• ABUTHAWA: 1963

• EWABU: BRITAIN

• EBY’ENYUMA: ERITSEMERA OMUBIIRI W’EKITSUMBI

ENGEBE YAGHE ENYUMA:

Nabuthirawa e Croydon, South London, ngali mwana w’omukagha omw’eka eyirimo abaana mwenda. Ababuthi baghe babuthirwe okwa kizinga ekye Caribbea e St. Vincent. Mama waghe ini w’edindi y’Ekimethodokisi. Sinabya ngatsomene erigha oku Nyamuhanga, nomwakine indi nabya inganawithe eriyisunza linene ly’erianza eriminya bingyi. Ebihumuro byaghe by’esukuru mughulhu mungyi iningabighunzira okwa ngetse, inganemusoma ebitabu bingyi ebyo nabya ingalhusya omwa lebrale.

Myaka mirebe nalilekire esukuru, munaminya ngoku nganzire eriwathikya abathawithe kiwathikya. Munatsuka erikolha n’abathawithe ah’erikalha n’abawithe obulema kinyamubiri n’abathasi erisoma. Munaghenda okwa yunivasite eriyasomera eby’amaghalha. Nabere ingaghunza erisoma, munabana emibiiri y’ekitsumbi eyo ndabya ngayitsulirye, kandi munongera eribya omwa ngebe eyirimo ebindu ebyuwene. Ingye ng’oyukayikolesaya kandi oyukasekulhaya, ekyo nabya ingayithagha busana n’omubiiri waghe yabya iy’elaptopu ne Intaneti. Okwa bundi buthuku ininganaghenda omwa bihugho by’eyihya ahabw’esyowiki nga sy’esyo, ining’ikalha omwa hotele eyo nganzire, ingatsemera ebibuya ebinyithimbireko, n’erikolesya ekyuma kye spa ne gym erikolha ebisasayizi nuku ngabye ingane n’amaghalha awuwene. Omo kwenene iningalengekanaya indi ibbwa engebe y’eyo. Aliwe mund’ibirirwa eritsomana abakanuba.

NGOKU E BIBLIA YAHINDULHA ENGEBE YAGHE:

Ahabw’emyaka iningayibulhaya, ‘Ekighendererwa ky’engebe niki?’ Aliwe mundalengesya erisondya eby’erisubirya omo Biblia. Kiro kighuma omwa 1999, mulere waghe ya Margaret, oyuwabya iniabiribya Mwema wa Yehova, mwanyibungira iniane na munywani wiwe Omwema, oyuwanyitsomana. Munayisanga ingamabiriligha erigha e Biblia na munywani wa mwali wethu oyo, aliwe mundakulha-kulhana lhuba, kundi omubiiri waghe n’engebe eyo nabyamo ibikanyirira obuthuku.

Omwa buthuku bw’omwisi omwa 2002, munahumira e southwest England. Eyo, munaghenda okwa yunivasite eriyasoma kali-kali omwa by’erisekulya okwa mibere y’abandu, inganawithe ekilhubirirwa ky’eribana ekitsumbi kinene. Ingye na kaghalha kaghe muthwatsuka erihindana mughulhu wosi okwa Kisenge ky’Obwami eky’eyo. Nomwakine indi munatsemera erisoma kali-kali, erigha e Biblia mulyaleka ingayitheghererya ndeke ekikaleka ihabya ebitsibu n’ekikendi syabighunzaho. Munayitheghererya ekwenene y’ebiri omu Matayo 6:24, ahakabugha hathi siwanga thoka erikolera abakama babiri. Erikolera Nyamuhanga kutse ebindu. Munaminya ngoku ngatholere erithwamu bikahika okwa byangahira embere omo ngebe.

