Emisolho​—Wunatholere Erithuhayo?

NI BAKE akanza erithuha emisolho. Abangyi bakayowa bathi esyosente esya bakathuhamo emisolho sikakwira busa, bathi ni bwibi, bathi ni bunyeyi. Aliwe abandi bakaghana eby’erithuha omusolho habw’esyonzira esithatholere esya sikakolesibirawamo. Abikalhani b’omwa tawuni nguma y’omwa Middle Eastern babere bakasoborera ekikaleka ibaghana erithuha emisolho, mubabugha bathi: “Sithwendi thuha esyosente sy’amasasi awakitha abaana bethu.”

Ebinywe ng’ebyo sibiri haali-haali kandi si bihyaka. Omuku Mohandas K. Gandhi oyuwabya musondoli w’Abahindu, mwakangania eriyowa liwe okw’ekyo omo nzira eno: “Oyukasighika Erihanga erimanire okwa musingyi w’eby’amalhwa—mbulha omo nzira eyilhangirikire kutse eyihi—akasangira omo kibi. Obuli mulhume oyukulire kutse omulere akasangira omo kibi ekyo omw’ihayo esyosente esy’erisugha Erihanga eryo akathuha emisolho.”

Kuthya, omufilosofa ow’omwa kighana kye 19 ya Henry David Thoreau mwabugha amalengekania wiwe akalhwira okwa kikaleka iyo iniaghana erithuha emisolho eyikakolesibawa erisighika esyonyuhi. Mwabulya athi: “Mbwino omwikalhani anatholere inialighira oyukahiraho ebilhaghiro erimuthwiramu ebya iyuwene-wene atholere iniayithwiramu erikwamana n’obunyamuthima-thima bwiwe? Neryo kwesi, busana naki obuli mundu awithe obunyamuthima-thima?”

Omwatsi oyu ahambire oko Bakristayo, kundi e Biblia yikakangiriraya ndeke-ndeke yithi batholere ibabya n’obunyamuthima-thima obuhenirye omo myatsi yosi. (2 Timoteo 1:3) Okwa lhundi lhuhandi, kandi e Biblia yikakanganaya ehamuli eyo ab’egavumente bawithe ey’erisorokya emisolho. Yikabugha yithi: “Obuli mundu akenge abathabali b’ekihugho. Kusangwa sihali ehamuli eyithalhua oku Nyamuhanga, n’ab’ehamuli baliho, bahirirweho na Nyamuhanga. Neryo litholere iwakengabo, butsira busana n’erihithana lya Nyamuhanga lisa, nikwa busana n’obunyamuthima-thima bwawu. Kandi busana n’eki mukasolha nibya, kusangwa abathabali ni baghombe ba Nyamuhanga omughulhu bakakolha omubiiri wabo. Mulihe abosi b’eminda yabo, omusolho oko yutholere omusolho.”—Abanya Roma 13:1, 5-7.

Busana n’enzumwa eyi, Abakristayo ab’omwa kighana ky’erimbere ibasibwe ng’abakanguhirawa erithuha emisolho, nomwakine indi esindi sente sy’okwa misolho eyo isikakolesibawa erisighika eby’amalhwa. Kwabine bithya n’okwa Bema ba Yehova abamunabwire. Ni kyahi ekyanga leka Abakristayo ibathuha emisolho kandi iyikakolesibawa okwa bindu ebya bathesighika? Mbwino Omukristayo anatholere iniagheghena obunyamuthima-thima bwiwe ow’omusolho akasabagho?

Emisolho n’Obunya muthima-thima

Ni kwenene, ekitsweka kirebe eky’emisolho eyo Abakristayo ab’omwa kighana ky’erimbere babya bakabwirwa indi bathuhe ikikakolesibawa oko by’amalhwa. Eyi y’enzumwa eyonyine-nyine eyihambire oko bunyamuthima-thima eyaleka ya Gandhi na Thoreau enyuma waho ibaghana erithuha emisolho.

Wibuke Abakristayo mubaghondera ekihano ekiri omwa Abanya Roma sura 13 butsira kundi banza eriyihighulha okw’isuyirwa aliwe busana “n’obunyamuthima-thima” bwabu. (Abanya Roma 13:5) Kwesi, obunyamuthima-thima bw’Omukristayo bukamuyithaghisaya erithuha emisolho, nomuyangabya iyikakolesibawa erisighika emibiiri eyo akaghana. Erithoka eriyitheghererya ndeke omwatsi ow’akabya nga syali hambangana oyu, thutholere ithwaminya ekwenene ngulhu eyihambire oko bunyamuthima-thima, omulenge w’omwakathi owakathubwira emikolere yethu nga yihikire kutse nga yiwire.

