E Biblia Yikahindulha Esyongebe

NI KYAHI ekya omulhume e Scotland aminya ku ky’ekikaghasa kutsibu kwilhaba ebizinesi yiwe eyabya mwamaghoba manene? Ni kyahi ekyaleka omulhume e Brazil iniasighania engebe y’obutswatswa n’erileka erinywa e crack cocaine? Omulhume e Slovenia mwathoka athi erileka omutse wiwe w’erinywa bungaho-ngaho? Soma ebya bandu aba bakabugha.

“Engebe yaghe yabya nga yuwene.”​—JOHN RICKETTS

ABUTHAWA: 1958

EWABU: SCOTLAND

EBY’ENYUMA: OMUKOLI NYAKABARA W’EBIZINESI

ENGEBE YAGHE ENYUMA: Munatsemera emibere eyuwene eyo ababuthi baghe banyikulirayamo. Thatha waghe abya mukulhu omwa mahe we England, neryo eka yethu iyikahuma-huma kutsibu. Eryongera okwa Scotland, muthw’ikalha omwa England, Germany, Kenya, Malaysia, Ireland, ne Cyprus. Natsuka eribya okwa bbodingi ingane w’emyaka munani omwa Scotland. Erighunzerera munaghunzira esukuru yaghe okwa Yunivaste ye Cambridge.

Ingane w’emyaka 20, munatsuka omubiiri owaghunza myaka munani omwa bizinesi y’eby’amaghutha. Erimbere munakolera omubiiri oyu omwa South America, n’enyuma waho omwa Africa, n’erighunzerera omwa Western Australia. Nabere nabirisuba e Australia, munatsukisya ekampuni yaghe, eyo erighunzerera naghulyayo.

Esyosente esyo nabana ingaghulyayo musyanyithokesya erihumulha okwa mubiiri ingane w’emyaka 40. Munakolesya obuthuku bwaghe obo eribunga. Omw’ikolesya epiki-piki, munathimba omwa Australia mwakabiri, kandi namathimba omwa kihugho. Engebe yaghe yabya nga yuwene.

NGOKU E BIBLIA YAHINDULHA ENGEBE YAGHE: Nibya ngathe ngahumulha okwa mubiiri, munanza eribana enzira y’erisimiramu Nyamuhanga busana n’engebe eyo nabyamo. Munatsuka erighenda okwa Kipira ekyo nanakuliramu. Aliwe ekanisa isiyirikangiriraya bingyi erilhua omwa Biblia. Neryo munatsuka erigha n’Abamomon, aliwe munahwa mani kundi isibali kolesaya e Biblia.

Kiro kighuma, Abema ba Yehova mubakongotha okwa lhuyi lhwaghe. Munalhuaho inalhangira ngoku bakaseghemeraya esyongangirirya syabu sy’okwa Biblia. Erisako lighuma eryo banyikanirayako lyabya ini 1 Timoteo 2:3, 4. Emilhondo eyo yikabugha yithi erisonda lya Nyamuhanga liri lithi “abandu bosi balhamibawe, n’eriminya ndeke omwatsi w’ekwenene.” Munatsema Abema bakahira omuwatho oko mwatsi w’ekwenene ow’aseghemere okwa Biblia butsira okw’iminya buyira.

Erigha e Biblia n’Abema ba Yehova mukyaleka ingaminya omwatsi w’ekwenene oyo. Ng’eky’erileberyako, munaminya ngoku Nyamuhanga na Yesu sikitsweka ky’okwa Busathu obutheyitheghereribawa; aliwe, ni bandu babiri abali mbaghane. (Yoane 14:28; 1 Abanya Korinto 11:3) Munatsema kutsibu eriminya ekwenene nyolho eyo. Kandi munapona habw’eribya kera imunatsandya akaghalha kaghe ka bbuIe erilengaho eriyitheghererya ebitheyitheghereribawa!

Buthuku buke-buke munatsuka erihindana okwa mihindano y’Abema ba Yehova. Munatsemera kutsibu omubere wabu w’eriyihira okwa bandu n’esyongeso esyuwene esy’obuli mundu aby’awithe​—mubalhangirika nga ni babuyirire. Olhwanzo lhwabu olhw’okwenene mulhwaleka ingaligha ku nabiribana edini y’okwenene.​—Yoane 13:35.

