E Biblia Yikahindulha Esyongebe

NI KYAHI ekyaleka omulhume iniasuba omwa dini eyo akuliramu eyo abya iniabirisighania? Omulhwana mwabana athi oyuwabya abere nga thatha wiwe oyo abya iniabirikandira kutsibu omwa ngebe yiwe yosi? Minya ebyo abandu aba bakabugha.

“Munayithagha erisuba oku Yehova.”​—ELIE KHALIL

ABUTHAWA: 1976

EWABU: CYPRUS

EBY’ENYUMA: OMWANA OYUWATSAHA

ENGEBE YAGHE ENYUMA: Nabuthirawa e Cyprus aliwe munakulira e Australia. Ababuthi baghe ni Bema ba Yehova, kandi mubakolha ekyo banga thoka erinyikangirirya erianza Yehova n’Ekinywe kiwe, e Biblia. Aliwe omwa myaka yaghe y’obulengwa, munatsuka eriyisamambulha. Iningatswa omwa nyumba omwa kiro eriya eyiri abandi balengwa. Muthw’iba esyomatoka kandi muthwayingirya n’omwa bindi bitsibu bingyi.

Okw’itsuka, iningakolha ebindu ebyo bya bubiso-biso, ingasagha eriponesya ababuthi baghe. Aliwe, lyolho-lyolho obuba obo mubwahwa. Munanywana abandu abakulire kutsibu okw’ingye ababya isibanzire Yehova, kandi mubanyihambako nabi. Erighunzerera munabwira ababuthi baghe indi singakyanzire eribya w’okwa dini yabu. Omw’ighumisirizya mubalengaho erinyiwathikya, aliwe munaghana obuwathikya bwabu obwosi bw’erinyikangirirya erianza Yehova. Ababuthi baghe mubabbunika muthima.

Nabere nabirilhua eka, munatsuka erilengesya ebibatsi ebikathamiraya, nibya iningahera n’erighulya amarijuana omwa bungyi. Munabya omwa ngebe y’obutswatswa kandi iningaghunza buthuku bunene omwa bididi omwa syoklabu. Kandi munatsuka eribya ingahithana lhuba-lhuba. Omundu iniamakolha kutse eribugha ekindu ekya ngathalhue nganzire, iningahithana kutsibu, mughulhu mungyi iningatoka n’abandu n’eribaswirya. Erithwalira haghuma, munakolha ebyosi ebyo babya babirinyikangirirya bathi isinakolha ingye ng’Omukrisitayo.

NGOKU E BIBLIA YAHINDULHA ENGEBE YAGHE: Munatsukisya obunywani bw’ahakuhi n’omughuma w’okw’abathwabya thukanywa nabu ebibatsi ebikathamiraya oyo thatha wiwe aholha iniakine mulere. Mughulhu mungyi ithukakanaya kutsibu omwa kiro. Omw’ikanirania eryo thwabya thukathunga omwa kiro, ihakanayira iniambwira eriyowa liwe kandi ngoku akakandira thatha wiwe ya kutsibu. Kundi munakulha inganasi okwa maha w’erilhubuka, buthuku buke-buke munayisanga ingali okw’imubwira oku Yesu—ngoku mwalhubukya abaholi kandi ngoku akayilhagha erisyakolha ekyo omwa buthuku obukasa. (Yoane 5:28, 29) Iningamubwira indi: “Thalengekania wukathasyalholha oku thatha wawu. Ithwe bosi thwanganabya omwa kihugho Paradiso kera na kera.” Ebinywe ebyo mubyahamba okwa muthima wa munywani waghe.

Okwa bundi buthuku, munywani waghe oyo iniakaletha emyatsi ng’eyihambire okwa biro by’enyuma-nyuma kutse engangirirya y’Obusathu. Iningakolesaya e Biblia yiwe erimukangania amasako muthina-muthina aw’akakanganaya ekwenene eyihambire oku Yehova Nyamuhanga, Yesu, n’ebiro by’enyuma-nyuma. (Yoane 14:28; 2 Timoteo 3:1-5) Iningabya ing’ongera eribwira munywani waghe oku Yehova, ikwangan’ongera indya eriyisanga ingabirilengekania oku Yehova.

