OMWATSI OKWA KIDIPA | AMABEHI AWAKALEKA NYAMUHANGA INIABYA NGA SYAWITHE OLHWANZO
Ekikaleka Ikyakalira Abangyi Erianza Nyamuhanga
“Neryo mwamubwira athi, wanze Omukama Nyamuhanga wawu n’omuthima wawu wosi, n’ekirimu kyawu kyosi, n’obulengekania bwawu bwosi. Ekihano kikulhu n’eky’erimbere ky’ekyo.”—Yesu Kristo, 33 E.K. *
Kikakalira abandi erianza Nyamuhanga. Bakalhangira nga kikalire kutsibu erimuyitheghererya, ng’ali haali kutsibu, kandi ng’oyuthekwa obulighe. Thalengekania okwa bya bughawa bino:
“Munasaba Nyamuhanga indi anyiwathikaye, aliwe kandi munayowa ng’ali haali kutsibu, nga sikyanga thokekana erimuhikira. Okw’ingye, iningalengekanaya indi Nyamuhanga syawithe eryowa lyosi-lyosi.”—Marco, Italy.
“Nomwakine indi kwenene nabya nganzire erikolera Nyamuhanga, mwabya ng’ali haali kutsibu. Munalengekania indi ni Nyamuhanga oyutsurumire oyukabera erithusuyira lisa. Isindi ligha indi akanakwira abandu b’obulighe.”—Rosa, Guatemala.
“Ingakine mulere, ing’ikirirye indi Nyamuhanga akathusondekanayamo ebisobyo, eribya inianayitheghekire erithusuyira kyamabya ikitholere. Enyuma waho, munamulhangira nga syatsomene. Munalhangira Nyamuhanga ng’omukulhu w’abaminista oyukasondolha emyatsi y’abandu aliwe isyabatsomene nahake.”—Raymonde, Canada.
Wukalengekanaya wuthiki? Mbwino kinathokekene erianza Nyamuhanga? Abakristayo babiribulya ekibulyo ekyo habw’emyaka mingyi. Erithwalira haghuma, omo myaka eya 500-1500 E.K., abandu bangyi omwa Kristendomu isibalisaba Nyamuhanga Omuthoki w’Ebyosi. Busana naki? Abandu ibakamusagha kutsibu. Oyusomire ebya kera ya Will Durant mwakibugha omwa nzira eno: “Omukolha-nabi buyira angathoka athi erisaba Nyamuhanga oyukubahisaya kandi oyuli haali kutsibu?”
Busana naki Nyamuhanga iniakalhangirawa “ng’oyukubahisaya kandi ng’oyuli haali”? E Biblia kwenene yikakangirirayaki oku Nyamuhanga? Mbwino eriminya ekwenene eyihambire oku Nyamuhanga kyangana leka iwamwanza?