NGOKU NABIRIGHASIRWA: Nabere nabiribatizibwa, munabana omukali mubuyanga ya Diane. Mwakulibwa ng’Omwema wa Yehova, kandi aby’awithe emibere mingyi eyuwene eya nyitsemesaya. Endambi muyahika, namamuherukya. Ngasima Yehova ya kutsibu busana n’eribana omukali oyuwithe olhwanzo kandi oyukanyisighika.

Ingye na Diane muthwabya n’eriyisunza linene ery’erighenda omo mwanya owali mw’obuyithawa bunene bw’abathuliri b’engulhu yuwene ye Biblia. Omwa 2010, muthwaghenda e Belize, Central America. Eno thukathulira abandu abanzire Nyamuhanga kandi abawithe enyotha y’okwenene ey’eriminya e Biblia.

Erighunzerera, kikanyilethera erithekana omwa bulengekania eriminya ekwenene eyihambire oku Nyamuhanga n’Ekinywe kiwe. Ingye ng’omuthuliri w’omughulhu wosi, nabiribana etseme y’erikangirirya abandi be Biblia. Sihali ekikatsemesaya ng’erilhangira ekwenene ye Biblia yikuwania engebe y’omundu​—ngoku kyanabya okw’ingye. Erighunzerera, nabiribana enzira eyuwene kutsibu ey’erisimiramu Nyamuhanga busana n’engebe nyiwithe.

“Mubanyikangania olhukeri.”​—MAURÍCIO ARAÚJO

ABUTHAWA: 1967

EWABU: BRAZIL

EBY’ENYUMA: OYUWABYA OMWA NGEBE Y’OBUTSWATSWA

ENGEBE YAGHE ENYUMA: Nakulira omwa Avaré, etawuni nyike eyithemo toko omw’ihanga lye São Paulo. Abandu b’omo ni bakoli abakathunga omusara.

Thatha waghe mwaholha mama waghe ininamukule okw’ingye. Ingakine kojo kalere, iningambalha esyongyimba sya mama iniabirighenda. Munatsuka eribya n’emibere y’abakali, neryo abandu mubatsuka erilengekania bathi nga kolha emyatsi y’engyingo n’ab’olhubutho ng’olhwaghe. Endambi muyahika, namatsuka erikolha emyatsi y’engyingo n’abalhwana n’abalhume.

Ingakisiya ingalhua omo myaka y’obulengwa, nabya ingalikusondya kutsibu ab’erikolha nabu emyatsi y’engyingo (abalhume n’abakali) ehosi-hosi eyo nangababana​—omwa syobbara, omwa syodisiko, nibya n’okwa syokanisa. Hamabya omukonga, iningambalha ng’omukali n’erihotholha amahothole aw’akahulhawamo samba-school parades. Munaminywa kutsibu.

Abanywani baghe mwabya abakakolha emyatsi y’engyingo n’ab’olhubutho olhusosene n’olhwabu, abamalaya, n’abanywi b’ebibatsi ebikathamiraya. Abaghuma b’okw’ibo mubabugha bathi ngalengesaye erinywa e crack cocaine, kandi buthuku buke-buke munabya n’ekyaka kyayu kinene. Ihakanayira ithwanywayo omw’ithumbi eryosi. Okwa bundi buthuku, iningana yisolholha okwa bandi neryo ingaghunza ekiro kyosi inganemunywa e crack. Munabbonduka abandu bamatsuka eribugha bathi ngakwire esilimu.

NGOKU E BIBLIA YAHINDULHA ENGEBE YAGHE: Okwa buthuku obo munabana Abema ba Yehova. Mubanyikangania olhukeri. Okwa milhondo eyo banyisomera mwabya Abanya Roma 10:13, ahakabugha hathi: “Obuli mundu oyukalhakira erina ly’Omukama [Yehova] asyalhamibwa.” Ebinywe ebyo mubyaleka ingaminya omughaso w’erikolesya erina lya Yehova. Mirundi mingyi, iningabya nabirighunza erithumbi eryosi inganemunywa e crack cocaine, iningakyungulha eridirisa, ingasamalira elhubulha, n’erisaba Yehova inganemuthoghongya emisoni, erimulemba-lemba indi angwathikaye.

