Kiro kighuma e Yerusalemu, Yesu abya inianemukania oku Thatha wiwe, Yehova, kandi inianemubisulha amabehi w’abakulhu b’edini ab’omwa buthuku bwiwe. (Yoane 8:12-30) Eby’abugha okwa kiro ekyo bikathweghesaya ngoku thwanga lebya ndeke ebyo bandu bikirirye munabwire ebihambire oku Nyamuhanga. Yesu mwabugha athi: “Mwamabya mukakwama ebinywe byaghe, imuli bigha baghe kwenene. Kandi mwasyaminya ekwenene, n’omwatsi w’ekwenene asyabaha obwiranda.”​—Yoane 8:31, 32.

“Mwamabya mukakwama ebinywe byaghe.” Hano Yesu akahiraho olhulengo olhw’erikolesya erilebya esyongangirirya sy’amadini nga nina “kwenene.” Omughulhu wukowa omwatsi oku Nyamuhanga, yibulhaye, ‘Mbwino omwatsi oyu anahambene n’ebinywe bya Yesu n’ebindi ebiri omwa Masako Abuyirire?’ Gherereraya abowa omukwenda Paulo akabugha kandi abasondaya “omo Masako obuli kiro erirebya emyatsi eyi [eyo babya bak’igha] nga ni kwenene.”​—Emibiri 17:11.

Marco, Rosa, na Raymonde, abali omo mwatsi w’erimbere omwa myatsi eyikwamangene eno, mubalebya ndeke ebyo babya bikirirye omw’igha e Biblia n’Abema ba Yehova. Mubaminyaki?

Marco: “Oyuwabya akathweghesya iniakakolesaya Amasako erisubirya obuli kibulyo ekya mukali waghe abya akabulya. Olhwanzo olhwa thwabya thuwithire Yehova mulhwatsuka eryongera, kandi ingye na mukali waghe muthwongera erianzana!”

Rosa: “Okw’itsuka, iningalengekanaya indi e Biblia ni kitabu buyira ekikanza erisoborera Nyamuhanga omw’ikolesya amenge w’abandu. Aliwe lyolho-lyolho, munabana eby’erisubirya bye Biblia okwa bibulyo byaghe. Lino Yehova ni munywani waghe. Ni mundu oyo nanga yikethera.”

Raymonde: “Munasaba Nyamuhanga indi angwathikaye ngamwigheko. Buthuku buke enyuma waho, ingye na mwira waghe muthwatsuka erigha e Biblia. Erighunzerera muthwigha ekwenene eyihambire oku Yehova! Muthwatsema kutsibu thukaminya Nyamuhanga nga ni mundu oyuli athi.”

E Biblia siyirisubulira okw’ibisulha amabehi awahambire oku Nyamuhanga; yikabisulha ekwenene eyihambire okwa mibere yiwe mibuyanga. Ni Kinywe kiwe ekyasondolibawa n’omulimu, kandi yikathuwathikaya “eriminya emyatsi eya Nyamuhanga athuha omwa lhusunzo,” ni bugha ambu, eriyitheghererya ekwenene eyihambire oku Nyamuhanga n’ekighendererwa kiwe. (1 Abanya Korinto 2:12) Busana naki iwuthayileberya eriminya ngoku e Biblia yangana subirya ebibulyo ebya buli kiro kandi nibya ebikulhu-bikulhu ebihambire oku Nyamuhanga, ekighendererwa kiwe, n’obuthuku bwethu obukasa? Soma eby’erisubirya okwa bighuma by’okwa bibulyo ebi omwa “Esyongangirirya sye Biblia > E Biblia Erisubirya Okwa Bibulyo” okwa www.pr418.com. Kandi wangana saba eryeghesibwa e Biblia okwa muthahulha oyo kutse n’omughuma w’okwa Bema ba Yehova. Thuyikethere thuthi wamakolha ekyo, ikikendi kwolhobera erianza Nyamuhanga kwilhaba ngoku wabya wukalengekania.