Ingakine mulere, efamile yethu yabya yikere hakuhi ne Leipzig, Ebulhua lyuba bwe Germany, isihaali okwa muthano we Czech ne Polish. Ingane w’emyaka mukagha, omubiiri wa thatha waghe mwaleka ithwaya omwa bindi bihugho​—erimbere muthwaya e Brazil n’enyuma waho e Ecuador.

Ingane w’emyaka 14, mubanyithwalha okwa sukuru y’ebbodingi e Germany. Kundi ababuthi baghe babya bikere haali omwa Amerika y’Eyikwa, munabya w’eriyitsomana kinyamubiri. Munabya mundu oyukayisondolha. Isinditsomana emibere yaghe nga yikendi hamba yithi okwa bandi.

Ingane w’emyaka 17, ababuthi baghe mubasuba e Germany. Erimbere, mun’ikalha nabu. Aliwe omuthima waghe w’eriyisondolha ingyuwene mwaleka ikyanyikalira eribya ahisi sy’obusondoli bwabu. Nabere ingahikya myaka 18, munalhua eka.

Mun’ongera eribulha obuholho, ingasondekania ekighendererwa ky’engebe. Nabere nabirilhangira emibere muthina-muthina y’engebe n’ebithongole, munakakasya ngoku ekindu ekyuwene kutsibu ekya nangakolha omwa ngebe yaghe ly’erikolesyayo erirambura ekihugho kyethu kibuyanga kino abandu bathe bakitsandya.

Munalhua e Germany, namaghulha epiki-piki, n’erighenda omwa Afirika. Aliwe buthuku buke, munabya w’erisuba e Yuropu habw’eriyakanika epiki-piki yaghe. Buthuku buke enyuma waho, munayisanga okwa bbikyi e Portugal. Munathwamu erisighania epiki-piki yaghe n’eritsuka erighenda omo bwathu.

Munayiyunga okwa gurupu y’eminyethu ababya bakayitheghekera erighenda omo bwathu erilhaba omwa Atlantic Ocean. Omw’ibo munabanamu oyukendibya mukali waghe ye Laurie. Erimbere, muthwatsuka okwa bizinga bye Caribbea. Neryo thwabere thwaghunza e Puerto Rico y’obuthuku buke, muthwasuba e Yuropu. Muthwalengekania thuthi thukendibana obwathu obwa thwanga kolha mw’obwathu bw’eriyitsemeseryamu. Aliwe thwabere thwabirisondya habw’amezi make, endegheka yethu muyahwa kitsumbukirania. Munahandikwa omwa mahe we Germany.

Munaghunza mezi 15 omo mahe w’okwa maghetse. Okwa buthuku obo, munathahya Laurie kandi muthwayitheghekera erilholha embere n’engebe yethu y’eribunga. Buthuku buke ngathe ngaghenda omwa mahe, thwabya ithwabirighulha ekihande kighuma ky’obwathu obukakolesibawa erisabulha abandu. Inganemukolera omo mahe, lyolho-lyolho muthwathoka erihindulha obwathu obo mo bwathu buke. Ithwanzire eribukolha mw’obwikalho bwethu n’erilholha embere erirambura ekihugho kino kibuyanga. Aho ibbwa​—inamabirighunza omubiiri waghe w’amahe aliwe isithuli thwaghunza erikolha obwathu bwethu​—hathwabananganira n’Abema ba Yehova n’eritsuka erigha e Biblia.

Okw’itsuka, mungathalhangira ekyangaleka ingahindulha engebe yaghe. Nabya ingabirithahya omukali oyo nabya nayu, kandi inabirileka erinywa ethaba. (Abanya Efeso 5:5) Munalengekania indi endegheka yethu y’erirambura ekihugho ky’ekindu ekyuwene kutsibu omwa ngebe yethu kundi kyangalekire ithwaminya bingyi okwa bihangikwa bya Nyamuhanga ebikaswekaya.

Aliwe omo kwenene, munayithagha erikolha esyombinduka​—kutsibu-tsibu omwa mibere yaghe. Kundi nabya mw’emiyiheko n’oyukayisondolha, iningahweraya amalengekania okwa maaka waghe n’ebyo ngathoka bisa. Ingayitsomene ingyuwene.

