Mubabana Ekindu Ekilengire
ESYOMILIYONI sy’Abakristayo bakathwamu erithendi sangira omwa Krisimasi. Bakayowa bathi okw’ithwamu lyabu eryo? Mbwino bakayowa ihane ekya bakathalhako? Mbwino n’abaana babu bakayowa ibaliko olhukako? Lebaya ebya Abema ba Yehova erithimba omwa kihugho kyosi bakabugha okwa mwatsi oyu.
Eve
Eryibuka Yesu Kristo: “Inde nabya Mwema wa Yehova, isindi ghenda okwa kanisa kwa buli kiro. Inamaghendayo, iningayayo okwa kiro ky’Ekrisimasi kutse ekye Ista kisa. Nibya n’okwa buthuku obo, omo kwenene isindi lengekanaya n’oku Yesu Kristo. Singakisangira omwa Krisimasi, aliwe ngahindana okwa mihindano y’Ekikristayo kabiri omwa wiki kandi nibya ngakangiriraya abandi okwa bya Biblia yikabugha oku Yesu!”—EVE, AUSTRALIA.
Reuben
Etseme y’erihithya: “Ngatsema abandu bakanyiha ebihembo isingayitsulirye. Ngasima ebyo ngahebawa isingayitsulirye! Kandi nganzire erihandika esyokada n’erithera ebisasani eby’eriha abandi bandu kundi bikaleka ibatsema, kandi naghe ibyaleka ingatsema.”—REUBEN, NORTHERN IRELAND.
Emily
Eriwathikya abawithe obuyithawa: “Thukatsema thukatsumbira abalhwere. Okwa bundi buthuku thukabalethera ebimole, ekeki, kutse akahembo kake akakaleka ibatsema. Thukatsemera eki kundi thwangana bungira abandu abo okwa ndambi yosi-yosi omwa mwaka.”—EMILY, AUSTRALIA.
Wendy
Efamile eribya haghuma: “Efamile yethu yikabya yikabya haghuma, abaana bethu bakaminya abanyoko-lhume, abasungali, abamukaka n’abasokulhu wabu, n’abandi bahughu ithune omwa mibere eyithekene. Kundi sithuwithe biro bikulhu birebe eby’erikolera mw’eki, thukayowa ithuli bwiranda, kandi ab’efamile yethu yinasi ngoku thukababungira kundi thubanzire.”—WENDY, CAYMAN ISLANDS.
Sandra
Obuholho: “Okwa buthuku bw’Ekrisimasi, kikabya nga hali bingyi by’erikolha indi ni bake abakalengekanaya okwa buholho. Nabirigha ekya Biblia yikalhaghanisaya busana n’abandu; ngayowa buholho. Ngasi ngoku abaana baghe bakendi syatsemera obuthuku obukasa obuwene.”—SANDRA, SPAIN.