Ee, erithimba omwa kihugho kyosi Abema ba Yehova bawithe esyomiliyoni nyingyi sy’abakali abakakangiriraya. Ni ndeko nene y’abathuliri b’engulhu yuwene y’Obwami bwa Nyamuhanga. Omwa nzira y’obuminyereri, Esyonyimbo 68:11, NWT hakababughako hathi: “Yehova akaha ekihamulho; Abakali abakathulhughanaya engulhu yuwene ni mahe manene.”

Aliwe isiwalengekanaya wuthi omubiiri w’erikangirirya ogho abakali Abema ba Yehova bakakolha ali ng’ow’abakali abasondoli ab’awandi madini. Hali mbaghane nene ahakathi-kathi kabu. Bali mbaghane omwa nziraki?

Abahulikiriri babu ni bambaghane. Abakali, kwilhabirirya ab’Ekristendomu, bakahebawa olhukwamirwa lhw’erisondolha omwa makanisa wabu, neryo abahulikiriri bakabya ib’abandu abali omwa makanisa ayu. Abakali Abema ba Yehova ibo, bahulikiriri babu b’abo abathe omwa bithunga byabu, ni bugha ambu, abo bakeghaya bakathulira nyumba okwa nyumba n’ehandi.

Eyindi nzira eyo abakali Abema ba Yehova bali mbaghane okwa b’omwa sindi dini y’emibiiri yabu eya bakakolha omwa kithunga. Abakali abasondoli ab’Ekristendomu n’ab’esindi dini bakasondolha n’erikangirirya ab’omwa bisomo byabu erikwama amathegheko w’edini yabu. Aliwe, abakali Abema ba Yehova sibali kangiriraya omwa kithunga omughulhu hane abalhume ababatizibirwe. Abalhume ababirisombolhwa ng’abakangirirya basa babakakolha ekyo.​—1 Timoteo 3:2; Yakobo 3:1.

E Biblia yikakanganaya ngoku abalhume basa babawithe olhukwamirwa lhw’erisondolha ekithunga. Lhangira eky’erileberyako ekya mukwenda Paulo ahiraho akahandikira omulebererya mulikyabu, ya Tito: “Munakusigha e Krete busana . . . n’erihira abakulhu b’ekanisa omo buli muyi.” Paulo mwongerako athi obuli mulhume ow’erisombolhwa atholere iniabya “butsira kahinira, abye na mukali mughuma musa.” (Tito 1:5, 6) Paulo mwaha Timoteo y’obusondoli ibwan’obo omwa baruha yiwe athi: “Omundu amanza eribya oko mubiiri w’obukulhu bw’ekanisa, iniakayitsutsa omubiiri mubuya. Neryo omukulhu, atholere iniabya butsira kahinira, atholere iniabya n’omukali mughuma musa, . . . kandi athoke erikangirirya.”​—1 Timoteo 3:1, 2.

Busana naki olhukwamirwa lhw’obulebererya ilhwabya lhw’abalhume basa omwa kithunga? Paulo mwabugha athi: “Sindi ligha omukali akakangirirya kutse eribya n’ehamuli oko balhume, nikwa babye bukuthu. Kusangwa Adamu yo watsuka erihangikwa, n’enyuma waho [Eva].” (1 Timoteo 2:12, 13) Kwesi, endondekania y’erihangika yikakanganaya ekyaleka Nyamuhanga iniaha abalhume b’olhukwamirwa lhw’erikangirirya n’obulebererya.

Abaghombe ba Yehova bakakwama eky’erileberyako ky’Omusondoli wabu Yesu Kristo. Omwigha Luka mwahandika okwa mubiiri wa Yesu athi: “Yesu mwatsuka erilhaba ehosi omwa miyi n’omwa hiyi, iniakathulhughanaya engulhu yuwene n’erithulha omwatsi w’obwami bwa Nyamuhanga.” Enyuma waho, Yesu mwathuma abigha biwe erikolha omubiiri iwan’oyo: “Abigha mubahongoka n’erighenda omwa miyi yosi, erithulha engulhu yuwene.”​—Luka 8:1; 9:2-6.

Munabwire, abaghombe ba Yehova​—abalhume n’abakali—​n’omuhwa munene bakasangira omwa mubiiri ogho Yesu alhaghulha athi: “Engulhu yuwene y’obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi, neryo enduli yasyahika.”​—Matayo 24:14.