Omwaka w’ahanyuma, mughulhu mungyi iningahindana okw’igha lye Biblia ery’egurupu omo Abema ba Yehova babya bak’igha ekitabu Is There a Creator Who Cares About You? a Munaligha ngoku Omuhangiki wethu musa, Yehova, yukendi syaghunzaho ebitsibu by’abandu. Okwa yunivasite, munakangiriribwa ngoku sithuli yithagha Nyamuhanga omo ngebe yethu. Munayiponera. Enyuma w’amezi abiri, munakya okwa by’eyunivasite neryo namathwamu erihwerya obuthuku bwaghe okwa by’obunyakirimu.

Erisako eryanyiwathikaya erihindulha engebe yaghe ni Emisyo 3:5, 6: “Wikiriraye Omwami Mukulhu n’omuthima wawu wosi, suyeghemeraye obuminya bwawu. Omwa syonzira syawu syosi wumwahule, nayu asyathunganania esyonzira syawu.” Erigha oku Nyamuhanga wethu w’olhwanzo kyabirinyighasira kwilhaba obugaga bwosi-bwosi n’ekitsumbi ebyananga bana busana n’erisoma kali-kali. Nabere ingongera erigha okwa kighendererwa kya Yehova busana n’ekihugho n’olhukwamirwa lhwa Yesu olhw’erihayo engebe yiwe busana nethu, ku nanongera indya erianza erihayo engebe yaghe oko Muhangiki wethu. Munabatizibwa Okwakani 2003. Enyuma waho, lyolho-lyolho mun’olhobya engebe yaghe.

NGOKU NABIRIGHASIRWA:

Obunywani bwaghe na Yehova ni bw’obughuli bunene kutsibu. Nabiribana erithekana ery’okwenene n’etseme busana n’erimuminya. Kandi nabiribana etseme nene habw’eribya bughuma n’abandi baramya b’okwenene ba Nyamuhanga.

Enyotha yaghe y’erianza eriminya yinemughenda yikahwa nganemw’igha e Biblia n’erihindana okwa mihindano y’Ekikristayo. Ngatsemera eribwira abandi okwa bya ng’ikirirye. Oyu w’abiribya mubiiri waghe, ogho ngawathikirayamo abandu eriyibanira engebe eyuwene lino n’amaha mabuyanga aw’engebe omwa kihugho kihya-kihya. Eritsuka Okwomukagha 2008, nabiribya inganemusangira omwa mubiiri w’omughulhu wosi, kandi ngatsemire kutsibu n’erithekana kwilhaba kera. Ngabiribana ekighendererwa ky’engebe eky’okwenene, kandi omo kwenene nga sima Yehova ya kutsibu busana n’ekyo.

• ABUTHAWA: 1973

• EWABU: AUSTRIA

• EBY’ENYUMA: OYUKASATHA EMISATHU Y’ESYOSENTE

ENGEBE YAGHE ENYUMA:

Nakulira omwa katawuni kake ake Braunau, Austria. Yabya obugaga, kandi isiyiri obubi. Efamile yethu ini Bakatuliki neryo mubanyikulirya omwa dini eyo.

Ekyabya ingakine mulere mukyanyihambako kutsibu. Omwa 1984, ingane w’emyaka 11, ng’ibuka thukasatha omupira n’omughuma w’okwa banywani baghe kundu. Erithungyi iryan’eryo, ematoka muyamutomera, amaholha. Eriholerwa munywani waghe mukyanyihambako kutsibu. Ahabw’emyaka e aksidenti eyo yalibere, iningabya inganemuyibulya nga thukabya omwa mibereki thukaholha.

Nabere ingaleka esukuru, munakolera omwa by’amasenyerezi. Nomwakine indi iningasatha emisathu y’erisathira esyosente kandi iningasathira esyosente nene-nene, isingawithe ebitsibu omwa by’esyosente. Kandi iningakolesaya obuthuku bunene omwa by’amasatha kandi n’omunanza omuziki owakabugha kutsibu kandi ow’olhusire-sire. Engebe yaghe ini ghenda omwa syodisiko n’omwa bididi. Munabya omwa ngebe y’erikwamirira eby’eriyitsemesya n’eby’obutswatswa aliwe iningayowa inganabulirweko.

