E Biblia Yikahindulha Esyongebe

OMULHWANA oyuwabana ebitsibu ebikalire iniakine mulere mwabana athi ekighendererwa omwa ngebe? Ni kyahi ekyaleka omurebbo oyutsurumire ow’eby’ekipolitiki iniabya muthuli w’engulhu yuwene ey’obuholho? Soma emyatsi eno eribana eby’erisubirya.

“Munanza kutsibu erikanganibwa olhwanzo n’olhukeri.”​—INNA LEZHNINA

ABUTHAWA: 1981

EWABU: RUSSIA

EBIMUHAMBIREKO: MWABANA EBITSIBU EBIKALIRE OMO BWANA

ENGEBE YAGHE ENYUMA: Nabuthawa mwa mutsiha n’ababuthi baghe babya batsiha. Emyaka yaghe mukagha ey’erimbere-mbere yabya yuwene. Neryo ababuthi baghe mubakomolhana. Nomwakine indi nabya ingakine mulere kutsibu, munaminya erikomolha nga likamanyisayaki, kandi mulyanyaghalya kutsibu omwa muthima. Babere babirikomolhana, thatha waghe na mughalha wethu omukulhu mubayikalha e Troitsk, na mama waghe amaghenda e Chelyabinsk kandi mwaghenda naghe. Endambi muyahika amathasyathahibwa. Thatha waghe owundi oyo ini munywi w’obwabu, kandi mughulhu wosi iniakaswiraya mama kuthya naghe.

Omwa 1993, mukulhu waghe oyo nabya nganzire kutsibu mwasomera omwa lhusi n’eriholha. Olhuholho lhwiwe mulhwasisirya obuli mundu omw’eka. Mama waghe nayu mwatsuka erinywa, kandi mwayiyunga oko mwira wiwe erinyikolha nabi. Munatsuka erisondekania engebe eyuwene. Munanza kutsibu erikanganibwa olhwanzo n’olhukeri. Munatsuka erighenda omwa bisomo muthina-muthina ingasondya erihumulikanibwa, aliwe mungathalibana.

NGOKU E BIBLIA YAHINDULHA ENGEBE YAGHE: Ingane w’emyaka 13, oyo ngasoma nayu, oyuwabya Mwema wa Yehova, iniakabya inianemumbwira esyongano ndebe sye Biblia. Iningatsema erigha okwa bakanibweko omwa Biblia nga Noa na Yobu, abakolera Nyamuhanga nomuhanabya emibere eyikalire. Buthuku buke-buke nabya ingali kw’igha e Biblia n’Abema ba Yehova n’eritsuka erihindana okwa mihindano yabu.

Erigha e Biblia mukyaleka ingaminya ekwenene nyingyi eyuwene. Munatsema ingaminya ngoku Nyamuhanga anawithe erina. (Esyonyimbo 83:18, NWT) Mukyanyitsemesya ingalhangira ngoku e Biblia muyalhaghulha ndeke-ndeke emibere eyangabere omwa “biro by’enyuma-nyuma.” (2 Timoteo 3:1-5) Kandi mukyanyisisimulha eriminya amaha w’erilhubuka. Nawu thakilengekaniako​—Ngendi syalholha oko mughalha wethu kandi!​—Yoane 5:28, 29.

Aliwe si buli mundu indi mwasima etseme yaghe mbyaka eyo nabya inamabiribana. Mama waghe na mwira wiwe ibaponire kutsibu Abema ba Yehova. Mubalengaho erinyilemesya erigha e Biblia. Aliwe munanza ebyo nabya ing’igha, neryo munathwamu erithendi bikyako.

Sikyabya kyolho erighumira erihakanisya ly’abahughu. Ekindi kitsibu mukyasa omughulhu omulere waghe ow’obulhume oyuwabya inialikunyikwama okwa mihindano y’Abema ba Yehova nayu akaholera omwa maghetse. Nomwabine, Abema ibakabya ibane haghuma naghe. Omw’ibo, munabana olhwanzo n’olhukeri ebyo nabya ingabirisondya omwa ngebe yaghe yosi. Munaminya ngoku eyi yitholere eribya iy’edini ey’okwenene. Omwa 1996, munabatizibwa ng’Omwema wa Yehova.

NGOKU NABIRIGHASIRWA: Ahabw’emyaka mukagha eyihwere, ngabiribya ingane omwa butheke bwaghe kandi nabiribana omulhume oyuwene oyukahulhawamo Dmitry. Ingye thunayu thunemukolera okwa kyaghanda ky’omuthahulha eky’Abema ba Yehova e St. Petersburg. Endambi muyahika amalengekania w’ababuthi baghe okw’ikirirya lyaghe amahinduka.

Ngatsemire kutse busana n’eriminya Yehova! Erimukolera kyabirinyiha engebe eyiwithe ekighendererwa.

“Nabya Ngwithe Ebibulyo Bingyi Ebikanyilyambaya.”​—RAUDEL RODRÍGUEZ RODRÍGUEZ

ABUTHAWA: 1959

EWABU: CUBA

EBIMUHAMBIREKO: OMUREBBO W’EBY’EKIPOLITIKI

ENGEBE YAGHE ENYUMA: Nabuthawa e Havana, Cuba, kandi nakulira omwa butaka obuli mw’obunakwa kandi eyo omwa syombalhu sy’omuyi iyikabera eribya amalhwa. Nabere nganemukulha, munanza omusathu we judo n’eyindi misathu ey’amalhwa.

