Thera akasasani thatha iniane mukania n’akaghalha kiwe ak’emyaka musanju. Iniabugha athi, “Kera-kera, Nyamuhanga mwahangika ekihugho n’ebyosi ebirimu, neryo mwakolha eryuba, okwezi, n’esyongununu.” Omulhwana inialengekania okw’ekyo habw’akathambi kake neryo iniabulya athi, “Thatha, nindi oyuwahangika Nyamuhanga?”

“Sihali oyuwahangika Nyamuhanga,” thatha iniasubamu athya. “Iyo athulhaho.” Eky’erisubirya ekyolhobire ekyo ikyughuthya omwana oko myaka eyi. Aliwe akabya anemukulha, ekibulyo ekyo ikyalholha embere erimulyambya. Ikya mukalira eriyitheghererya omundu ng’akathoka athi eribyaho isyawithe enzuko. Kundi nibya, ekyanya n’ebyosi ebirimu nabyo binawithe enzuko. Neryo iniayibulya, ‘Nyamuhanga alhua hayi?’

E Biblia yikasubiraya yithiki? Okwenene kuli kuthi, yikasubiraya ngoku thatha oyuli omwa ky’erileberyako asubiraya. Musa mwahandika athi: ‘Omwami mukulhu, ebithwa bithe by’ahangikwa kutse ekithaka n’ekihugho, wuli Nyamuhanga kera na kera, siwuli n’enzuko kutse omuheryo.’ (Esyonyimbo 90:1, 2) Kuthya, n’omuminyereri Isaya mwabugha athi: ‘Siwulithaminya kwehi? Siwulithowa kwehi? Nyamuhanga owa kera na kera, Omwami Mukulhu Omuhangiki w’esyonduli sy’ekihugho.’ (Isaya 40:28) Kuthya, ebaruha ya Yuda yikakanaya oku Nyamuhanga ng’oyuwabiribya inianeho “eritsuka oko mighulhu yosi ya kera na kera.”​—Yuda 25.

Amasako ayo akathukanganaya ngoku Nyamuhanga ni “Mwami w’erikotha,” ngoku omukwenda Paulo akamukanayako. (1 Timoteo 1:17) Eki kikamanyisaya kithi Nyamuhanga abiribya inianeho emighulhu yosi, kera na kera. Kandi akendisyabya inianeho emighulhu yosi n’omwa buthuku obukasa. (Eribisulirwa 1:8) Neryo kwesi, eribyaho liwe erya kera na kera eri likakanganaya ngoku ni w’omuthoki obwosi.

Busana naki eki ikyathukalira eriyitheghererya? Kundi engebe yethu ni nguhi, amalengekania wethu awahambire okwa buthuku ali mbaghane kutsibu okwa wa Yehova. Kundi Nyamuhanga ni wa kera na kera, okw’iyo emyaka rukumi ni kiro kighuma. (2 Petero 3:8) Ng’eky’erileberyako: Mbwino engyike, eyikabyaho habw’ebiro nga 50, iyanayitheghererya eribyaho lyethu ery’emyaka 70 kutse 80? Eyihi nahake! Aliwe kandi, e Biblia yikasoborera yithi thuli ng’esyongyike thwamalinganisibwa n’Omuhangiki wethu Mukulhu. Nibya n’amaaka wethu w’erilengekania ni make kutsibu amalinganisibwa n’awiwe. (Isaya 40:22; 55:8, 9) Sikiriswekaya eribya ihane ebindu birebe ebihambire oku Yehova ebya bandu bathe banga yitheghererya ndeke.

Nomwakine indi kikalire eriyitheghererya eky’eribya Nyamuhanga iniathulhaho kera na kera, ithwangana lhangira ngoku eki kihikire. Owundi mundu kw’abya iyuwahangika Nyamuhanga, omundu oyo angabere iya Muhangiki. Aliwe, ngoku e Biblia yikasoborera, Yehova “yuwahangika ebindu byosi.” (Eribisulirwa 4:11) Eryongera okw’ekyo, thunasi ngoku buthuku bughuma ekyanya n’ebyosi ebirimu byabya isibiriho. (Enzuko 1:1, 2) Mbwino byalhua hayi? Omuhangiki wabyo abya atholere eritsuka eribyaho. Abya inianeho isihali habya ebindi bihangikwa byosi-byosi eby’amenge, ng’Omughalha wiwe ekyusa n’abamalaika. (Yobu 38:4, 7; Abanya Kolosai 1:15) Neryo kwesi, abya inianeho iyuwene erimbere. Neryo syangabya iniahangikawa; sihabya ekyosi-kyosi ekyabyaho ekyanga muhangikire.

Eribyaho lyethu n’eribyaho ly’ekyanya n’ebyosi ebirimu kikakanganaya eribyaho lya Nyamuhanga w’erikotha. Oyo oyuwaleka ekyanya kinene n’ebyosi ebirimu ibyabya ibine mukolha, Oyo oyuwahiraho ebilhaghiro ebikasondolhakyo, atholere eribya iniabya inianeho emighulhu yosi. Neryo kwesi, Iyo musa yuwahangika obuli kindu.​—Yobu 33:4.