“Engulhu Yuwene y’Obwami eyi Yasyatsuka Erithulhughanibwa”

“Engulhu yuwene y’obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.”​—MATAYO 24:14.

Ekya Kikamanyisaya: Omuhandiki w’Enjiri ya Luka mwabugha athi Yesu “mwatsuka erilhaba ehosi omwa miyi n’omwa hiyi, iniakathulhughanaya engulhu yuwene n’erithulha omwatsi w’obwami bwa Nyamuhanga.” (Luka 8:1) Yesu iyuwene-wene mwabugha athi: “Litholere inathulha engulhu yuwene y’obwami bwa Nyamuhanga oko yindi miyi nibya, kusangwa Nyamuhanga mwanyithuma erikolha omwatsi oyu.” (Luka 4:43) Yesu mwathuma abigha biwe erithulha engulhu yuwene omwa syotawuni n’omwa byalu n’enyuma waho mwabalhaghira athi: “Mwasyabya bathuli b’omwatsi waghe . . . erihika okwa nduli-nduli sy’ekihugho.”​—Emibiri 1:8; Luka 10:1.

Ngoku Abakristayo ab’Erimbere Bakolha Eki: Abigha ba Yesu mubathatsandya obuthuku bakakolha ebya Yesu ababwira. “Ebiro byosi, omwa Hekalu n’omw’amanyumba w’abandu, mubathumbya erikangirirya n’erithulha engulhu yuwene ya Yesu kw’ali Kristo.” (Emibiri 5:42) Erithulira isi ry’abasomire basa. Oyusomire ebyakera ya Neander mwabugha athi “Celsus, omuhandiki w’erimbere erikania nabi okwa Kikristayo mwasekerera eky’eribugha indi abathwi b’obweya, abasoni b’esyongetha, abakakokothaya esyongobi, abathasomire n’abandu ababulikiro, bo babya bathuliri b’omuhwa ab’enjiri.” Omwa kitabu kiwe The Early Centuries of the Church, ya Jean Bernardi mwahandika athi: “[Abakristayo] babya b’erighenda ehosi-hosi eriyakania n’obuli mundu. Okwa syonzira n’omwa syotawuni, omo bibugha n’omwa miyi y’abandu. Mbulha bamangirirwa kutse eyihi. . . . Ibakathulira omo kihugho kyosi.”

NI Bahi Abakakolha eki Munabwire? “Ekanisa erilemwa erilhangira erithulira n’erikangirirya mwa mwatsi mukulhu ni nzumwa nguma eyabirileka abandu munabwire ibatseka bunyakirimu,” David Watson, omurevurandi w’ekipira kw’ahandika athya. Omwa kitabu kiwe Why Are the Catholics Leaving? José Luis Pérez Guadalupe mwahandika okwa mibiiri y’Abapira, Abaduvente, n’abandi neryo amalhangira ngoku “sibali ghenda nyumba okwa nyumba.” Akakania okwa Bema ba Yehova, mwahandika athi: “Bakaghenda mughulhu wosi nyumba okwa nyumba.”

Ekikaswekaya kandi ekihikire ekyo Jonathan Turley abana kine omwa Cato Supreme Court Review, 2001-2002: “Omundu amahulha Abema ba Yehova, abandu bangyi bakalhuaho ibalengekania okwa bathuliri abakabungira okwa miyi y’abandu okwa ndambi eyithatholere. Abema ba Yehova erighenda nyumba okwa nyumba si bugha ambu bali okw’ikwama kya kulha-kulhania erikirirya lyabu aliwe bakahimbalyo.”

[Akasanduko]

Wanamalhangira Ebikaminyikalhaya Abakristayo b’Okwenene?

Erikwamana n’Amasako awakanibweko omo myatsi eyi, ni bahi munabwire abo wukalengekanaya wuthi ba Bakristayo ab’okwenene? Nomwakine indi hali esyongumi sy’amadini awakabugha athi ni Bakristayo, wibuke ngoku Yesu mwabwira abigha biwe athi: “Si y’omundu oyukanyahulha athi, Mukama, Mukama, yuwasyingira omo Bwami bw’elhubulha; nikwa yo n’oyukakolha erisonda lya Thatha waghe oyuli elhubulha.” (Matayo 7:21) Eriminyerera abakakolha erisonda lya Thatha​—ni bugha ambu Abakristayo ab’okwenene—​n’eribya mughuma w’okw’ibo kyangana kolya okwa mighisa eya kera na kera omw’isi sy’Obwami bwa Nyamuhanga. Thukakukokaya erisaba Abema ba Yehova wuthi bakubwire emyatsi mingyi eyihambire oko Bwami bwa Nyamuhanga n’emighisa eyo bukendi syaletha.​—Luka 4:43.