Mbwino Abosi Abakayahulhamo “Abakristayo” Nina Bakristayo?

HALI Bakristayo bangahi? Erikwamana n’ekitabu Atlas of Global Christianity, omwa 2010 habya hakuhi esyobbiliyoni 2.3 omwa kihugho kyosi. Aliwe kandi ekitabu ikyan’ekyo mukyakangania ngoku Abakristayo abo balhuire omwa madini awalhabire oku 41,000​—obuli nguma yiwithe esyonyikirirya n’ebilhaghiro byayu. Kundi hali dini nyingyi esikayahulhamo “Abakristayo,” kikatabura abandi kutse nibya ibabulha eky’erihikako. Ibangana yibulya, ‘Mbwino abosi abakayahulhamu Abakristayo nina Bakristayo ab’okwenene?’

Leka thuthakilengekaniako omwa nzira eno. Mughulhu mungyi oyukaghenda omwa kindi kihugho akasabawa eribugha nga ni ndulhani ya hayi akahika okwa muthanu. Kandi atholere iniakangania eky’akabugha omw’ihulhukya ebisakango ebikamuminyikalhaya, obundi ng’epasipoti. Kuthya, Omukristayo w’okwenene atholere iniakolha ekilengire eribugha athi ikirirye omu Kristo. Atholere iniabya inianawithe ebindi ebikamuminyikalhaya. Ebyo byangabya iby’ebyahi?

Ekinywe “Abakristayo” kyatsuka erikolesibwa buthuku bulebe enyuma w’omwaka wa 44 E.K. Oyuwasi ebya kera ebye Biblia ya Luka mwabugha athi: “E Antiokia yo abigha batsukira eriahulhwa mo Bakristo.” (Emibiri 11:26) Wuminye ngoku ababya bakahulhwamo Abakristayo babya bigha ba Kristo. Ni kyahi ekikakolha omundu mw’omwigha wa Kristo? E New International Dictionary of New Testament Theology yikasoborera yithi: “Erikwama Yesu ng’omwigha kikamanyisaya kithi [omundu] abiriyihayo ahatheki naki . . . omwa engebe yiwe yosi.” Kwesi, Omukristayo w’okwenene, y’omundu oyukakwama esyongangirirya n’obusondoli bwa Yesu, Oyuwatsukisaya Ekikristayo, iyowosi kandi ahatheki naki.

Mbwino kinathokekene eribana abandu ng’abo omwa bandu bangyi abakabugha bathi ni Bakristayo? Ni byahi ebya Yesu iyuwene-wene abugha athi byanga minyikerye abigha biwe b’okwenene? Thukakukokaya erilebya ngoku e Biblia yikasubiraya ebibulyo ebi. Omo myatsi eyikakwamako, thukendi lebya ebindu bithanu ebya Yesu abugha ebikakanganaya abigha biwe ab’okwenene n’erithuwathikya eribaminyerera. Thukendi lebya ngoku Abakristayo b’omwa kighana ky’erimbere bakanganaya ebindu ebyo. Kandi thukendi lengaho eriminya nga ni bahi omwa bakayahulhamo Abakristayo munabwire abakaberereraya ebyo.