Ahathe erithika-thika, lyolho-lyolho embutho y’ekwenene ye Biblia eyabya isiyathalhasa omo muthima waghe—embutho eyo ababuthi baghe balengaho kutsibu erinyiheramo—muyatsuka erilhasa. Ng’eky’erileberyako, ihakanayira ingane omwa klabbu n’abanywani baghe inganemunywa ebibatsi ebikathamiraya, kitsumbukirania ingatsuka erilengekania oku Yehova. Abangyi b’okwa banywani baghe ibakabugha bathi banzire Nyamuhanga, aliwe emibere yabu isiyirikanganaya ekyo. Kundi isinganzire eribya ng’ibo, munaminya ekyo ngayithagha erikolha. Munayithagha erisuba oku Yehova.

Ni kwenene, eriminya eky’erikolha n’erikikolha ni bindu bibiri ebiri mbaghane. Esindi mbinduka musy’olhoba erikolha; mukithanyikalira erileka ebibatsi ebikathamiraya. Kandi munaleka abanywani baghe abakera, n’eritsuka erigha e Biblia n’omusyakulhu w’ekithunga.

Aliwe, esindi mbinduka musyakalha kutsibu. Kutsibu-tsibu mukyanyikalira erikakirya ekinigha kyaghe. Ihakanayira ingathoka aliwe kandi ingasubirayo. Enyuma waho iningayowa nabi, ingalengekania indi ngabirilemwa. Iningahika okwa musyakulhu oyuwabya akanyeghesya e Biblia inganahwere amani. Mughulhu wosi omusyakulhu oyo iniakaghumisirizaya kandi ini w’olhukeri, kandi iniakanyihumulikanaya ndeke. Buthuku bughuma, mwambwira athi ngasome omwatsi omwa Kaleberyo owahambire okwa mughaso w’erithendi bikyako. Muthwakania okwa bindu ebyo nangakolha ingayowa ingabirihithana. Lyolho-lyolho, omw’ibya ingan’ibukire omwatsi oyo n’erisaba Yehova ya kutsibu, munathoka erikakirya ekinigha kyaghe. Erighunzerera, omo Kwakani 2000, munabatizibwa ng’Omwema ba Yehova. Sindi yithagha erisoborera etseme eyo ababuthi baghe babya nayo.

NGOKU NABIRIGHASIRWA: Lino ngathekene kandi ngawithe obunyamuthima-thima obuhenirye, habw’eriminya ngoku singakitsandaya omubiri waghe omwa bibatsi ebikathamiraya kutse obusingiri. Omwa byosi ngakolha, mbulha ni kolha mubiiri mulebe, erihindana okwa mihindano y’Ekikristayo, kutse erisangira omwa by’eriyitsemesya birebe, ngatsemire kutsibu. Ngawithe amalengekania awatholere okwa ngebe.

Ngasima Yehova busana n’ababuthi baghe abathanyilhuhirirako. Kandi ngalengekanaya okwa binywe bya Yesu ebiri omu Yoane 6:44 bino: “Sihali omundu oyukathoka erinyihikako, Thatha oyo wanyithuma athaliamuletha.” Kikanyitsemesaya kutsibu ingalengekania ngoku nabirithoka erisuba oku Yehova kundi abirithasya ndetha okw’iyo.

“Iningakandira erithunga thatha.”​—MARCO ANTONIO ALVAREZ SOTO

ABUTHAWA: 1977

EWABU: CHILE

EBY’ENYUMA: INIANZIRE OMUZIKI OW’AKABUGHA KUTSIBU KANDI OW’EKISIRE-SIRE

ENGEBE YAGHE ENYUMA: Mama waghe anyikuliraya e Punta Arenas, etawuni eyuwene okwa mbalhu ye Magellan hakuhi ne South America. Ababuthi baghe baghabulhana ingane w’emyaka ithano, ekindu ekyaleka ingayowa ingabirisighanibwa. Iningakandira erithunga thatha.

