“Sithuli thwathalighirana nga thwangana hulha erina lya Nyamuhanga, kandi kyamabya kithya, erina eryo ly’eryahi.”​—Professor David Cunningham, Theological Studies.

Nyamuhanga mwabugha athi: “N’ingye Yehova. Eryo ly’erina lyaghe.” (Isaya 42:8, NWT) Yehova ni rina ly’Ekihebrania erikamanyisaya “Akaleka Ikyabya.”

Yehova anzire ithwakolesya erina liwe. E Biblia yikabugha yithi ‘mulhakire erina liwe, mukangaye emibiiri yiwe omwakathi-kathi k’ebihanda, muthulegho muthi erina liwe lyabirihamibwa.’​—Isaya 12:4.

Yesu mwakolesya erina lya Nyamuhanga. Omwa musabe wiwe, Yesu mwabwira Yehova athi: “Nabiriminyikalya erina lyawu kubo [abigha ba Yesu] kandi nasyaliminyikalya.” Busana naki Yesu mwaminyikalya erina lya Nyamuhanga okwa bigha biwe? Mwongerako athi: “Nuku olhwanzo olho wanyanzamo lhubabyemu naghe erimathana nabu.”​—Yoane 17:26, NWT.

“Omundu oyuthasi erina lya Nyamuhanga, omo kwenene akabya isyamwasi, kandi syanga mwanza, amabya iniamwasi ng’akaghalha buyira,” oyusomire eby’edini ya Walter Lowrie athya.

Omulhume oyukahulhawamo Victor iniakaghenda okwa kanisa obuli wiki, aliwe omo kwenene iniakayowa isyasi Nyamuhanga. Akabugha athi, “Neryo munaminya ngoku erina lya Nyamuhanga ni Yehova, kandi mwayowa ini rina ly’omundu w’ekitsumbi. Munayowa erighunzerera nga namabanangana n’omundu oyo nabiryowako kutsibu. Munamulhangira ini mundu oyuliho kandi namatsuka eribya munywani wiwe.”

Na Yehova nayu akayithunda hakuhi n’abakakolesaya erina liwe. Bikahika okwa “bakasima erina liwe,” Nyamuhanga akalhaghanisaya athi: “Nasyaghanyirabo, ng’omundu kw’akaghanyira mughalha wiwe oyukamukolera.” (Malaki 3:16, 17) Kandi Nyamuhanga akahemba abakabirikira okwa lina liwe. E Biblia yikabugha yithi: “Obuli mundu oyukalhakira erina ly’Omukama asyalhamibwa.”​—Abanya Roma 10:13.