Ingali mugezi omwa sukuru, neryo ababuthi baghe mubanyihira mw’omuhwa w’erighenda okwa yunivasite. Ingane eyo munatsuka eriyowa indi eby’ekipolitiki eby’ewethu bitholere ibyahinduka. Munathwamu eribya murebbo. Ingye n’oyongasoma nayu muthwathahirira omupolisi, ithunawithe amaha w’erimw’ihako embundu yiwe. Omwa malhwa ayo muthwahuthalya omupolisi oyo ya kutsibu okwa muthwe. Ingye n’oyo nabya ingasoma nayu muthwabohwa kandi muthwatswerwa olhw’erikwa kandi egurupu y’abasirikali y’eyanga thulhasire. Ngabya w’emyaka 20 buyira, aliwe nabya iningayaholha!

Ingane omwa ngomo omwa mbwera, munayibegheresya ngoku ngendi yithwa bakanyilhasa omwa masasi. Mungathanza erikwa obuba bwosi-bwosi. Aliwe kandi, munayibulya bibulyo binene. Munayibulya indi: ‘Busana naki omwa kihugho muli obuthe bulingirirania bungyi? Mbwino eyi yana ngebe nyisa thuwithe?’

NGOKU E BIBLIA YAHINDULHA ENGEBE YAGHE: Erighunzerera olhubanza lhwethu olhw’eritswerwa olhw’erikwa mulhwahinduka bamathutswera myaka 30 omwa ngomo. Ibbwa aho hangabanira abaghuma b’okwa Bema ba Yehova ababya omwa ngomo busana n’erikirirya lyabu. Munanza obuthubaha bw’Abema aliwe kandi omwa mibere eyithekene. Nomwakine indi mubahirwa omwa ngomo okwa by’amabehi, sibabya bahithene kutse erikwa ekinigha.

Abema mubanyikangirirya bathi Nyamuhanga anawithire abandu b’ekighendererwa. Mubanyikangania omwa Biblia ngoku akendi hindulha ekihugho mw’eparadiso eyithemo esyongoli sy’ebibi n’obuthe bulingirirania. Mubanyikangirirya bathi ekihugho kikendi syabyamo abandu babuya, abakendi syathunga akaghisa k’eribyaho kera na kera omwa mibere eyihikene.​—Esyonyimbo 37:29.

Munanza ebyo Bema banyikangiriraya, aliwe emibere yaghe iyiri mbaghane okwa yabu. Munalengekania indi kyanga nyikalire eribya butsira lhuhandi kutse erihiraho erind’ithema ingaswiribwa. Neryo munathwamu eriyisomera e Biblia ahabwaghe. Nabere ingaghunza, munaminya ngoku Abema ba Yehova b’abandu basa abakakolha ng’Abakristayo abakera.

Busana n’erisoma e Biblia, munaminya ngoku ngatholere ingakolha esyombinduka esikalha-kalire omwa ngebe. Ng’eky’erileberyako, munaminya ku ngatholere inga hindulha emibughire yaghe, kundi ingabeghere eribugha ebinywe ebithuwene. Kandi munayithagha erileka erinywa ethaba. Kandi munabya ingatholere erileka eribya na lhuhandi omwa by’ekipolitiki. Sikyabya kyolho erikolha esyombinduka esi, aliwe omwa buwathikya bwa Yehova, lyolho-lyolho munathoka.

Ekighuma ky’okwa bya nyikalira lyabya ery’erikakirya ekinigha kyaghe. Ngakinalholha embere erisaba omubere w’eriyikakirya omw’eki. Amasako ng’erya Emisyo 16:32 abirinyiwathikya, ahakabugha hathi: “Oyukayibombeka okw’ihithana uwene kwilhaba ab’obuthoki; n’oyukathabalira ekirimu kiwe uwene kwilhaba oyukahunga omuyi.”

Omwa 1991, munabatizibwa ng’Omwema wa Yehova. Munabatizibwa omwa dramu y’amaghetse ingane omwa ngomo. Omwaka owakwamako, abaghuma b’okw’ithwe muthwaboholhwa n’erithwalhwa e Spain. Nabere inganahika e Spain, munalhuaho ingatsukiraho erihindana okwa mihindano y’Abema ba Yehova. Abema ab’eyo mubanyithangirira ndeke ng’oyo banabere nabu habw’emyaka, kandi mubangwathikya eritsuka engebe yaghe mbyaka.

NGOKU NABIRIGHASIRWA: Ngali mulhume oyutsemire, ingye na mukali waghe haghuma n’abali baghe thunemukolera Nyamuhanga. Ngwithe olhusunzo lhw’erikolesya obuthuku bwaghe bunene eriwathikya abandi erigha e Biblia. Hakanayira ingasubya ameso w’enyuma inayilhangira ingakine mulhwana ingay’ithibawa, neryo ngasima kutsibu erithabya ingakineho. Siry’erithabyaho lisa aliwe kandi ngawithe n’amaha. Ngalindirire kutsibu e Paradiso eyalhaghanisibawa​—obuthuku omughulhu hakendi syabya obulingirirania kandi “olhuholho silhwendi syaswabyaho.”—Eribisulirwa 21:3, 4.

[Eblabbu]

“Munatsema ingaminya ngoku Nyamuhanga anawithe erina”

[Ekisasani]

Ingye na mwira waghe thunemutsemira eryeghesya abatsiha omw’ikolesya ebitabu by’omubughe w’abatsiha