Ingabuthwa, ababuthi baghe babya ibanewithe eririma like omwa kyalu mwe Galicia, omwa bitsweka by’eyighulhu ebye Spain. Nabya mwana wakani omwa baana munani. Thwabya omwa ngebe eyitsemire. Okwa buthuku obo omwa Spain, hakiri omwana mughuma mw’eka iniakabya iniabirighenda okwa siminare kutse okwa bwikalho bw’abasista. Omw’eka yethu, abasathu b’okw’ithwe mubakwama nzira eyo.

Nabere ingahikya emyaka 13, munayiyunga oko mwali wethu ingaya omwa bwikalho bw’abasista e Madrid. Emibere yayu isiyiritsemesaya. Isiyiri obunywani​—iyiri ebilhaghiro bisa-bisa, emisabe ya buli ndambi, kandi isiyiri n’erisatha. Obuli ngyakya-ngyakya, ithukahindana haghuma busana n’erighanirya, nomwakine indi mughulhu mungyi isihalibya ekya ngalengekanayako. Enyuma waho, ithukimba esyonyimbo sy’edini n’eribya n’ekisomo, ebyosi omwa Lhulatin. Isindiyitheghereraya kindu neryo iningayowa Nyamuhanga ngali haali okw’ingye. Yabya ngebe eyikalire okw’ingye. Nibya n’omughulhu thukasanga-sangana na mwali wethu, ithukakwama kyaramukania thuthi, “Wusikibawe Maria mubuyirire.” Abasista ibakathulighira erikania habw’embindi y’esaha nyisa thukaghunza erirya. Ekyo ka kyabya mbaghane okwa ngebe yethu y’eka eyitsemire! Embwera muyabya nene kandi iningabera erilira.

Nomwakine indi iningayowa isingali bughuma ndeke na Nyamuhanga, munalhahirya, namabya musista oko myaka 17. Omo kwenene, iningakwama ky’erikolha ebyabakanyiyithaghako, aliwe buthuku buke namatsuka eriyibulya kwenene-kwenene eki nga kya Nyamuhanga akanyisunzira. Abasista ibakabera eribugha bathi abawithe erithika-thika ng’eryo bakendi syaya omwa muliro wa kera na kera! Nomwabine, erithika-thika eryo mulyalholha embere. Nabya inganasi ngoku Yesu Kristo mwathayighabulha okwa bandi; omwakanya k’ekyo, iniakabya iniane mukangirirya n’eriwathikya abandi. (Matayo 4:23-25) Nabere nahikya myaka 20, nabya isingawithe enzumwa eyilhangirikire eyangaleka ingabya ingane musista. Eky’eriswekya, omukulhu w’abasista mwambwira athi namabya ingali kange-kange, ni kibuya eribikyako aho n’aho. Ngalengekanaya mwasagha athi amalengekania waghe angana hamba okwa bandi. Neryo munalhuayo.

Nabere ingasuba eka, ababuthi baghe mubanyiyitheghererya. Aliwe kundi omwa kyalu simwabya omubiiri w’erikolha, munaghenda e Germany, eyo mughalha wethu abya ikere. Abya omwa gurupu ey’Ekikoministi ey’Abaspanish ababirihumirayo. Munayowa buholho omwa bandu abo abakalhwira obughabe bw’abakoli n’obw’abakali. Neryo munabya Mukoministi n’erighunzerera munathahibwa n’omughuma w’okw’ibo. Iningalengekanaya indi nganemukolha ekitholere erighaba ebitabu by’egurupu eyo n’erisangira omw’iyisamambulha lyabu.

Aliwe, endambi muyahika, kandi namahwa amani. Iningayowa egurupu eyo mughulhu mungyi iyikalemawa erighendera okwa bya yikabugha. Erithika-thika eryo mulyayongera omwa 1971 eminyethu mirebe y’omwa gurupu yethu yakathimya e embase eye Spain omwa Frankfurt. Bakolha ekyo busana n’obuthe bulingirirania omwa kihugho kye Spain. Aliwe munalhangira eyi isi nzira eyuwene ey’erisonderyamu obulingirirania.

Nabere ingabutha omwana waghe w’erimbere, munabwira mwira waghe indi ngayaleka erighenda omwa syomitingi sy’Abakoministi. Munayowa ingali ingyuwene kundi isihali n’omughuma w’okwa banywani baghe abakera oyukasyanyilebaya n’omwana waghe. Munabulha ekighendererwa ky’engebe nga ni kyahi. Mbwino hane omughaso wosi-wosi w’erilengaho eryuwania ekihugho?

Omwa 1976, Abema babiri abe Spain mubakongotha okwa lhuyi lhwethu n’erinyisighira ekitabu ekiseghemere okwa Biblia, ekyo naligha. Babere bakathasya subulha omurundi owakabiri munababulya ebibulyo ekindi omwa kindi ebihambire okw’ighalhwa, akasolholho, n’obuthe bulingirirania. Munasweka ingalhangira ku bakakolesaya e Biblia erisubirya obuli kibulyo! Munalhuaho ingaligha erigha e Biblia.

Okw’itsuka, munatsemera erithaminya ekwenene. Aliwe ebindu mubyahinduka omughulhu ingye na mwira waghe thwatsuka erihindana okwa mihindano okwa Kisenge ky’Obwami eky’Abema ba Yehova. Okwa buthuku obo, thwabya thuwithe abaana babiri. Omwa lhukeri, Abema ibakasyathwenda omwa matoka yabu n’erithuwathikya eritsomana abaana bethu omwa mihindano. Munatsuka erianza Abema.

Nomubyanabya bithya, nabya ingakina thika-thikira eby’edini. Munathwamu eriyalebya ab’efamile yaghe e Spain. Thatha waghe omulere, omufaza, mwalengaho erinyilemesya erigha e Biblia. Aliwe Abema ab’ewethu mubanyiwathikya kutsibu. Mubasubirya ebibulyo byaghe omw’ikolesya e Biblia ngoku Abema abe Germany banakolha. Nabere ingasuba e Germany, munathwamu erithasyatsuka erigha lyaghe lye Biblia. Nomwakine indi mwira waghe mwaghana erilholha embere n’erigha e Biblia, ingye munaghendera okw’ithwamu lyaghe. Omwa 1978, munabatizibwa ng’Omwema wa Yehova.

Eriminya erihikire ery’ekwenene ye Biblia lyabirimba ekighendererwa omwa ngebe. Ng’eky’erileberyako, 1 Petero 3:1-4 hakahira omwa bakali mw’omuhwa ‘w’eriowa’ abira babu omw’ibasikya kutsibu n’erikulha-kulhania ‘obubuya bw’ekirimu ekihehere.’ Obubuya obwo ni bw’obughuli bunene embere sya Nyamuhanga.’ Omusingyi ng’oyo abirinyiwathikya eriberererya olhukwamirwa lhwaghe ng’omukali omuthahibwa kandi mama.

Emyaka nga 35 yamabirilhaba erilhua aho ngathabera Mwema. Ngatsemire erikolera Nyamuhanga ng’omughuma w’okwa lhughanda lhw’obunyakirimu olhw’ekwenene, kandi ngatsemire eribya abbani b’okwa baana baghe bathanu banemukolha ikyan’ekyo.