INIANE okwa kihugho, Yesu mwakangania ndeke-ndeke emibere ya Thatha wiwe n’emibere eyo akakoleramo emyatsi. Mwabugha athi: “Sindi kolha kindu omw’ihana lyaghe ingyuwene, nikwa ngabugha emyatsi eyi ngoku Thatha anyikangiriraya . . . kusangwa ngakolha ebiro byosi emyatsi eyikamutsemesaya.” (Yoane 8:28, 29; Abanya Kolosai 1:15) Neryo kwesi, omw’iminya emibere Yesu akolonganiramu n’abakali n’amalengekania agho aby’abawitheko, kikaleka ithwayitheghererya amalengekania agho Nyamuhanga awithe okwa bakali n’ebya akabayithaghako.

Erikwamana n’ebiri omwa bitabu by’Enjiri, abasomi bangyi babirikangania ngoku amalengekania agho Yesu aby’awithe okwa bakali abya mbaghane kutsibu oko w’abandi. Omwa nziraki? Kandi ekikulhu kutsibu, mbwino namunabwire, esyongangirirya siwe sikinaha abakali b’obwiranda?

Yesu mwathabalhangira ng’ebindu eby’erikolesya eryughuthya esyongumbu sy’emyatsi y’engyingo. Erikwamana n’amalengekania w’abandi basondoli b’edini y’Ekiyuda, erikolongana n’ab’olhundi lhubutho mwanga lhwiririre esyongumbu nyibi. Kundi abakali ibakalhangirawa ng’abakalenga okwa bandu, isibalilighirawa erikania n’abalhume omwa bandu kutse erighenda isibaswikire omuthwe. Okwa lhundi lhuhandi Yesu mwahabulha abalhume athi ibakakirya esyongumbu syabu sy’omubiri n’eriha abakali b’ekitsumbi omwakanya k’erilekera ighuma erikolongana nabu.​—Matayo 5:28.

Kandi Yesu mwabugha athi: “Omundu oyukahigha mukali wiwe akahikya wundi mukali iniakasingira.” (Mariko 10:11, 12) Neryo mwabya iniamaghana engangirirya y’abakangirirya eyabya yikalighira abalhume erikomolha bakali babu “busana n’emyatsi mithya-mithya.” (Matayo 19:3, 9) Abayuda bangyi ibakakithwalha bathi omulhume syali singira. Abakangirirya babu ibakakangiriraya bathi omulhume amakesya n’owundi mukali isyathasingira. Aliwe bathi omukali n’iyo akabya iniamasingira amakesya n’owundi mulhume! Ngoku ekitabu kighuma ekikakanaya okwa Biblia kikabugha, “Yesu, omw’ihiriraho abiba n’abakali ebihano bighumerere ebihambire okwa by’esyongeso, abya iniamasikya n’eriha abakali b’ekitsumbi.”

Ebyabirilhwiririra omw’ikangirirya liwe munabwire: Omwa kithunga ky’Ekikristayo eky’Abema ba Yehova, abakali n’abalhume bakasangira ndeke haghuma omwa mihindano. Abakali sibatholere bakasagha bathi abalhume bakendi basamalira omwa ngumbu nyibi kutse eriyanzirirya kubo, kundi abalhume Abakristayo ibanayitheghirye bakathwalha ‘abakekulhu ng’abakoyo n’abakali balere ng’abali babu ibanemuhana n’omuthima atheko bibi.’​—1 Timoteo 5:2.

Yesu mwakolesya obuthuku bwiwe erikangirirya abakali. Mbaghane n’amalengekania w’abakangirirya b’edini aw’abya akanyirire awaleka abakali ibabya isibangaminya kindu, Yesu mwabakangirirya n’eribahira mw’omuhwa w’erihayo amalengekania wabu. Omw’ithendi kakirya Maria okw’ithunga etseme y’erikangiriribwa, Yesu mwakangania ngoku sibugha indi omukali atholere iniakolha eby’ejokoni bisa. (Luka 10:38-42) Mwali wobu Maria, ya Marata, nayu mwaghasirwa omw’ikangirirya liwe, ngoku kikanganibwe omw’isubirya liwe eryuwene eryo aha Yesu enyuma w’olhuholho lhwa Lazaro.​—Yoane 11:21-27.