Mama waghe mw’igha e Biblia n’Abema ba Yehova, neryo iniakanyithwalha okwa mihindano y’Ekikristayo okwa Kisenge ky’Obwami. Aliwe ingaponire erighenda okwa mihindano, kandi mughulhu mungyi iningayithwa kithya-kithya thukayayo. Nabere ingahikya emyaka 13, munalekera ighuma erihindana.

Okwa buthuku obo, nabya inabiritsuka erianza omuziki, kandi munaminya ngoku ngasi eby’omuziki. Nabere ingahikya emyaka 15, nabya ingali kuwatha omuziki ow’akabugha kutsibu kandi ow’ekisire-sire okwa mikonga, omwa syobbara, n’okwa mibalha ey’abandu bake. Munanywana abimbi abasi ndeke neryo ekyo mukyaleka inganza emiziki eyakera. Munatsuka erisoma eby’omuziki okwa sukuru ey’ewethu. Nabere ingahikya emyaka 20, munahumira omwa muyi mukulhu e Santiago, eriyalholha embere n’esukuru yaghe. Kandi munalholha embere eriwatha omuziki ow’akabugha kutsibu kandi ow’ekisire-sire.

Erihika okwa buthuku obu, iningayowa ingabulirweko. Erianza eriyighunzako eriyowa eryo, iningathamira n’erinywa ebibatsi ebikathamiraya haghuma n’abangakolha nabu omuziki, abo nabya ingathwalha ng’ab’okw’ingye. Ingawithe omubere w’eriyisamambulha, ow’abya akalhangirika n’okwa busu bwaghe. Iningambalha esyongyimba esy’ekirima, munakothya esyonderu, n’esyonzwiri syaghe musyabya nyiri-nyiri hakuhi erilhaba omwa mbindi.

Mirundi mingyi, omubere waghe w’eriyisamambulha iniakaleka ingalhwa n’erithwa ebilhaghiro. Buthuku bughuma, ingabirinywa obwabu, munathahirira egurupu y’abakaghulhaya ebibatsi ebikathamiraya ababya bakathutabura ingye n’abanywani baghe. Abakaghulhaya ebibatsi abo mubanyiswirya kutsibu erihika okw’inyithwa kw’olhuseya.

Nomwabine, abanyirethera obulhumi bunene babya ib’abanywani baghe b’okwa ndungu. Kiro kighuma munaminya ngoku omusika waghe oyo thwabya thwanzene nayu abiribya inianemusingira na munywani waghe w’okwa ndungu habw’emyaka, kandi banywani baghe abosi ibabirinyibisa. Munahithana kutsibu.

Munasuba e Punta Arenas, eyo munatsuka erikangirirya eby’omuziki n’eriwatha ekidari ekikahulhawamo cello. Kandi munalholha embere n’eriwatha n’eririkodinga omuziki waghe ow’akabugha kutsibu kandi ow’olhusire-sire. Munabana omusika oyuwene oyukahulhawamo Sussan, neryo muthw’ikalha haghuma. Buthuku bulebe enyuma w’aho, Sussan mwaminya ngoku mama wiwe ikirirye omwa Busathu aliwe ingye eyihi. Mwambulya athi: “Neryo ekwenene y’eyahi?” Munamusubirya indi nganasi ngoku engangirirya y’Obusathu yiwire aliwe sinanga thoka erisoborerayo omw’ikolesya e Biblia. Nomwabine, ngabya inganasi oyuwanga musoborera. Munamubwira indi Abema ba Yehova babanga mukangania ekwenene erilhua omwa Biblia. Neryo munakolha ekindu ekya nabya isindi nathakolha habw’emyaka mingyi—munasaba Nyamuhanga n’eribugha indi angwathikaye.

Biro bike enyuma waho, munalhangira omulhume oyo nabya nganganasi, neryo munamubulya nga ni Mwema wa Yehova. Nomwakine indi mwanyisagha busana n’emisosere yaghe, omwa lhukeri mwasubirya ebibulyo byaghe ebyosi ebihambire okwa mihindano y’okwa Kisenge ky’Obwami. Munaligha ngoku eribanangana eri ni subirya ly’omusabe waghe. Munaghenda okwa Kisenge ky’Obwami kandi mun’ikalha enyuma nuku sihabye oyukanyilhangira. Aliwe abangyi mubatsuka erinyiminyerera ngoku nanabya ingahindana ingakine mulere. Mubanyithangirira ndeke n’erinyiwako omo lhwanzo indi munayowa obuholho ini bungaho-ngaho. Munabya ng’oyuwamasuba eka. Nabere ingalhangira omulhume oyuwabya akanyeghesya e Biblia ingakine mulere, munamusaba indi athasyanyeghesaya.

