Eritsuka bulere nganzire eby’obuhangwa. Eka yethu iyikayibunga-bungiraya omwa misithu eyuwene n’esyongetse ebithimbire okwa tawuni yethu eya Jyväskylä, omwa Central Finland. Kandi nganzire ebisoro. Ingakine mwana, inganzire erikumbathira okwa kikuba obuli pusu n’embwa ebyo ngabya ingalhangira! Nabere nganemukulha, munayowa nabi ingalhangira emibere eya bandu bakanubirayamu ebisoro. Endambi muyahika, namayiyunga okwa kithongole ekikalhwira obughabe bw’ebisoro, eyo n’eghaya abandu abawithe amalengekania ng’awaghe.

Muthwalengaho kutsibu erilhwira obughabe bw’ebisoro. Muthwalhangira thuthi abandu bakaminya ebihambire okwa bughabe bw’ebisoro n’erithegheka eriyisamambulha n’erikikangania ngoku thuthanzire amaduka awakaghulhaya obweya bw’ebisoro n’esyolabaratore sy’erilengeseryamu emibatsi mirebe okwa bisoro. Nibya muthwatsukisya n’ekithongole kihyaka ekikalhwira obughabe bw’ebisoro. Kundi muthwakolesya amani manene erithoka erihika okwa bilhubirirwa byethu, mughulhu mungyi ithukabana ebitsibu n’ab’obuthoki. Munahambwa n’erithwalhwa omwa koti mirundi mingyi.

Eryongera okw’itsomana emibere ey’ebisoro bikathwalhawamu, ebindi bitsibu by’omwa kihugho ibikanyitabura. Neryo busana n’ekyo, mun’ingira omwa ebithongole bingyi, imwamuli ekya Amnesty International n’ekya Greenpeace. Munahwerya akaghalha kaghe kosi okw’isighika emibiiri yabyo. Iningalhwira okwa banakwa, abathawithe eby’erirya, n’abandi bandu abali omwa mibere eyithuwene.

Aliwe, lyolho-lyolho munakilhangira ngoku sinanga hindulha ekihugho. Nomwakine indi ebithongole ebyo mubyana thoka erikolha okwa hitsibu ehike-hike, ebitsibu ebinene-binene ibyo ibikabya nga bikongera erikalira ighuma. Mukyabya obubi nga bwabiryusulha omwa kihugho kyosi kandi nga sihali n’omundu n’omughuma oyutsomene. Amani mwanyihwa.

Omw’iyiponera busana n’eriminya ngoku sihali ekya nanga kolha, munatsuka erilengekania oku Nyamuhanga ne Biblia. Munan’igha e Biblia n’Abema ba Yehova. Nomwakine indi munaminya ngoku Abema ba Yehova ni b’olhukeri n’erikangania ku banyitsomene, ngabya isingayitheghekire erihindulha engebe yaghe. Lero lino, ebindu mubyahinduka.

Mun’imya e Biblia yaghe n’eritsuka erisomayo. Muyanyihumulikania kutsibu. Munabana omwa Biblia mw’emilhondo mingyi eyikathukangiriraya eritsomana ebisoro. Ng’eky’erileberyako, Emisyo 12:10 hakabugha hathi “abandu babuya bakatsomana ebisoro byabu.” (Good News Translation) Kandi munaminya ngoku ebitsibu ebiri omwa kihugho sibiri lethawa na Nyamuhanga. Aliwe, ebitsibu byethu byabiryongera kutsibu kundi abandu bangyi sibali ghendera okwa busondoli bwiwe. Munahambwako kutsibu ing’igha oko lhwanzo lhwa Yehova n’erighumisirizya liwe.​—Esyonyimbo 103:8-14.

Okwa buthuku obo, munabana efomu ey’ekitabu E Biblia Kwenene Yikakangiriraya Ki? neryo munathumayo. Buthuku buke, omulhume na mukali wiwe Abema ba Yehova mubahika ewaghe, bamanyibwira oko ndegheka y’erigha e Biblia, ekindu ekyo naligha. Kandi munatsuka erihindana okwa mihindano y’Ekikristayo okwa Kisenge ky’Obwami. Busana n’ekyo, munatsuka erianza ebyo nabya ing’igha omwa Biblia.

Busana ne Biblia, munathoka erikolha esyombinduka nyingyi. Munatsira ethaba n’ethamiro. Munuwania emisosere n’emikanirye yaghe. Kandi munahindulha amalengekania agho ngabya ngwithe okwa bathabali. (Abanya Roma 13:1) Kandi munaleka engebe y’eby’obutswatswa eyo nabyamu, ekindu ekyo nabya isinanga thoka eriyikakiryako.

Ekindu ekyanyikalira kutsibu erihindulha kyabya iry’eribya n’amalengekania awatholere okwa bithongole ebikalhwira okwa bughabe bw’abandu n’ebisoro. Mukyathwalha buthuku. Okw’itsuka, munayowa indi namaleka erikolera ebithongole ebyo iningendibya inamabighoberya. Aliwe, munaminya ngoku Obwami bwa Nyamuhanga busa bw’obwanga lhamya ekihugho kyethu. Munathwamu erihwerya akaghalha kaghe kosi okw’isighika Obwami obo n’eriwathikya abandi eribwighako.​—Matayo 6:33.

Ingye ng’oyuwabya akalhwira erilethaho esyombinduka, ininga theka abandu b’omwa gurupu ibiri​—ababuya kutse ababi—​kandi iningabya inganayitheghekire erikolha nabi abo nabya ingathwalha ng’abandu babi. Aliwe busana ne Biblia, singakiponire kutsibu abandi. Omwakanya k’ekyo, ngalengaho erikangania abandu abosi b’olhwanzo lhw’Ekikristayo. (Matayo 5:44) Enguma y’okwa syonzira esyo ngakanganirayamo olhwanzo olhu, ly’eribwira abandi b’engulhu yuwene y’Obwami bwa Nyamuhanga. Ngatsema erilhangira ngoku omubiiri owuwene oyu akaleka ihabya obuholho n’etseme kandi ngoku akaha abandu b’amaha w’okwenene.

Nabirithekana omwa bulengekania busana n’erilekera Yehova y’emyatsi. Nganakyasi ndeke-ndeke ngoku iyo, ng’Omuhangiki, syendi ligha ebisoro n’abandu erikolhwa nabi kera na kera, kandi syendi lighira ekihugho kyethu ekyuwenenga eki kikathoghothibwa. Omwakanya k’ekyo, erilhabira omo Bwami bwiwe, akisiya iniasuba-subania ebyosi ebyabiritsandibwa. (Isaya 11:1-9) Kikanyitsemesaya kutsibu eriminya ekwenene eyi n’eriwathikya abandi erilighayo. Singakiyowa indi ngatholere inahindulha ekihugho.