“Abandu ababirikolha ekibi bakabya bakaholha, aho naho ebirimu byabu bikaghenda omwa muliro, eyo bakaghalhawa omw’isuyirwa kera na kera.” (Catechism of the Catholic Church) Abandi bakangirirya b’amadini bakabugha bathi abali omwa muliro bakabya ibabirisolholhwa n’erighabulirwa ighuma oku Nyamuhanga.

Abaholi “sibasiki.” (Omugambuli 9:5) Abaholi bamabya isibasiki, bangaghalhwa bathi omwa “muliro” kutse eribya omwa bulhumi bw’erighabulhwa kera na kera oku Nyamuhanga?

Omwa Biblia, ekinywe ky’Ekigiriki ekya Ge′en•na ekikahindulhawamo “ekulimu” omo Biblia y’Ekinandi eye 1980, kik’imanira erithoghothibirwa ighuma, isihali maha w’erilhubuka, si mwanya w’eriaghalirwamu kera na kera omwa muliro. (Matayo 5:29) E Biblia kandi yikakanaya okwa “ngetse y’omuliro n’obusungu.” (Eribisulirwa 20:10) Aliwe, e Biblia yikasoborera ekyo kikamanyisaya yikabugha yithi: “Olho lhw’olhuholho lhwakabiri.” (Eribisulirwa 21:8) Neryo kwesi, si mwanya hene-hene owali mw’omuliro, ogho bandu bakahiramu. ‘Eriaghalhwa kera na kera’ omo ngetse y’omuliro kikamanyisaya erihikwako “olhuholho lhwakabiri” olhutheko erilhubuka

Omubere w’erithendikwa bulighe syali thuthunda oku Nyamuhanga; aliwe akathughabulha okw’iyo. Rocío, oyuwikere e Mexico, akabugha athi, “Nakangiriribawa engangirirya y’omuliro wa kera na kera eritsuka bulere. Iningakwa obuba bunene ingalengekania ngoku Nyamuhanga syawithe n’omubere wosi-wosi owuwene. Iningalengekanaya indi ahithene kandi syawithe obughanyiri.”

Ebya Biblia yikabugha ebilhangirikire ndeke ebihambire okw’itswera lya Nyamuhanga n’emibere y’abaholi mubyahindulha amalengekania agho Rocío awithe oku Nyamuhanga. Akabugha athi, “Munayowa bwiranda​—namayowa inamalhusibwako omuheke munene. Munatsuka eriyikethera ngoku Nyamuhanga akathusunzira ebibuya, athwanzire, kandi ngoku naghe nanganamwanza. Ali nga thatha oyukahamba abaana biwe b’okwa kuboko kandi oyukabasunzira ebibuya.”​—Isaya 41:13.

Abangyi babirilengaho eriyihira oku Nyamuhanga busana n’erisagha omuliro wa kera na kera, aliwe Nyamuhanga syanzire wukamukolera busana n’erimusagha omwa nzira ng’eyo. Omwakanya k’ekyo, Yesu mwabugha athi: ‘Wutholere iwanza Yehova Nyamuhanga wawu.’ (Mariko 12:29, 30) Eryongera okw’ekyo, munabwire thukabya thukaminya ngoku Nyamuhanga syalikolha ebithathunganene, thukayikethera eritswera liwe ery’obuthuku obukasa. Ng’omunywani wa Yobu ya Elihu, thwangana bugha ithunasikire thuthi: “Kibye hali oku Nyamuhanga erikolha ebibi, n’oko Muthoki w’Ebyosi erihalya.”​—Yobu 34:10.