NGOKU E BIBLIA YAHINDULHA ENGEBE YAGHE: Kiro kighuma munasoma Emisyo 27:11, ahakabugha hathi: “Mughalha waghe wubye n’amenge, n’eritsemesya omuthima waghe.” Munatsema ingaminya ngoku omundu buyira anganatsemesya Omuhangiki w’obuhangwa bwosi. Munaminya ngoku Yehova n’iyo Thatha oyo nabya ingakandira erithunga omwa ngebe yaghe yosi!

Munanza eritsemesya Thatha waghe w’elhubulha n’erikolha erisonda liwe, aliwe nabya inabiribya mukobe w’ebibatsi ebikathamiraya n’obwabu habw’emyaka mingyi. Munayitheghererya engangirirya ya Yesu eyiri omu Matayo 6:24, eyikabugha yithi “sihali mundu oyo wangathoka erikolera abakama babiri.” Nabere nganemulengaho erikolha esyombinduka, omusingyi owali omwa 1 Abanya Korinto 15:33 mwanyihambako, ow’akabugha athi: “Abira babi bakatsandaya omuthima mubuya.” Munaminya ngoku sinangathoka erileka emitse yaghe mibi ngamabya inganemulholha embere erighenda omwa myanya mighumerere n’erisatha n’abandu baghumerere. Erihabulha lye Biblia lyabya lilhangirikire: Ngabya ngatholere ingayira ekyo ngakolha eriyilhusyako ebikanyithwikalhaya.—Matayo 5:30.

Eribya inabya nganzire kutsibu omuziki ow’akabugha kutsibu, erilekagho ly’eryabya ithwamu erikalire eryo namathakolha. Aliwe busana n’obuwathikya bw’abanywani baghe omwa kithunga, erighunzerera munathoka erilekagho. Munaleka erinywa bunene n’erileka ebibatsi ebikathamiraya. Kandi munaghemba esyonzwiri syaghe, esyonderu, n’erileka eribya ingambalha esyongyimba sy’ekirima sisa-sisa. Nabere ingabwira Sussan indi nganza erighemba esyonzwiri syaghe mwanza eriminya ebya ngakolha okwa Kisenge ky’Obwami. Mwabugha athi, “Ngaghenda nawu eriyalebya ebikabya okwa Kisenge ky’Obwami!” Mwatsemera ebya ayilhangirirayo, kandi buthuku buke-buke mwatsuka erigha e Biblia. Erighunzerera, ingye na Sussan muthwathahania. Omwa 2008, muthwabatizibwa ng’Abema ba Yehova. Thutsemire erikolera Yehova haghuma na mama waghe.

NGOKU NABIRIGHASIRWA: Nabiriyibalya okwa tseme y’amabehi eyiri omwa kihugho n’abanywani abaghobya. Ngakinanzire omuziki, aliwe lino ngasombolha ndeke. Ngakolesaya ekyalholirweko kyaghe erighasira abahughu baghe n’abandi, kitsibu-tsibu abalere. Nganzire eribawathikya erilhangira ngoku ebingyi ebya ekihugho kino kikaha bikabya ngabikatsemesaya, aliwe erighunzerera ni “bibaya” ni bugha ambu akasasiro.—Abanya Filipi 3:8.

Nabiribana abanywani abathaleghulha omwa kithunga ky’Ekikristayo, omuli olhwanzo n’obuholho eby’okwenene. Ekikulhu omwa byosi, omw’iyithunda hakuhi na Yehova, erighunzerera nabiribana Thatha waghe.

[Eblabbu]

“Nabirithoka erisuba oku Yehova kundi abirithasya ndetha okw’iyo”