“Mwanzane”

“Ngabaha ekihano kihya-kihya nyithi, mwanzane. Ngoku nabiribanza, nenyu mwanzane muthya. Neryo mwamabya n’olhwanzo, omughuma busana n’owundi, abandu abosi basyaminya ko muli bigha baghe.”​—YOANE 13:34, 35.

Ekya Kikamanyisaya: Kristo mwabwira abigha athi banzane ngoku abanza. Yesu mwabanza athi? Mwanza ebihanda byosi n’abandu bosi ab’omwa buthuku bwiwe. (Yoane 4:7-10) Olhwanzo ilhukaleka Yesu iniakolesya endambi, akaghalha kiwe, n’eriyithalya okwa bindi nuku awathikaye abandi. (Mariko 6:30-34) Erighunzerera, Kristo mwakangania kutsibu olhwanzo omwa nzira ngulhu eyilengire. Mwabugha athi, “Ingye indi mulisya oyuwene. Omulisya oyuwene akasigha engebe yiwe busana n’syombuli.”​—Yoane 10:11.

Ngoku Abakristayo ab’Erimbere Bakolha Eki: Omo kighana ky’erimbere, Abakristayo ibakabirikirana mwa “mulikyethu.” (Filemono 1, 2) Abandu erilhua omo bihanda byosi ibakathangirirawa omwa kithunga ky’Ekikristayo, kundi ibikirirye bathi “sihali erisombolha busana n’abandu bosi, kutse Omuyuda, kutse omundu w’ebihanda. Kusangwa Nyamuhanga ni Mukama w’abandu bosi.” (Abanya Roma 10:11, 12) Enyuma we Pentekote 33 E.K., abigha e Yerusalemu “mubaghulya esyombibi syabu n’ebindu byabu, ibakasangira ebindu byosi ebyo n’abandi bosi, ng’obwagha bw’obuli mundu.” Busana naki? Nuku abigha abahyaka basighale e Yerusalemu n’erilholha embere ‘erigha erikangirirya ly’abakwenda.’ (Emibiri 2:41-45) Ni kyahi ekyaleka ibakolha ekyo? Myaka mike oku 200 abakwenda baliholire, Tertullian mwasuba omo by’abandi babugha okwa Bakristayo athi: “Banzene . . . kandi bakabya ibanayitheghekire eriholera abandi.”

Ni Bahi Abakakolha eki Munabwire? Ekitabu The History of the Decline and Fall of the Roman Empire (1837) mukyabugha kithi ahabw’ebighana bingyi ababya bakabugha bathi ni Bakristayo “babiriletherana ebitsibu ebikalire, kwilhaba ebyo babya bakabana erilhua okwa bathikirirye.” Erisekulya erya lino-lino erye Amerika mulyabugha lithi abangyi abakayahulhamo Bakristayo bawithe akasolholho k’esyonganda. Abanya dini omwa kihugho kighuma bakabya mbaghane okwa banya dini ab’omwa kindi kihugho kandi sibali wathikaya abikirirya balikyabo omughulhu hali obuyithawa.

Omo 2004, e Florida yalilhabire ebiyagha bbini omo myezi ibiri, omwimaniri w’ekomiti eyikakolha okwa bikawa kitsumbukirania owe Florida (Emergency Operations Committee) mwalebya ndeke erilhangira athi ebindu byabu eby’eriwathikyamo bikakolesibawa ndeke. Mwabugha athi sihali egurupu eyiyithondekenie ng’Abema ba Yehova, kandi mwabugha athi akendihayo obuwathikya bwosi-bwosi obwa Bema ba Yehova bakayithagha. Okw’itsuka erya 1997, etimu y’Abema ba Yehova abakawathikaya ahawire ebitsinduli ababya n’emibatsi, ebyalya, n’esyongyimba mubaghenda e Democratic Republic of Congo eriyawathikya Abakristayo balikyabo n’abandi abali n’obuyithawa. Abema abe Yuropu babya ibabirihayo obuwathikya obwingene n’esyodola miliyoni nguma (U.S.).