NGOKU E BIBLIA YAHINDULHA ENGEBE YAGHE:

Omwa 1995, Omwema oyukulire omo myaka mwakongotha okwa lhuyi lhwaghe kandi amanyiha ekitabu ekyabya mw’erisubirya lye Biblia okwa kibulyo, Omundu amaholha akabya omwa mibereki? Olhuholho lhwe aksidenti olhwa munywani waghe lhwabya ilhukina nyilyambaya, neryo mun’imya ekitabu ekyo. Mundasubulira okw’isoma esura eyikakanaya okwa lhuholho nyisa aliwe munasoma ekitabu ekyosi!

Ebyo nasoma mubyasubirya ebibulyo byaghe ebihambire okwa lhuholho. Aliwe mun’igha bingyi kutsibu. Kundi nabya Mukatuliki, erikirirya lyaghe lyabya lihambire kutsibu oku Yesu. Aliwe, eriyithendya okwa Biblia mukyanyiwathikya erikulha-kulhania obunywani bw’ahakuhi na Thatha wa Yesu, Yehova Nyamuhanga. Munatsema kutsibu ingaminya ngoku Yehova athutsomene kandi kw’akathuhira mw’omuhwa w’erimuminya. (Matayo 7:7-11) Mun’igha ngoku Yehova awithe eriyowa. Kandi mun’igha ngoku mughulhu wosi akaberereraya eby’akabugha. Ekyo mukyaleka inganza kutsibu eriminya amaminyereri we Biblia n’erianza eriminya ng’abiribererera athi. Ebya nabana mubyaghumya erikirirya lyaghe omu Nyamuhanga.

Munalhuaho ingaminya ngoku Abema ba Yehova basa babakahiraho akaghalha kanene eriwathikya abandu eriyitheghererya e Biblia. Munahandika amasako awakanganibwe omwa bitabu by’Abema n’eriyasomagho omwa Biblia yaghe y’Ekikatuliki. Nabere ingalholha embere erisosothya, ku nan’ongera indya eriligha ngoku nabiribana ekwenene.

Erigha lyaghe lye Biblia mulyaleka ingaminya ngoku Yehova anzire ingaghendera okwa bihano biwe. Ebyo nasoma omwa Abanya Efeso 4:22-24, mubyaleka ingaminya ngoku ngatholere ingaleka “emibere ya kera,” eyasa busana ‘n’esyongumbu syaghe esikatheba’ kandi ngabya ngatholere ‘eribya mundu muhya-muhya oyuwahangikawa omwa kisosekanio kya Nyamuhanga.’ Neryo munaleka engebe yaghe y’obutswatswa. Kandi munaminya ngoku ngatholere erileka emisathu y’erisathira esyosente, kundi omusathu oyo akakulha-kulhanaya omwa mundu mw’omuthima w’erianza ebindu bya kutsibu n’omururu. (1 Abanya Korinto 6:9, 10) Munaminya ngoku erithoka erikolha esyombinduka esyo, ngabya w’eriyihighulha okwa banywani baghe abakera n’erisondya abanywani bahyaka abakakwama ebihano ebiri ng’ebya nganemukwama.

Erikolha esyombinduka esyo sikyabya kyolho. Aliwe munatsuka erihindana okwa mihindano n’Abema okwa Kisenge ky’Obwami n’eritsuka erisondya abanywani bahyaka omwa kithunga. Kandi munalholha embere eriyighesya ndeke e Biblia ahabwaghe. Ebiika ebyo mubyaleka inahindulha omuziki ogho nabya ingatsemera, erihindulha ebilhubirirwa byaghe omwa ngebe, n’eryuwania emisosere yaghe. Omwa 1995, munabatizibwa ng’omughuma w’okwa Bema ba Yehova.

NGOKU NABIRIGHASIRWA:

Lino ngawithe amalengekania aw’atholere okwa syosente n’okwa bindu. Iningahithana lhuba-lhuba, aliwe lino singakihithana lhuba-lhuba. Kandi singakituntura busana n’obuthuku obukasa.

