Edini y’Ekikristayo “omwa miringo yayu isathu emikulhu-mikulhu ey’Ekikatuliki, Ekiothodoksi, n’Ekipira yikabugha yithi Nyamuhanga ni Busathu: Nyamuhanga Thatha, Nyamuhanga Mwana, na Nyamuhanga Mulimu Abuyirire. Erikwamana n’engangirirya eyi, si bugha ambu aba ni banyamuhanga basathu aliwe ni basathu omwa mughuma.”​—The New Encyclopædia Britannica.

Yesu, Mughalha wa Nyamuhanga, mwathabugha athi ingene na Thatha wiwe. Aliwe mwabugha athi: “Ngaya oku Thatha; kusangwa andengire.” (Yoane 14:28) Kandi mwabwira omughuma w’okwa bigha biwe athi: “Ngahethukira oku Thatha waghe, na Thatha wenyu, n’oku Nyamuhanga waghe, n’oku Nyamuhanga wenyu.”​—Yoane 20:17.

Omulimu abuyirire si mundu. Abakristayo ab’erimbere ‘mubusulibwa n’omulimu abuyirire,’ kandi Yehova mwababwira athi: ‘Nasyuthulira omulimu waghe oko bandu bosi.’ (Emibiri 2:1-4, 17) Omulimu abuyirire si kitsweka ky’okwa Busathu. Ni kaghalha ka Nyamuhanga akakakolha.

Abasomi Abakatuliki ya Karl Rahner na Herbert Vorgrimler, bakabugha bathi, Obusathu “sibwangaminywa ahathe eribisulirwa, kandi nibya nomuhangabya eribisulirwa sibwanga yitheghereribwa ndeke.” Kwenene iwananza omundu oyo kithathokekene eriminya kutse eriyitheghererya? Kwesi engangirirya y’Obusathu, yikakakiraya abandu eriminya n’erianza Nyamuhanga.

Marco, oyo thulyakanayako okw’itsuka, mwalhangira Obusathu ibukamukakiraya. Akabugha athi, “Iningalengekanaya indi Nyamuhanga syanzire nga muminya, kandi ekyo mukyaleka ingayowa iniali haali kutsibu, isyanga yitheghereribwa, kandi isinangamuhikira.” Aliwe, “Nyamuhanga si Nyamuhanga oyuthekengeka.” (1 Abanya Korinto 14:33, American Standard Version) Syathathubisama. Anzire ithwamuminya. Yesu mwabugha athi: “Thukaramaya ekyo thwasi.”​—Yoane 4:22.

Marco akabugha athi, “Nabere naminya ngoku Nyamuhanga si Busathu, munatsuka eribya munywani wiwe.” Thwamalhangira Yehova ini Mundu oyuliho butsira ng’ekindu ekithekengeka, ikikendi thwolhobera erimwanza. E Biblia yikabugha yithi: “Oyuthyanza syali athaminya Nyamuhanga kusangwa Nyamuhanga ni lhwanzo.”​—1 Yoane 4:8.