliwe ibbwa isi ngwithe etseme nahake​—iningayowa ingathere n’eritamwa engebe. Omwa muthima mw’eyo, munayowa ihane ekinyibulirweko.

NGOKU E BIBLIA YAHINDULHA ENGEBE YAGHE: Nabere natsuka erigha e Biblia, munaminya ngoku Yehova ni Nyamuhanga w’olhwanzo. Kandi munaminya ngoku abirikangania olhwanzo olho omw’ithuha Ekinywe kiwe, e Biblia. Yiri ng’ebaruha eyo abirithuhandikira erisondolha olhughendo lhwethu. (Isaya 48:17, 18) Munakiminya ngoku namabya nganzire erighasirwa omwa busondoli bwa Yehova obw’olhwanzo, ingatholere ingakolha esyombinduka omo ngebe yaghe.

Embinduka nguma eyo nabya ngatholere erikolha b’abanywani. Ebinywe ebiri omwa Emisyo 13:20 mubyanyihambako, ebikabugha bithi: “Wulendere haghuma n’abandu b’amenge nawu wasyabya w’amenge; Nikwa omwira w’abakiru asyakwa.” Omusingyi oyo mwanyiwathikya erileka abanywani baghe abakera n’erisondya abahyaka omwa Bema ba Yehova.

Mukyanyikalira erileka ethaba; nabya ingabiribya mukobe wayu. Lyolho-lyolho nabere nganemurwanisya ekitsibu ekyo, munabana ekindi kitsibu. Erileka ethaba mulyaleka ebilo byaghe ebyongerako ebilo 13.6! Ekyo mukyanyighunza amani, kandi mukyanyithwalira hakuhi myaka ikumi erikehya ebilo ebyo. Aliwe ngabya inganasi ngoku eritsira ethaba ky’ekindu ekihikire ekya ngatholere erikolha. Munabera erisaba Yehova, nayu mwanyiha akaghalha k’erisingura.

NGOKU NABIRIGHASIRA: Lino ngawithe amaghalha awuwene. Kandi lino ngatsemera ebyo ngawithe​—singakikwamirira etseme eyithe y’okwenene eya bakabugha ambu wukendi bana omw’ibya n’omubiiri owuwene, ekitsumbi, n’ebindu. Omwakanya k’ekyo, ngabana etseme omw’ibwira abandi oko kwenene ye Biblia. Ekyo kyabirileka ingawathikya abasathu b’okwa bathukakolha nabu eriyiyunga okw’ingye na mwira waghe erikolera Yehova. Ababuthi baghe abanyikulhaya bathe baholha, obuli mughuma munathoka erimubwira oko mulhaghe we Biblia ow’erilhubukira okwa kihugho paradiso.

Eriyithunda hakuhi na Yehova kyabirinyiwathikya erighumira emibere yaghe ey’eriyowa ingabirisighanibwa. Abirileka ingayowa inganawithe ab’okw’ingye omw’inyingirya omw’ihiika ly’ekihugho kyosi ery’abikirirya balikyethu. Omw’ibo, ngawithe abamama, abathatha, baghalha bethu, n’abali bethu.​—Mariko 10:29, 30.

[Ekisasani]

Omwa Bema ba Yehova, nabirikanganibwa olhwanzo lhw’Ekikristayo

[Ekisasani]

Eriramiryo ly’Ekishinto aho nabya ingaramirya