Michelle: Kodi, Sophia. Wuneko?

Sophia: Thuneyo.

Michelle: Omughulhu nabya hanu, muthwakania Nyamuhanga ng’akayowa athi thukaghalhwa. Muwabugha wuthi ekyo wabiriyibulyakyo habw’omughulhu muuli, kutsibu-tsibu omughulhu mama wawu atomerawa n’ematoka. Neryo ibbwa, mama wawu aneyo athi?

Sophia: Hakanayira iniabya ndeke n’ebindi biro ibyaghana. Munabwire ane ndeke.

Michelle: Hakiri bathami. Kitholere eribya ikikalire erithekana omwa birengekanio omwa mibere ng’eyi.

Sophia: Kwa bine bithya. Okwa bundi buthuku nganabulha ng’akendi syaghalhwa erihika mughulhu wahi.

Michelle: Eriyowa wuthya ni kindu kya buli kiro. Wungan’ibuka omughulhu nabya hano, munakusighira ekibulyo ekihambire okwa kikaleka Nyamuhanga inialighira eriaghalhwa lilhole lithya embere kandi nibya inianawithe amaaka w’erilighunzaho.

Sophia: Ee, ngakin’ibukire.

Michelle: Thuthali thwakania okwa kya Biblia yikasubiraya, thuthatsuka eriyibukya esyonzumwa nyike okwa bya thw’igha.

Sophia: Kale.

Michelle: Ekiro ekyo muthw’igha ngoku nibya n’omulhume omuthaleghulha omwa Biblia mwayibulya ekikaleka Nyamuhanga inialekereraho eriaghalhwa. Nomwabine, Nyamuhanga mwathamutsumanga athi ng’akabulhaya athya busana naki, kutse mwathabugha athi omulhume oyo akayithagha eryongera erikirirya liwe.

Sophia: Ekyo kyabya kihyaka okw’ingye.

Michelle: Kandi muthwaminya ngoku Yehova Nyamuhanga akapona akalhangira ku thukaghalhawa. Ng’eky’erileberyako, e Biblia yikabugha yithi abandu biwe ibakabya bakaghalhwa, “nayu mwaghalhwa.” * Mbwino sikirihumulikanaya eriminya ngoku Nyamuhanga akayowa nabi thukaghalhwa?

Sophia: Kikahumulikanaya.

Michelle: Erighunzerera, muthwalhangira ngoku thwamalengekania okwa buthoki bunene kutsibu obwa Omuhangiki wethu awithe, ahathe erithika-thika awithe amaaka aw’eryingira omo myatsi n’erighunzaho eriaghalhwa lyethu okwa ndambi yosi-yosi.

Sophia: Ekyo kya ngatheyitheghereraya. Busana naki Nyamuhanga akalighira ebindu ebibi byosi ebi eribya kandi inianawithe amaaka w’eribighunzaho?

Michelle: Thwangana tsuka erisondya eky’erisubirya okwa kibulyo kyawu omw’ilebya ebiri omwa kitabu ky’erimbere ekye Biblia, Enzuko. Wunasi omwatsi ow’ahambire oku Adamu na Eva n’ekighuma ekyathangawa?

Sophia: Ee, omwatsi oyo nganasigho. Nyamuhanga mwabugha athi isibalya okwa muthi mulebe, aliwe mubathwamu erirya kugho.

Michelle: Ekyo ni kwenene. Lino thulebaye ebyaleka Adamu na Eva ibakolha erilholho. Ebindu ebi bihambire okwa kikaleka ithwaghalhwa. Thathusomera Enzuko sura 3, omulhondo 1 erihika 5?