Yesu iniakalhangira amalengekania w’abakali mwa w’omughaso. Okwa buthuku obo, abakali bangyi Abayuda ib’ikirirye bathi ekyangaletha etseme ly’eribya n’omwana w’obulhume oyusikibirwe, kyamathokekana iniabya ini muminyereri. Omughuma w’okwa bakali abere akabugha athi: “Obutseme buli oko mukali oyuwakubutha!” Yesu mwakolesya akaghisa ako erimubwira ekindu ekyuwene. (Luka 11:27, 28) Erikangania ngoku obunyakirimu kya kindu kikulhu, Yesu mwamukangania ekindu ekilengire olhukwamirwa olho abakali babya bawithe.​—Yoane 8:32.

Ebyabirilhwiririra omw’ikangirirya liwe munabwire: Abakakangiriraya omwa kithunga ky’Ekikristayo bak’angirira eby’erisubirya by’abakali omwa mihindano y’ekithunga. Basikirye abakali abakulire bunyakirimu busana n’eribya “ibakakangiriraya emyatsi mibuya,” omughulhu bali ibobene n’omwa ky’erileberyako kyabu. (Tito 2:3) Kandi bakabayikethera bikahika okw’ithulhughania engulhu yuwene y’Obwami bwa Nyamuhanga.​—Esyonyimbo 68:11; lebaya akasanduko “ Mbwino Omukwenda Paulo Mwathanga Abakali Erikania?”

Yesu iniakatsomana abakali. Omwa buthuku bwe Biblia abaana b’obukali isibali lhangirawa mw’ab’omughaso ng’abaana b’obulhume. E Talmud muli amalengekania ano: “Obutseme buli n’omundu oyuwithe abaana b’obulhume, n’obulighe oko yuwithe abaana b’obukali.” Abandi babuthi ibakalhangira abaana b’obukali ng’omuheke​—ibakabya b’eribasonderya ow’eribathahya n’eriha abakendi muthahya b’omuthahyo, kandi isibanga thoka erimubanako obuwathikya babirikulha omo myaka.

Yesu mwakangania ngoku engebe y’omwana w’obukali ni y’omughaso ng’ey’omwana w’obulhume​—mwalhubukya mwali wa Yairo ngoku analhubukaya mughalha w’omukwakali owe Naina. (Mariko 5:35, 41, 42; Luka 7:11-15) Abere abirilhamya omukali “oyuwabya kw’ekirimu kibi ekyamulhwalhaya emyaka erikumi n’omunani,” Yesu mwamwahulhamo “mwali wa Abrahamu,” ekinywe ekyathabya kyasibwe omwa bisakango by’Ekiyuda. (Luka 13:10-16) Omw’ikolesya ekinywe ky’ekitsumbi kandi eky’erisikya eki, mwakangania ngoku nayu ni w’omughaso ng’abandi bandu kandi mwalhangira erikirirya liwe linene.​—Luka 19:9; Abanya Galatia 3:7.

Ebyabirilhwiririra omw’ikangirirya liwe munabwire: Akasimo ake Asia kakabugha kathi: “Erilembera omwana w’obukali liri ng’eryuthangirira eririma ly’omutaka.” Erithendi lighira n’amalengekania ayo eribahambako, omo lhwanzo, abathatha Abakristayo bakatsomana abaana babu bosi, ab’obulhume n’ab’obukali. Ababuthi Abakristayo bakalhangira bathi abaana babu abosi bakathunga ekisomo ky’amenge n’eritsomanwa omwa by’amaghalha.

Yesu iniakayikethera abakali. Omwa koti y’Abayuda, obwema obukahebawa n’omukali ibukalhangirawa ng’obw’ingene n’obw’omukobe. Josephus, oyusomire ebya kera ow’omwa kighana ky’erimbere, mwahabulha athi: “Busana n’emibere y’abakali ey’obuhangwa, sikitholere eriligha obwema bwosi-bwosi obwa bakaha.”