Busana n’eriyibulha-bulha ingalhangira mama waghe oyuli omwa maghaniryo manene, kw’akaghalhawa kutsibu akalhangira ku ngayitsandaya omwa bibatsi ebikathamiraya, munathwamu eribileka. Buthuku buke enyuma waho, munaligha erigha e Biblia n’Abema. Mubanyikakasya bathi erigha likendi ghumya erithwamu lyaghe ery’erileka erinywa ebibatsi ebikathamiraya​—kandi mukyabya!

Nabere nganemulholha embere erigha Biblia, munaminya ngoku ngatholere ingahindulha engebe yaghe. Mukyanyikalira erileka omutse waghe w’erikolha emyatsi y’engyingo n’ab’olhubutho ng’olhwaghe, kundi eyo y’eyabya ngebe yaghe. Aliwe ekyanyiwathikaya lyabya iry’erihuma. Munaleka amanywani waghe wa kera kanda namaleka n’erighenda omwa syobbara n’esyodisiko.

Nomwakine indi sikyabya kyolho erikolha esyombinduka esi, kikanyihumulikanaya eriminya ngoku Yehova mwanyitsomana kandi ku mwayitheghererya amalhwa waghe. (1 Yoane 3:19, 20) Aho omwaka wa 2002 ahikira, nabya inamabirileka emitse yaghe yosi y’erikolha emyatsi y’engyingo n’ab’olhubutho ng’olhwaghe, kandi munabatizibwa ng’Omwema wa Yehova omo mwaka oyo.

NGOKU NABIRIGHASIRWA: Mama waghe mwatsema ingakolha esyombinduka kyamaleka nayo iniatsuka erigha Biblia. Eky’obulighe abya iniabirisanyarara. Nomwabine, anemulholha embere erikulha-kulhania olhwanzo olhw’awithire Yehova n’ekwenene ye Biblia.

Ahabw’emyaka munani eyihwere, nabiribya ingane musangira omwa mubiiri w’omughulhu wosi, erighunza obuthuku bwaghe bunene ing’eghesya abandi be Biblia. Ngaligha ngoku nabiribya inganemurwanisya esyongumbu nyibi. Aliwe ngayikethere ngoku omw’ithwamu erithendi ghendera okwa syongumbu nyibi esyo, inangana tsemesya Yehova.

Eriyithunda hakuhi na Yehova n’eribya omwa ngebe eyikamutsemesaya kyabirinyiha ekitsumbi. Munabwire, indi mulhume oyutsemire.

“Nabya kisya ekithusulha.”​—LUKA ŠUC

ABUTHAWA: 1975

EWABU: SLOVENIA

EBY’ENYUMA: OYUWABYA AKANYWA OBWABU BUNGAHO-NGAHO

ENGEBE YAGHE ENYUMA: Nabuthirawa e Ljubljana, omuyi mukulhu we Slovenia. Nabya w’emyaka ini ingane omwa ngebe eyitsemire. Neryo thatha waghe mwayitha. Thwabere thwabiribana ekitsibu eki, mama mwabya w’erikolha kutsibu erithusonderya eky’erirya ithwe balhwana babiri, ingye na mukulhu waghe.

Nabere ingahikya myaka 15, munahumira ewa mukaka waghe. Munanza erikalha nayu kundi abangyi b’okwa banywani baghe ibali omwa butaka bwiwe. Kandi eyo iningathunga obwiranda bunene kwilhaba eka. Nabere ingahikya emyaka 16, munatsuka eribya ingasiba n’abandu abakayanywa okwa wikendi. Munakothya esyonzwiri, namatsuka eriambalha kisire-sire, n’enyuma waho namatsuka erinywa ethaba.

Nomwakine indi munalengesya ebibatsi muthina-muthina ebikathamiraya, munanza erinywa obwabu kundi munalhangira ibwangatsemera kutsibu. Buthuku buke-buke munabya isingakinywa thuglasi thuke, ingalikunywa bunene okwa tsupa. Munathoka ndeke eky’eriyiringirirania indi isiwanga minya ku nga thamire. Mughulhu mungyi omuka waghe iniakabya akabeha obwabu imubaminya ku nabirinywa. Nomubyanabya bithya, isihali n’oyuwangaminya ngoku nanganabya inabirinywa esyolita nene sy’evini kutse ebbiya​—n’eritswanganiamo obwabu obukalire obukahulhawamo vodka!