Sophia: Kale. “Nikwa enzoka yabya n’amenge kwilhaba esyonyama syosi sy’omwali esyo Omwami Mukulhu abya inyabirihangika. Neryo muyabugha n’omukali, yithi, egha, ko Nyamuhanga abiribugha athi, simusyerya okwa mithi yosi y’eririma kwehi? Omukali mwasubirya enzoka athi, thwanganalya okwa bighuma by’emithi y’omw’irima, nikwa okwa bighuma by’omuthi owali omwa kathi-kathi k’eririma, Nyamuhanga abiribugha athi, simusyerya kubyo, kutse simusyathulha kugho, mukasyaholha. Enzoka muyabugha n’omukali yithi, simwendi syaholha n’ahake. Kusangwa Nyamuhanga anasi ekiro mwasyalya kubyo, ameso wenyu asyalibulhwa, kandi ko mwasyabya nga Nyamuhanga, imwabya n’eriminya ekibuya n’ekibi.”

Michelle: Wasingya. Thuthalengekania okwa milhondo eyi. Wanamalhangira ngoku enzoka muyakania n’omukali, ya Eva. Ekindi kitsweka kye Biblia kikakanganaya ngoku abya ini Sitani Diabolo owenyine-nyine oyuwakanaya n’omukali erilhabira omwa nzoka. * Sitani mwabulya Eva okwa kihano ekihambire okwa muthi mulebe. Muwukan’owa Nyamuhanga nga mwabugha athi ni kyahi ekyangabere Adamu na Eva ku balya okwa muthi oyo?

Sophia: Bangaholire.

Michelle: Kya n’ekyo. Neryo omwa binywe biwe ebikakwamako, Sitani mwabugha oku Nyamuhanga kw’amabehi awakalire. Thalhangira eby’abugha: “Simwendi syaholha n’ahake.” Sitani abya iniali okw’ibugha athi Nyamuhanga ni mubehi!

Sophia: Nabya isindi nathowa omwatsi oyo erilhua enyuma.

Michelle: Kandi Sitani abere akabugha athi Nyamuhanga ni mubehi, abya iniamahulhukyaho omwatsi owangayithaghire obuthuku ndeke erighunzaghoho. Wanganaminya nga ni busana naki?

Sophia: Hmmm. Singasi.

Michelle: Ok, leka thuthakania okwa nzumwa eyo omwa nzira eno. Thuthabugha thuthi kiro kighuma ingakuhikako n’eribugha indi ngawithe amani ku kwilhaba. Wanga kolhaki erikangania ku nga wire?

Sophia: Iningendi kuha eky’erikulengeseryako.

Michelle: Kya n’ekyo. Obundi ithwangana sondya ekindu ekirithohire neryo ithwalebya nga nindi okw’ithwe oyukendi thoka erikisumba. Omo kwenene ikikendiolhoba eriminya oyuwithe amani nga nindi.

Sophia: Namayitheghererya.

Michelle: Aliwe ibbwa omwakanya k’eribugha indi ngawithe amani manene ingabugha indi ngali mw’okwenene ku kwilhaba? Ekyo ibbwa isikikendi kalha, kwa bithe?

Sophia: Ee.

Michelle: Kundi ibbwa, eribya mw’okwenene si kindu ekiri ng’eribya n’amani, ekindu ekya wangathoka erikakasya aho n’aho.

Sophia: Ekyo ni kwenene.

Michelle: Omo kwenene, enzira nguma y’erikakasiryamo ekyo ly’erileka halhabe obuthuku obukaghunza nuku abandi bayilhangirire okw’ithwe babiri oyuli mw’okwenene nga nindi.

Sophia: Ekyo kihikire.

Michelle: Neryo thasyalengekanaya oko mwatsi oyu owali omwa Nzuko. Mbwino Sitani mwabugha athi awithe amani kwilhaba Nyamuhanga?

Sophia: Eyihi.

Michelle: Nyamuhanga angalhuireho iniakangania Sitani kw’awire. Aliwe ibbwa, Sitani mwabugha athi ali mw’okwenene kwilhaba Nyamuhanga. Ni bugha ambu mwabya ng’oyukabwira Eva athi, ‘Nyamuhanga akakutheba, aliwe ingye ngakubwira ekwenene.’

