Nabuthawa n’erikulira omwa kyalu kye Rome, ekitsweka ekiri mw’abanakwa. Engebe yabya yikalire. Isingasi mama waghe owanyine-nyine, kandi isingalikolongana ndeke na thatha waghe. Eritsuka omo bwana mun’igha eribyaho omwa mibere eyikalire.

Nahikaya emyaka ikumi inabiritsuka obwibi. Nabere ingahikya emyaka 12, munalhua eka omurundi w’erimbere. Mirundi nga y’eyo, thatha iniakabya w’erisyanyenda okwa ofisi ngulhu ey’epolisi n’erinyisubya eka. Mughulhu mungyi ininga toka n’abandu​—nabya mutsurumi kandi mutsururu. Nabere ingahikya myaka 14, munalhuir’eka y’ighuma. Munatsuka erinywa ethaba kandi isingawithe ah’eribya. Kundi isingwithe ah’erikesya, iningathulha ematoka y’omundu n’erighotseramu erihika omwa ngyakya-ngyakya. Neryo iningasondaya ahali amaghetse nuku nanganaba.

Munabya mwibi kondo​—eriba ekyosi-kyosi omwa syobbaga sy’abandu n’erithulha amanyumba w’abandu owuwene omwa kiro. Abandu mubatsuka erinyiminya ku ngali mundu mubi kutsibu neryo muhathalhaba buthuku ngathe ng’ingira omwa kigurupu ekikalire kutsibu, ekyaleka ingathunga “akaghisa” k’eriba esyobbank. Busana n’obutsurumi bwaghe bunene kutsibu, ab’omwa kigurupu kyethu mubanyisikya kutsibu. Isindi ghenda ahosi-hosi isingwithe embundu; erithwalira haghuma, iningaghotsera iyine okwa museghemu. Obutsurumi, erinywa ebibatsi ebikathamiraya, obwibi, emibughire mibi, n’obutswatswa y’eyabya ngebe yaghe. Mughulhu wosi epolisi iyikabya iyinemunzondya. Munahambwa mirundi mingyi, kandi munahirwa omwa ngomo mirundi mingyi.

Buthuku bughuma nabere ingalhua omwa ngomo, munathwamu eriyalebya mwali wobu mama waghe. Isingasi, mama oyo n’abaana biwe babiri babya ibabiribya Bema ba Yehova. Mubanyikokya okwa mihindano y’Abema. Habw’erithanza eriminya ebiriyo, munathwamu erighenda nabu. Thwabere thwahika okwa Kisenge ky’Obwami, munaghana indi ngend’ikalha okwa lhukyo nuku nangabya inganemulhangira abak’ingira n’erihulhuka. Nabya ingane n’embundu yaghe.

Emihindano eyo muyahindulha engebe yaghe. Ng’ibuka ingalengekania indi alinga ngali omwa kindi kihugho. Abandu abatsemire kandi abakayihira okwa bandu mubanyiramukya. Ngakin’ibukire ndeke Abema ab’olhukeri kandi abali mw’okwenene abo. Eki kyabya mbaghane okwa kihugho ekyo nabyamu!

Munatsuka erigha e Biblia n’Abema. Iningabya ing’ongera erigha, ikwangan’ongera nyithya erilhangira ngoku ngatholere ingahindulira ighuma engebe yaghe. Munaghendera okw’ihabulha eriri omwa Emisyo 13:20: “Wulendere haghuma n’abandu b’amenge nawu wasyabya w’amenge; nikwa omwira w’abakiru asyakwa.” Munaminya ngoku ngatholere ingayighabulha okwa kigurupu ky’abayaya. Ekyo sikyabya kyolho, aliwe busana n’obuwathikya bwa Yehova, munathoka.

Kandi munayerya kinyamubiri. Omwa kaghalha kanene, munaleka erinywa ethaba n’ekolesya ebibatsi ebikathamiraya. Munasara esyonzwiri syaghe nyiri-nyiri, namaleka eriambalha amaningita, n’erileka emibughire mibi. Erilhua aha ngathabuthirwa, lero naghe munatsuka erikakirya emikolere yaghe.

Isindi nathanza erisoma n’erigha, neryo mukyanyibera kitsibu eriyihwerya omw’igha e Biblia. Aliwe, nabere inganemuhiraho akaghalha, lyolho-lyolho munatsuka erianza Yehova, n’omwakathi omo munatsuka erihinduka​—obunyamuthima-thima bwaghe mubwatsuka erinyilyambya. Mughulhu mungyi munatsuka eriyowa nabi, iningathika-thika indi Yehova syanga nyighanyira busana n’ebindu bibi ebyo nabirikolha. Omwa buthuku obo munahumulikana ingasoma ngoku Yehova aghanyira Omwami Dawudi enyuma w’erikolha amalholho awakalha-kalire.​—2 Samweli 11:1–12:13.

Ekindi kitsibu kyabya eribwira abandi okw’ikirirya lyaghe nyumba okwa nyumba. (Matayo 28:19, 20) Ining’ubaha indi nangana sanga omundu oyo nakolha nabi kutse erisoberya omwa nzira ndebe kera! Aliwe lyolho-lyolho munathoka erisingura obuba obo. Munatsuka eriyowa ndeke eriwathikya abandi erigha oku Thatha wethu mubuyanga ow’elhubulha, oyukaghanyira ndeke.

Erigha oku Yehova kyabirilhamya engebe yaghe! Abangyi b’okwa banywani baghe ba kera babiriholha kutse erihirwa omwa ngoma, aliwe ingye ngawithe obuholho bw’okwenene kandi ngalindirire obuthuku obuwene obw’embere. Nabir’igha eriyikehya n’eribya mwowa n’erikakirya ekinigha kyaghe. Busana n’ekyo, ngwithe obughuma obuwene n’abandu. Ingye na mukali waghe mubuyanga ya Carmen thuwithe obutheke obutsemire. Thunayu haghuma, thukabana etseme nene y’eriwathikya abandi erigha e Biblia.

Na bathami, lino ngakolha omubiiri owalimo okwenene​—okwa bundi buthuku owalimu eriyonza esyobbank, omwakanya k’eribasyo!