Mirundi mingyi, in’ingye ngawathikaya banywani baghe ibabirihwako omwa disiko omwa kiro, nomwakine indi obundi iningabya inabirinywa kabiri obungaha n’obwa balyanywa. Kiro kighuma, munowa omughuma w’okwa banywani baghe akabugha athi ngali kisya ekithusulha​—omwa Slovenia ekyo ni kinywe ky’akasekereryo ekikamanyisaya omundu oyukanywa bunene kwilhaba abandi. Omo kwenene ebinywe ebyo mubyanyiponesya.

Munatsuka erilengekania okwa bya ngakolha okwa ngebe yaghe. Munahwa amani busana n’eriyowa nga singwithe mughaso. Mukyabya nga sihali ekyosi-kyosi ekyo nabya ingakolha omwa ngebe ekiwithe ekighendererwa.

NGOKU E BIBLIA YAHINDULHA ENGEBE YAGHE: Okwa buthuku obo, munalhangira omughuma w’okw’abanasoma nabu iniabirihinduka; iniabiribya mwolho. Erianza eriminya bingyi okwa ky’eribya iniabirikolha esyombinduka, munamukokya aho bakanywira ekyayi. Omw’ikanirania lyethu eryo, mwanyisoborera ngoku abiritsuka erigha e Biblia n’Abema ba Yehova. Mwanyibwira okwa by’abya ak’igha, ebyosi byabya bihyaka okw’ingye, kundi isindi nathabya omwa dini yosi-yosi. Munatsuka erihindana okwa mihindano y’Abema kandi bamatsuka erinyeghesya e Biblia.

Erigha e Biblia mukyaleka ingalhangira ekwenene nene ey’amaaka kandi eyikatsemesaya. Ng’eky’erileberyako, munaminya ngoku thuli omwa buthuku obo e Biblia yikahulhamo “ebiro by’enyuma-nyuma.” (2 Timoteo 3:1-5) Kandi mun’igha ngoku Nyamuhanga akisiya inialhusya okwa kihugho kw’abandu babi n’eriha abandu babuya b’akaghisa k’eribyaho kera na kera omwa Paradiso. (Esyonyimbo 37:29) Munanza kutsibu eryuwania engebe yaghe nuku ngasyabya mughuma w’okwa bandu babuya abo.

Munatsuka eribwira banywani baghe okwa kwenene ye Biblia eyo nabya ing’igha. Abangyi mubanyisiningulira busana n’ebyo ngababwira, aliwe eki mukyanyibera mughisa omwa buthaminya. Ebyo babya bakabugha mubyaleka ingaminya ngoku si banywani b’okwenene. Munaminya ngoku ekitsibu kyaghe eky’erinywa kyabya busana n’erisombolha nabi abanywani. Omwa wiki yosi, ibakalindirira ewikendi nuku kandi bathamire.

Munathwa obunywani obo n’erisubya omwa mwanya wabu mw’abanywani Abema ba Yehova, abakahimba omundu. Eribya haghuma nabo mukyanyihira mw’omuhwa munene​—aba ni bandu abanzire Nyamuhanga erilhua okwa muthima kandi abakalengaho erighendera okwa bihano biwe. Lyolho-lyolho, munathoka erileka omutse waghe w’erinywa bungaho-ngaho.

NGOKU NABIRIGHASIRWA: Ngasima Yehova ya kutsibu kundi singakiyithagha obwabu ingye erithoka eritsema. Omo kwenene singasi nganangabere hayi ku nalholha embere n’engebe yaghe ya kera. Aliwe lino ngaligha ngoku ngawithe engebe eyuwenenga.

Ahabw’emyaka musanju eyihwere, nabirithunga olhusunzo lhw’erikolera okwa kyaghanda ky’omuthahulha eky’Abema ba Yehova e Slovenia. Eriminya Yehova n’erimukolera kyabirinyiha ekighendererwa omwa ngebe.