Kiro kighuma, munasoma okwa biri omw’ikangirirya lya Yesu ery’okwa kithwe. (Matayo, sura 5-7) Okw’itsuka, mungathayitheghererya etseme eyo Yesu akanayako. Ng’eky’erileberyako, mwabugha athi obutseme buli oko bakwire enzalha n’enyotha. (Matayo 5:6, NWT) Munabulha eribya omwa buyithawa nga kyangalethera kithi omundu y’etseme. Nabere nganemulholha embere erigha, munaminya ngoku ithwe bosi thuli n’ekiyithawa ky’obunyakirimu aliwe omw’iyikehya thutholere ithwaminya ku thukayithagha ekyo thuthe thwakiberererya. Kine ngoku Yesu abugha athi: “Obutseme buli oko basi ko bali n’obwagha bwa Nyamuhanga.”​—Matayo 5:3.

Thwabere thwabiritsuka erigha e Biblia ithune e Germany, ingye na Laurie muthwaghenda e France, n’enyuma waho, thwamaya e Italy. Eyo thwanabya thukaya ithukeghayayo Abema ba Yehova. Olhwanzo olhukalhua okwa muthima n’obughuma ebyo bawithirene mubyanyitsemesya kutsibu. Munalhangira ngoku omo kwenene, Abema ba Yehova ni lhughanda lhughuma lhw’ekihugho kyosi. (Yoane 13:34, 35) Endambi muyahika ingye na Laurie thwamabatizibwa ng’Abema ba Yehova.

Enyuma w’eribatizibwa, munalholha embere erikolha esyombinduka omwa mibere yaghe. Ingye na Laurie muthwathwamu erighenda omo bwathu okwa misike ye Afirika n’erilhaba omwa Atlantic Ocean eriya e United States. Neryo aho omwa ngetse nene​—ithwe babiri ithune omo bwathu buke ahakathi-kathi k’engetse​—hanabya ngaminyire ngoku ngali kandu kake kutsibu erilinganisibwa n’Omuhangiki wethu. Kundi ingawithe obuthuku bunene (isihali mubiiri w’erikolha omwa kathi-kathi k’engetse), munayihayo erisoma e Biblia. Kutsibu-tsibu, emyatsi eyihambire okwa ngebe ya Yesu okwa kihugho, muyanyihambako kutsibu. Abya mundu oyuhikene oyuwithe amaaka manene kwilhaba ekyosi-kyosi ekya nangalengekaniako, aliwe isyali yiheka. Mwahwerya engebe yiwe omw’ikolera Thatha wiwe w’elhubulha butsira omw’iyironderya olhukengerwa.

Omw’ighanirya okwa ngebe ya Yesu, munalhangira ingatholere erihira Obwami bwa Nyamuhanga bw’embere omwa ngebe yaghe omwakanya k’erihira embere ebindu muthina-muthina ebya nganzire erikolha. (Matayo 6:33) Ingye na Laurie thwabere thwahika e United States, muthwathwamu erikalha eyo n’erihwerya amalengekania w’okw’iramya lyethu.

Kera omughulhu nabya ingayikethera amaaka waghe, mughulhu mungyi isingawithe ekighendererwa omwa ngebe. Aliwe lino, ngasondolibawa omwa menge awakalhua okwa mundu oyukayiketherawa. (Isaya 48:17, 18) Kandi nabiribya n’ekighendererwa omwa ngebe ekyo ngathabya ngawithe kera​—eriramya Nyamuhanga n’eriwathikya abandi erimwighako.

Omw’ighendera okwa misingyi ye Biblia, ingye na Laurie thwabirighumya obutheke bwethu bwa kutsibu. Kandi thwabiribana n’ekihembo ky’omwana w’obukali mubuyanga, oyuwabiriminya Yehova n’erimwanza.

Sibugha ambu mughulhu wosi thwabiribya ithune omwa ngebe eyithe mw’ebitsibu. Aliwe busana n’obuwathikya bwa Yehova, thwabirithwamu erithendi bikyako kutse erileka eriyikethera iyo.​—Emisyo 3:5, 6.