Ngatsemire busana n’eribya mughuma w’okw’ihiika ly’ekihugho kyosi er’abandu abakakolera Yehova. Omw’ibo ngalhangira abandu abanemughumira ebitsibu aliwe kandi ibanemukolera Nyamuhanga buthaleghulha. Ngayowa ingatsemire kutsibu kundi ngakolesaya kutsibu obuthuku n’akaghalha kaghe kanene okw’iramya Yehova n’erikolera abandi b’ebibuya butsira okw’ighuthya esyongumbu syaghe.

• ABUTHAWA: 1963

• EWABU: ENGLAND

• EBY’ENYUMA: MWATAMWA ENGEBE

ENGEBE YAGHE ENYUMA:

Nabuthirawa e England, aliwe nabere ingahikya emyaka musanju, efamile yethu muyahumira e Australia. Muthwikalha omwa kitsweka ekikahulhawamo Gold Coast, omwanya ow’akahikiramu abaramburi e Queensland, Australia. Nomwakine indi sithwabya bagaga, mughulhu wosi ithukabya ithunawithe ebya thukayithagha.

Nomunanabya omwa ngebe eyuwene, nabya isingatsemire. Munatamwa engebe. Thatha waghe ini muthamiri kutsibu. Isingamuwithire olhwanzo, kutsibu-tsibu busana n’obuthamiri bwiwe n’emibere akathwaliramu mama waghe. Nabere nabiriminya emibere eyo alhabamu iniane musirikali e Malaya, nimonabya ngaminyire ekikaleka iniayithwa-yithwa athya.

Ingane omwa siniya munatsuka eribya inganywa bunene. Nabere ingahikya emyaka 16, munaleka esukuru namayiyunga okwa mahe w’okwa maghetse. Munatsuka ebibatsi ebikathamiraya kandi munabya mukobe w’ethaba. Kandi mun’ongera erinywa bunene. Munalhua okwa ky’erinywa bunene okwa wikendi namabya ingabunywa obuli kiro.

Okw’ihwererera ly’emyaka yaghe y’obulengwa n’okw’itsuka ly’emyaka yaghe ya 20, munatsuka erithika-thikira eribyaho lya Nyamuhanga. Iningayibulhaya; ‘Nyamuhanga amabya inianeho, busana naki inialighira abandu eriaghalhwa n’eriholha?’ Nibya munahandika n’omukya ow’eritsweba Nyamuhanga busana n’obubi obwosi obuli omwa kihugho.

Munalhua omwa mahe w’okwa maghetse ingahikya emyaka 23. Enyuma waho, munakolha emibiiri muthina-muthina nibya n’erighenda omwa bindi bihugho ahabw’omwaka, aliwe sihali ekyanyihumulikanaya. Sinabya ngwithe eriyisunza lyosi ly’erihiraho ebilhubirirwa kutse ly’eribana ekindu kyosi-kyosi. Omo kwenene habya isihali n’ekikanyitsemesaya. Amaha w’eribya n’enyumba, eribya n’omubiiri owuwene, n’erikulibwa okwa mubiiri ebyosi byabya buyira okw’ingye. “Erihumulikana” iningalibana omw’inywa obwabu n’erihulikirira omuziki bisa.

Nangan’ibuka obuthuku obwonyine-nyine obwa nathungiramu eriyisunza linene ly’erianza eribana ekighendererwa ky’engebe. Nabya e Poland, inabiribungira ekambu y’abanya ngomo eyasibwe nabi ng’eyirimo erinuba eyiri e Auschwitz. Nabya ingabirisoma okwa bwithi obukalire obwabyayo. Aliwe omo kwenene nabere ingahikayo n’erilhangira obunene bw’ekambu eyo, munahambwako kutsibu. Nabya isinangayitheghererya ekyanga leka abandu ibakolha abandi ba nabi kutsibu. Ng’ibuka inganemulhaba omwa kambu ebighiri-ghiri ibine omwa meso waghe, inganemuyibulya indi, ‘Busana naki?’