Thoreau mwabugha athi, obuli mundu anawithe omulenge w’omwakathi oyo, aliwe si bugha ambu ni w’eriyikethera. Ithwe erithoka eritsemesya Nyamuhanga, obunyamuthima-thima bwethu butholere ibwaghendera okwa bihano biwe. Mughulhu mungyi thukayithagha erihindulha amalengekania wethu nuku ahambane n’awa Nyamuhanga kundi amalengekania wiwe alengire awethu. (Esyonyimbo 19:7) Busana n’ekyo thutholere ithwalengaho eriyitheghererya amalengekania wa Nyamuhanga oko syogavumente sy’abandu. Awithe malengekaniaki?

Thukalhangira ngoku omukwenda Paulo mwahulha esyogavumente sy’abandu mwa “baghombe ba Nyamuhanga.” (Abanya Roma 13:6) Ekyo kikamanyisayaki? Kutsibu-tsibu ekyo kikamanyisaya kithi bakalhangira bathi hakabya obuholho n’erikolha eyindi mibiiri ey’omughaso omwa bulhambu. Nibya n’esyogavumente esirimo obulibathangania bunene mughulhu mungyi sikakolha emibiiri ng’erihikya okwa bandu kw’esyobaruha kutse ebindu byabu, erihiraho amasukuru, eritheya abandu b’okwa muliro, n’erihiraho ebilhaghiro. Nomwakine indi Nyamuhanga anasi ndeke obulemwa bw’esyogavumente sy’abandu, akabalighira eribyaho ahabw’akathuku kandi iniabugha athi thuthuhe emisolho busana n’erisikya endegheka yiwe, ni bugha ambu, iyo erilighira esyogavumente ng’esyo erithabalha abandu.

Aliwe Nyamuhanga erilighira esyogavumente sy’abandu erithabalha ni kya mughulhu muke. N’isonda liwe erisubya omo mwanya w’esyogavumente syosi esyo mw’Obwami bwiwe bw’elhubulha n’erilhangira athi akaghunzaho ebyosi ebithuwene ebyo erithabalha ly’esyogavumente sy’abandu syabiriletha oko bandu ahabw’emyaka mingyi. (Danieli 2:44; Matayo 6:10) Aliwe thunalindire ekyo, Nyamuhanga syali athahamulha Abakristayo erisangira omw’ithendi ghondera ebilhaghiro omw’ighana erithuha emisolho kutse erilhabira omo sindi nzira.

Aliwe ibbwa nga Gandhi, wanga kolhaki wamabya iwukinayowa wuthi erithuha emisolho eyikasighika esyonyuhi ni kibi? Ngoku thukanalhangira ndeke omwanya mulebe thukahethukira ahayisumbire, thwanganongera erihindulha amalengekania wethu nuku ahambane n’awa Nyamuhanga omw’iminya ngoku amalengekania wiwe alengire awethu. Erilhabira omu muminyereri Isaya, Nyamuhanga mwabugha athi: “Ngoku olhubulha lhuli endatha haali oko kihugho, esyonzira syaghe ko siri sithya endatha oko syonzira syenyu, n’amalengekania waghe alengire amalengekania wenyu.”—Isaya 55:8, 9.

Obuthoki Obwosi?

Engangirirya ye Biblia ey’erithuha emisolho siyirimanyisaya yithi esyogavumente sy’abandu syangana bugha sithi siwithe obuthoki bwosi okwa bandu basyo. Yesu mwakangirirya athi Nyamuhanga akaha esyogavumente esyo sy’obuthoki bulebe buyira. Yesu abere akabulibwa nga kinatholere embere sya Nyamuhanga erithuha emisolho oko gavumente ye Roma eyabya yikathabalha okwa buthuku obo, mwasubirya omwa binywe bino athi: “Mulihe Kaisari ebindu bya Kaisari, mulihe na Nyamuhanga ebindu bya Nyamuhanga.”—Mariko 12:13-17.