Sophia: Monza bbali.

Michelle: Omw’ilhangira liwe, Nyamuhanga mwaminya ngoku ni kibuya erileka obuthuku bulhabe erighunzaho ekitsibu ekyo. Erighunzerera, kyangaminyikere oyuwabugha ekwenene n’oyuwabugha amabehi nga nindi.

Sophia: Neryo Eva abere akaholha, mbwino ekyo mukithakangania ngoku Nyamuhanga yuwabugha ekwenene?

Michelle: Ee, kabbisa. Aliwe habya ihakine bingyi ebikahika okwa ekya Sitani abugha. Thalebaya ebiri omwa mulhondo wa 5. Wanamalhangira ekindi ekya Sitani abwira Eva?

Sophia: Mwabugha athi amalya okwa kighuma, ameso wiwe iniakendi libukalha.

Michelle: Wasingya, kandi athi angabere ‘nga Nyamuhanga, iniabya n’eriminya ekibuya n’ekibi.’ Neryo aho Sitani abya iniali okw’ibugha athi Nyamuhanga akima abandu b’ekindu kibuya.

Sophia: Namalhangira.

Michelle: Ekyo nakyo abya mwatsi mukulhu.

Sophia: Wukamanyisayaki?

Michelle: Omwa binywe biwe, Sitani abya iniali okw’ibugha athi Eva​—imwamune n’abandu abosi—​bangabere ndeke ahathe obuthabali bwa Nyamuhanga. N’omw’eki, Yehova mwaminya ngoku enzira mbuya y’erighunziramo omwatsi oyu ly’erileka Sitani alengesaya erikangania ngoku eby’abugha bihikire. Neryo Nyamuhanga abirilighira Sitani erithabalha ekihugho kino habw’obuthuku. Ekyo kikasoborera ekikaleka ihabya ebitsibu binene​—kundi Sitani yukathabalha ekihugho kino, butsira Nyamuhanga. * Aliwe hane engulhu yuwene.

Sophia: Ni yahi?

Michelle: E Biblia yikakangiriraya emyatsi ibiri eno ey’ekwenene oku Nyamuhanga. Ow’erimbere, Yehova akahambawako akalhangira ku thukaghalhawa. Ng’eky’erileberyako, lengekanaya okwa binywe by’Omwami Dawudi ebiri omwa Esyonyimbo 31:7. Dawudi mwabana ebitsibu bingyi omwa ngebe yiwe, aliwe thalhangira eby’abugha akasaba Nyamuhanga. Wangana thusomera omulhondo oyo?

Sophia: Kale. Hathi: “Nasyatsema n’eritsanga omo bubuya bwawu bw’olhwanzo; kusangwa wukalhangira obulighe bwaghe, kandi wasi omunubo w’omuthima waghe.”

Michelle: Neryo nomwakine indi Dawudi mwaghalhwa, mwahumulikana omw’iminya ngoku Yehova analhangire ebyosi ebyo abya akalhabamo. Ekyo sikyathakuhumulikania​—Yehova eribya inianasi obuli kindu, nibya n’obulhumi obwa thuwithe omo muthima obwa bandi bathe banga yitheghererya ndeke?

Sophia: Ee, kabbisa.

Michelle: Omwatsi w’ekwenene owakabiri ali athi Nyamuhanga syendi syaleka thughalhawe kera na kera. E Biblia yikakangiriraya yithi akisiya iniaghunzaho obuthabali bubi bwa Sitani. Kandi akendi syaghunziraho ighuma ebindu bibi ebyosi ebikabya, imwamune n’ebitsibu ebyo iwe na mama wawu munemulhabamo. Nganasyasa eyindi wiki erikukangania ekikaleka ithwakakasya ngoku Nyamuhanga akisiya iniaghunzaho eriaghalhwa lyosi? *

Sophia: Ee wusyasa.