NGOKU E BIBLIA YAHINDULHA ENGEBE YAGHE:

Omwa 1993, inamabirisuba eka, munatsuka erisoma e Biblia erisondya eby’erisubirya. Buthuku buke enyuma waho, Abema ba Yehova babiri mubakongotha okwa lhuyi lhwaghe n’erinyikokya okwa lhuhindano olhwabya omwa kisahu ekya hakuhi n’ewethu. Munathwamu eriyayo.

Habya ihamabirilhaba mezi make nalibere okwa kisahu ekyo ingalebya eby’amasatha, aliwe embaghane eyabya okwa lhuhindano olhu yabya nene kutsibu. Abema babya bolho kandi ibambithe ndeke, n’abaana babu ibawithe esyongeso esyuwene. Kandi munasangalha ingalhangira ebyabya okwa ndambi y’erirya eky’erithungyi. Ebikumi by’Abema mubalira eky’erithungyi okwa kisahu, aliwe babere bakasuba okwa bithumbi byabu, nabya isinangalhangira n’akarofu n’akaghuma ahisi omwa kisahu! Ekikulhu kutsibu, abandu aba ibakalhangirika ibakatsemera ebyo bawithe kandi ku bawithe obuholho​—ekindu ekyo nabya ingakandira. Sind’ibuka omukania wosi-wosi okwa yalhabibawa ekiro ekyo, aliwe emibere y’Abema ba Yehova muyanyihambako kutsibu.

Erigholho-gholho eryo, mun’ibuka omuhughu waghe oyuwasoma e Biblia n’erisoma ebihambire okwa syodini muthina-muthina. Myaka mirebe enyuma, abya iniabirimbwira athi wangana thoka eriminyerera edini y’okwenene okwa mibiiri yayu. (Matayo 7:15-20) Munalengekania indi ngatholere ingaminya ekikaleka Abema ibabya mbaghane. Munayowa ingamathunga amaha awasikire omurundi waghe w’erimbere omwa ngebe.

Ewiki eyakwamako, Abema babiri abanyikokaya okwa lhuhindano mubasubulha. Mubanyibwira bathi bakendibya bak’igha naghe e Biblia, neryo munaligha. Kandi munatsuka erihindana okwa mihindano y’Ekikristayo haghuma nabu.

Nabere nganemw’igha e Biblia, amalengekania ogho nabya ngwithe oku Nyamuhanga mwahindukira ighuma. Mun’igha ngoku siyo akalethaho obubi n’eriaghalhwa kandi ngoku akapona kutsibu abandu bakakolha ebindu bibi. (Enzuko 6:6; Esyonyimbo 78:40, 41) Munathwamu erilengaho erithendi ponesya Yehova. Munanza eritsemesya omuthima wiwe. (Emisyo 27:11) Munaleka erinywa bunene n’erinywa ethaba, kandi munayihighulha okw’isangira omwa by’obutswatswa. Okwakasathu 1994, munabatizibwa ng’omughuma w’okwa Bema ba Yehova.

NGOKU NABIRIGHASIRWA:

Omo kwenene ngatsemire kandi ngatsemera ebya ngawithe. Singakinywa obwabu ng’enzira y’erighunziramo ebitsibu byaghe. Omwakanya k’ekyo, ngabir’igha erighusira Yehova y’amalighe waghe.​—Esyonyimbo 55:22.

Namabirighunza emyaka ikumi ingane omwa butheke na mukali waghe Omwema mubuyanga ya Karen, kandi ngane na mwali wiwe mubuyanga ya Nella. Ithwe bosi basathu thukaghunza obuthuku bunene omwa mubiiri w’Ekikristayo, eriwathikya abandi erigha ekwenene eyihambire oku Nyamuhanga. Lero lino, engebe yaghe yiwithe ekighendererwa.