Esyogavumente—esikimanira “Kaisari”—sikakolha esyosente kandi sikawathikaya erihiraho obughuli bw’esyosente. Neryo oko malengekania wa Nyamuhanga, esyogavumente siwithe obughabe bw’erisaba esyosente esyo omwa mulingo w’erithuha emisolho. Aliwe, Yesu mwakangania athi “ebindu bya Nyamuhanga”—engebe yethu n’eriramya lyethu—sihali egavumente yosi-yosi y’abandu eyanga bugha yithi ni byayo. Omughulhu ebilhaghiro by’abandu bikaghana erihambangana n’ebihano bya Nyamuhanga, Abakristayo ‘batholere ibakenga Nyamuhanga kwilhaba abandu.’—Emibiri 5:29.

Munabwire Abakristayo bangana yowa nabi busana n’emibere eyo emisolho yikakolesibawamo, aliwe sibali thahirira emikolere y’egavumente omw’ighanayo kutse erighana erithuha emisolho. Ekyo ikikendi kangania erithendi yikethera ngoku Nyamuhanga yukendi syaghunzaho ebitsibu by’abandu. Omwakanya k’ekyo, omw’ighumisirizya bakalinda endambi eyo Nyamuhanga abirihiraho erighunzaho esyogavumente sy’abandu erilhabira omw’ithabalha lya Mughalha wiwe, Yesu, oyuwabugha athi: “Obwami bwaghe si bw’ekihugho kino.”—Yoane 18:36.

Emighaso y’Erighendera oko Ngangirirya ye Biblia

Wanganabana emighaso mingyi omw’ighendera okwa ngangirirya ye Biblia eyihambire okw’ithuha emisolho. Iwukendi yibalya okw’isuyira eryabirihirwaho busana n’abakathwa ebilhaghiro kuthya n’okw’isagha erihambwa. (Abanya Roma 13:3-5) Ekikulhu kutsibu, iwukendibya n’obunyamuthima-thima obuwene embere sya Nyamuhanga kandi iwamusikya omw’ibya n’omubere w’erighendera okwa bilhaghiro. Nomwakine indi wanganaherya esyosente sirebe kwilhaba abakaghana erithuha emisolho kutse nibya abak’iba okwa misolho eyabu, iwangana yikethera omulhaghe wa Nyamuhanga ow’eritsomana abaghombe biwe abathaleghulha. Omuhandiki we Biblia ya Dawudi mwakibughako omo nzira eno: “Indi mukulhu lino, sinyikiri mulere, nikwa sindithalhangira Omukama akasighania omundu muthunganene, kandi sindithalhangira abaana biwe bakasaba-saba akalyo.”—Esyonyimbo 37:25.

Erighunzerera, eriyitheghererya n’erighendera okwa kihano kye Biblia eky’erithuha emisolho kikendi leka iwathekana omo bulengekania. Nyamuhanga syali bugha athi wuliko olhubanza busana n’emibere esyogavumente sikakoleserayamo emisolho eyo wukathuha, ngoku ekilhaghiro sikiribugha kithi wuliko olhubanza busana n’emibere omwinye nyumba eya wukapangisaya akakoleserayamo esyosente esyo wukamuthuha. Omulhume oyukahulhawamo Stelvio abere athal’igha ekwenene ye Biblia ahabw’emyaka iniakalengekanaya athi angana hindulha eby’epolitiki ebye southern Europe. Akasoborera ekyaleka iniabikyako, mwabugha athi: “Munaligha ngoku omundu syanga thoka erilethaho obulingirirania, obuholho, n’obughuma omo kihugho. Obwami bwa Nyamuhanga busa bw’obwanga lethaho embinduka n’eryuwania ekihugho.”

Nga Stelvio, buthaleghulha ‘wamaliha Nyamuhanga ebindu bya Nyamuhanga,’ nawu iwanganabya n’eriyikethera eryo. Iwukendi syalhangira obuthuku Nyamuhanga akendi syaletha oko kihugho kyosi kw’erithabalha erithunganene, erighunzaho ebitsibu n’obuthe bulingirirania obwa obuthabali bw’abandu bwabiriletha.

[Eblabbu]

Thutholere ithwahindulha amalengekania wethu nuku ahambane n’awa Nyamuhanga kundi awiwe alengire awethu

[Eblabbu]

Omw’ithuha emisolho ahathe erikakwa, Abakristayo bakabya n’obunyamuthima-thima obuwene embere sya Nyamuhanga kandi ibakangania ku bakamuyikethera eribaha ebiyithawa byabu

[Ebisasani]

“Mulihe Kaisari ebindu bya Kaisari, mulihe na Nyamuhanga ebindu bya Nyamuhanga”

Copyright British Museum