E Biblia Yikahindulha Esyongebe

NI KYAHI ekyawathikaya oyuwabya akasatha emisathu y’erisathira esyosente kandi omwibi erileka emibere eyabya eyabirimukaghathiramo eyi n’erihindulha engebe yiwe? Minya aby’akabugha.

“Inganzire Kutsibu Amalingwatha w’Erighenda Okwa Syosabayiri.”​—RICHARD STEWART

ABUTHAWA: 1965

EWABU: JAMAICA

EBY’ENYUMA: ABYA AKASATHA EMISATHU Y’ERISATHIRA ESYOSENTE KANDI INI NGOLI Y’EBIBI

ENGEBE YAGHE ENYUMA: Nakulira omwa kitsweka ekiri mw’obunakwa n’abandu banene e Kingston, omuyi mukulhu we Jamaica. Abandu bangyi isibawithe emibiiri, n’obubi ibuli ehosi-hosi. Ebigurupu by’abayaya ibikaleka abandu ibyabya omwa buba. Hakuhi obuli kiro iningowa amasasi akabugha.

Mama waghe omukoli w’omuhwa iniakakolha ngoku angathoka busana naghe na busana na mughalha wethu na mwali wethu abalere baghe. Mwalhangira athi thukathunga ekisomo ekyuwene eky’amenge. Isinganzire esukuru ya kutsibu, aliwe inganzire kutsibu amalingwatha w’erighenda okwa syosabayiri. Iningusa okwa sukuru neryo inaghenda omwa kibugha ekikabyamo amalingwatha w’esyosabayiri. Nibya iningaghendaya esyosabayiri.

Buthuku buke-buke munayihwerya omw’isatha omusathu w’erisathira esyosente esyamalingwatha w’esyosabayiri. Munabya omwa ngebe y’obutswatswa, isindilhabaya sikati. Iningalya amayirungyi kandi ining’iba nuku ngathoke engebe yaghe eyo. Ingawithe esyombundu nene, aliwe ngasima kundi sihali n’omundu n’omughuma oyuwakwa omwa by’obwibi ebyo nabya ingasangiramu.

Erighunzerera, epolisi muyanyihamba n’erinyihira omwa ngomo busana n’obubi bwaghe. Nabere nabiriboholhwa, munalhuaho ingalholha embere n’engebe yaghe. Erithwalira haghuma, munabya mubi kutsibu kwilhaba ngoku nabya. Nomwakine indi okwa busu iningalhangirika nga ngali mwolho, isindi habulika, ingahithana lhuba-lhuba, kandi ingali mutsururu. Isindi tsomana mundu aliwe ingayitsomene ingyuwene.

NGOKU E BIBLIA YAHINDULHA ENGEBE YAGHE: Omwa buthuku obukalire obu obw’engebe yaghe, mama waghe mw’igha e Biblia neryo amabya Mwema wa Yehova. Munalhangira inialikukolha esyombinduka esyuwene omwa mibere yiwe neryo kyamanyihambako. Munanza eriminya ekyamaleka mama waghe iniahinduka, neryo munatsuka erigha e Biblia n’Abema ba Yehova.

Munaminya ngoku esyongangirirya sy’Abema ba Yehova siri mbaghane okwa sy’esindi dini kandi munabumbura ngoku obuli kindu ekyo Abema bakabugha kiseghemere okwa Biblia. Y’eyabya gurupu nyisa eyo nabya ngasi ng’eyikathulira nyumba okwa nyumba ngoku Abakristayo abakera bakolha. (Matayo 28:19; Emibiri 20:20) Munaligha ngoku nabiribana edini y’okwenene ingalhangira olhwanzo lhw’okwenene olhwa bawithirene.—Yoane 13:35.

Busana n’ebyo n’igha omwa Biblia, munalhangira ekiyithawa ky’erikolha esyombinduka ndebe nene-nene omwa ngebe yaghe. Munaminya ngoku Yehova Nyamuhanga aponire obusingiri kandi ngoku namabya w’erimutsemesya, ngatholere ingaleka emitse mibi eyikatsandaya omubiri waghe. (2 Abanya Korinto 7:1; Abaebrania 13:4) Munatsema ingaminya ngoku Yehova awithe eriyowa kandi ngoku ebyanga kolha byangana muponesya kutse ibyamutsemesya. (Emisyo 27:11) Neryo munathwamu erileka erirya amayirungyi, erisighania esyombundu syaghe, n’erilengaho eryuwania emibere yaghe. Okwa syombinduka esyanyikalira kutsibu erikolha lyabya iry’erileka engebe yaghe y’obutswatswa n’erileka erisatha emisathu y’erisathira esyosente.

Okw’itsuka mundanza abanywani baghe bakaminya ku nganemw’igha e Biblia n’Abema ba Yehova. Aliwe emyatsi muyahinduka nabirisoma Matayo 10:33, ahali ebinywe bya Yesu bino: “Oyukanyighana embere sy’abandu, neryo naghe nibya nasyamughana embere sya Thatha waghe oyuli elhubulha.” Ebinywe ebyo mubyaleka ingabwira banywani baghe ngoku ngalhue inganemw’igha n’Abema. Mubasweka. Isibanga lengekania bathi omundu ng’ingye angananza eribya Mukristayo. Aliwe munababwira indi singakyanzire erikolha ekyosi-kyosi ekihambire okwa ngebe yaghe ya kera.

NGOKU NABIRIGHASIRWA: Mama waghe mwatsema kutsibu akalhangira ingatsuka erighendera okwa misingyi ye Biblia. Lino syakiyilhalikirira athi nanganabya inganemukolha ebindu bibi. Thukakanaya okwa bughuma obwa thuwithe ithwe bosi—olhwanzo olhwa thuwithire Yehova. Hakanayira ingalengekania okwa ngebe yaghe ya kera, ingasangalha ingalhangira ngoku Nyamuhanga mwanyithokesya erikolha esyombinduka. Singakiyisunza engebe y’obutswatswa, ey’erianza ebindu bya kutsibu eyo nabyamo.

Kunathaligha omwatsi we Biblia, lino nangabere obundi ngabiriholha kutse ingane omwa ngomo. Aliwe lino, ngawithe eka eyuwene kandi eyitsemire. Kikanyitsemesaya kutsibu erikolera Yehova Nyamuhanga ingane haghuma na mukali waghe oyukanyisighika kuthya na mwali waghe omwowa. Ngasima Yehova busana n’erinyilighira eribya w’okwa lhughanda lhw’abalikyethu olhw’Abakristayo ab’olhwanzo. Ngasima kutsibu kundi omundu mulebe mwahiraho akaghalha erinyikangirirya ekwenene ye Biblia. Kandi ngalhangira ehighisa ehyo ngawithe ehy’eriwathikya abandi erigha ebye Biblia yikakangiriraya mwa hy’obughuli. Kutsibu-tsibu ngasima Yehova Nyamuhanga busana n’olhwanzo lhwiwe lhunene olhw’erinyiletha okw’iyo.

[Eblabbu]

“Mun’igha ngoku Yehova awithe eriyowa kandi ngoku ebyanga kolha byangana muponesya kutse ibyamutsemesya”

[Eblabbu]

Ingane na mukali waghe na mwali waghe

[Ekisasani]

Munalhangira mama waghe inialikukolha esyombinduka esyuwene omwa mibere yiwe