Mbaghane n’ekyo, Yesu mwasombolha abakali erithulhagho ngoku abirilhubuka. (Matayo 28:1, 8-10) Nomwakine indi abakali abathaleghulha aba babya ibaneho Mukama wabu ak’ithibwa n’eritsikwa, mukyakalira abakwenda eriligha ebya bakali abo babugha. (Matayo 27:55, 56, 61; Luka 24:10, 11) Aliwe, omw’itsuka eributhukira okwa bakali, Kristo oyuwalhubukibawa mwakangania ngoku abakali nabu batholere ibaha obwema ng’abandi bigha biwe.​—Emibiri 1:8, 14.

Ebyabirilhwiririra omw’ikangirirya liwe munabwire: Omwa bithunga by’Abema ba Yehova, abalhume ab’esyongwamirwa bakakanganaya ku batsomene abakali omw’ibahulikirira. N’abiba Abakristayo ‘bakasikaya’ bakali babu omw’ibahulikirira ndeke.​—1 Petero 3:7; Enzuko 21:12.

Abalhume bakabya bamagherererya Kristo, abakali bakahebawa ekitsumbi n’obwiranda ebyo Nyamuhanga aby’anzire ibathunga eritsuka kera. (Enzuko 1:27, 28) Omwakanya k’erisighika emibere y’abalhume ey’erighaya abakali, abiba Abakristayo bakaligha erisondolhwa n’emisingyi ye Biblia, ikyaleka abanze babu ibabana etseme.​—Abanya Efeso 5:28, 29.

Yelena abere akatsuka erigha e Biblia, abya inianemwaghalhwa kingunyu-ngunyu busana na mwira wiwe erimwaghalya. Mwira wiwe akulira omwa kitsweka ekyabya mw’abandu abakaheka abakali abo bakanza erithahya n’eriswiribwa erikanyirire. Yelena akabugha athi: “Ebyo n’igha omwa Biblia mubyanyighumya. Munaminya ngoku hane omundu oyunyanzire kandi oyukanyilhangira mwa w’omughaso kandi oyunyitsomene. Kandi munaminya ngoku mwira waghe am’igha e Biblia, iyikendi hindulha amalengekania agho anyiwitheko.” Ekilhotho kiwe mukyabererera omughulhu mwira wiwe aligha erigha e Biblia n’enyuma waho amabatizibwa ng’omughuma w’okwa Bema ba Yehova. Yelena akabugha athi: “Mwabya eky’erileberyako ekyuwene omw’iyikakirya. Muthw’igha erighanyirana.” Akaghunzerera athiki? “Okwenene kuli kuthi emisingyi ye Biblia yabirinyiwathikya eriyowa inganzibirwe n’eritheghibwa omwa butheke bwaghe.”​—Abanya Kolosai 3:13, 18, 19.

Yelena siyo musa oyuwamathabana ekyalholirweko ng’eki. Esyomiliyoni sy’abakali Abakristayo batsemire kundi ibo na bira babu bakalengaho erighendera okwa misingyi ye Biblia omwa matheke wabu. Bakathunga ekitsumbi, erihumulikana, n’obwiranda omw’ikolongana n’abandi Bakristayo.​—Yoane 13:34, 35.

Abalhume n’abakali Abakristayo abosi bakaminya ngoku ibo ng’abandu ab’ekibi kandi abathahikene, ni b’okw’ihangika lya Nyamuhanga ‘eryabiribya buyira.’ Aliwe omw’iyithunda hakuhi na Nyamuhanga kandi Thatha wabu w’olhwanzo, Yehova, bawithe amaha w’erisyaboholhwa “omwa bukobe bw’emyatsi y’erihonda” n’eritsemera “olhukengerwa lhw’abaana ba Nyamuhanga.” Aya ka ni maha mabuyanga agho abalhume n’abakali abali ahisi sy’eritsomana lya Nyamuhanga bawithe!​—Abanya Roma 8:20, 21.