Erikwamana ne Biblia, abandu bosi ni bakolha-nabi. Muthwasighalya omubere w’erikolha ekibi erilhua okwa mulhume w’erimbere, ya Adamu. Busana n’ekyo, okwa bundi buthuku thukakolha ebindu ebithuwene aliwe enyuma waho ithwayikubyabwomo busana n’ebya thulyakolha. Mughalha wa Nyamuhanga, Yesu Kristo, mwathuthuhira ebibi byethu omw’ithuholera. Ekihongo kiwe eky’endongolya mukyaleka erighanyirwa iryathokekana. Ni kihembo erilhua oku Nyamuhanga.​—Soma Abanya Roma 3:23, 24.

Abandi bandu babirikolha ebibi ebikalire neryo bakabulha Nyamuhanga ng’angana baghanyira. Eky’obutseme, Ekinywe kya Nyamuhanga kikabugha kithi: ‘Omusasi wa Yesu Omughalha wa Nyamuhanga akathweraya kw’ebibi byosi.’ (1 Yoane 1:7) Omw’iyisunza liwe Yehova akaghanyira nibya n’ebibi ebikalire thwamabya ithunawithe omuthima w’eriyisubamo.​—Soma Isaya 1:18.

Thwamabya thwanzire Yehova Nyamuhanga athughanyire, thutholere ithwamw’ighako​—eriyitheghererya esyonzira siwe, erihabulha liwe, n’eby’akayithagha. (Yoane 17:3) Yehova akaghanyira ndeke abakaleka emibere yabu mibi n’erilengaho erikolha esyombinduka.​—Soma Emibiri 3:19.

Ithwe erianza erisimwa na Nyamuhanga si kindu kikalire kutsibu. Yehova anasi obutseke bwethu. Ni w’olhukeri. Mbwino obubuya bwiwe sibuli leka wukanza eriminya bingyi ngoku wanga mutsemesya?​—Soma Esyonyimbo 103:13, 14.