OMWATSI OKWA KIDIPA | OBWAMI BWA NYAMUHANGA—BWANGA KUGHASIRA BUTHI?
Obwami bwa Nyamuhanga—Ekikaleka oku Yesu Ibwabya Ini Kindu Kikulhu
Omw’ithulira liwe okwa kihugho, Yesu mwakania oko myatsi mingyi. Ng’eky’erileberyako, mwakangirirya abigha biwe ngoku bangasaba, ngoku banga tsemesya Nyamuhanga, kandi ngoku bangabana etseme y’okwenene. (Matayo 6:5-13; Mariko 12:17; Luka 11:28) Aliwe omwatsi ogho Yesu akanayako kutsibu kwilhaba owundi mwatsi wosi-wosi—omwatsi ogho anzire kutsibu—bwabya ibw’Obwami bwa Nyamuhanga.—Luka 6:45
Omo mwatsi w’ahanyuma, Yesu mwahwerya engebe yiwe ‘okw’ithulhughania engulhu yuwene n’erithulha omwatsi w’Obwami.’ (Luka 8:1) Mwayikasa, erighenda esyomayiro n’esyomayiro omwa Israeli yosi nuku akangiriraye abandu oko Bwami bwa Nyamuhanga. Erithulira lya Yesu likanibweko omwa bitabu bbini bw’Enjiri, ebikakanaya oko Bwami emirundi eyilhabire omu 100. Omwa bitabu ebi, Yesu yuwakanaya kutsibu oko Bwami, kandi ibbwa ebyo bitholere eribya ini bike kutsibu okwa ebyosi eby’akanaya oko Bwami bwa Nyamuhanga!—Yoane 21:25.
Busana naki oku Yesu Obwami mukyabya ini kindu kikulhu iniane okwa kihugho? Enzumwa nguma, Yesu abya inianasi ngoku Nyamuhanga abirimusombolha eribya Muthabali wabu. (Isaya 9:6; Luka 22:28-30) Aliwe Yesu mwathahwerya amalengekania w’okw’iyisonderya obuthoki kutse olhukengerwa. (Matayo 11:29; Mariko 10:17, 18) Mwahira omuwatho w’oko Bwami busana n’esyonzumwa esithemo eriyitsomana iyuwene. Ekikulhu, Yesu aby’anzire Obwami bwa Nyamuhanga kandi abwanzire na lino * kundi anasi ekya bukendisya kolera abo anzire—Thatha wiwe w’elhubulha n’abigha biwe abathaleghulha.
EKYA BWAMI BUKENDI SYAKOLERA THATHA WA YESU
Yesu anzire kutsibu Thatha wiwe w’elhubulha. (Emisyo 8:30; Yoane 14:31) Anzire emibere mibuyanga ya Thatha wiwe, ng’olhwanzo, olhukeri, n’obulingirirania. (Eryibuka Ebihano 32:4; Isaya 49:15; 1 Yoane 4:8) Ahathe erithika-thika, Yesu atholere eribya iniakapona akowa amabehi aw’akakanibawa oku Thatha wiwe—amabehi ng’aw’eribugha indi Nyamuhanga syatsomene eriaghalhwa ly’abandu kandi indi anzire ithwaghalhwa. Eyi ni nzumwa nguma eyaleka Yesu inianza kutsibu erithulhughania “engulhu yuwene y’Obwami”—abya inianasi ngoku endambi yanga hikire Obwami obu ibwerya erina lya Thatha wiwe. (Matayo 4:23; 6:9, 10) Bukendi syakolha ekyo kya buthi?
Erilhabira omo Bwami, Yehova akendi syahiraho esyombinduka esyuwene busana n’erighasira abandu. “Asyasangulha emisonia yosi” okwa meso w’abathaleghulha. Yehova akendi syaghunzaho ebikaletha emisonia eyo, erilhangira athi “olhuholho silhwendi syasabyaho, erisusumana kutse eririra, kutse eriaghalhwa.” (Eribisulirwa 21:3, 4) Erilhabira omo Bwami, Nyamuhanga akendi syaghunzaho eriaghalhwa lyosi ly’abandu. *
Kwesi sikiriswekaya eribya Yesu iniabya anzire kutsibu eribwira abandu oko Bwami! Abya inianasi ngoku kyangakanganirye ngoku Thatha wiwe ni w’obuthoki kandi kw’akakwira abandu b’obulighe. (Yakobo 5:11) Kandi Yesu abya inianasi ngoku Obwami bwangaghasire abandi abo anzire—abathaleghulha.
EBYA BWAMI BUKENDI SYAKOLERA ABANDU ABATHALEGHULHA
Kera athali asa okwa kihugho, Yesu abya ikere na Thatha wiwe elhubulha. Thatha mwakolesya Mughalha wiwe erihangika obuli kindu—eritsuka okwa lhubulha olhukaswekaya olhulimo akathabarika k’esyongununu n’esyogalaksi erihika okwa kihugho kyethu kibuyanga n’ebihangikwa byosi ebiriko. (Abanya Kolosai 1:15, 16) Aliwe ekikulhu okwa byosi, “obutseme” bwa Yesu bwabya busana n’abandu.—Emisyo 8:31.
Erithulira lya Yesu lyabya liseghemere oko lhwanzo olho aby’awithire abandu. Okw’inatsuka, mwakikangania ndeke-ndeke ngoku asa okwa kihugho “erithulha engulhu yuwene” okwa bawithe obwagha. (Luka 4:18) Aliwe Yesu mwathasubulira okw’ikania lisa okw’iwathikya abandu. Mughulhu wosi iniakakanganaya kw’anzire abandu. Ng’eky’erileberyako, endeko nene yabere yahindana erisyamuhulikirira akakania, Yesu “mwakwirabo obulighe, neryo mwalhamya abakoni babu.” (Matayo 14:14) Omulhume oyuwabya alhwere obulhwere obukalire abere akangania erikirirya ngoku Yesu angana mulhamya amabya ananzire, olhwanzo mulhwaleka Yesu iniakolha ekyo. Mwalhamya omulhume oyo, kandi omw’imukwira obulighe mwamubwira athi: “Nyinanzire; wulhamibawe.” (Luka 5:12, 13) Yesu abere alhangira munywani wiwe Maria inianemulira busana n’eriholerwa mughalha wabu, ya Lazaro, Yesu “mwakwa obulighe bwa kutsibu omwa muthima wiwe,” “mwakwa engitsi,” neryo “mwalira.” (Yoane 11:32-36) Neryo mwakolha ekithe kyanga lengekanibwa—Yesu mwalhubukya Lazaro nomwakine indi Lazaro abya iniamabirighunza biro bbini aliholire!—Yoane 11:38-44.
Ni kwenene, Yesu abya inianasi ngoku erihumulikania eryo aha lyabya ly’akathuku kake. Abya inianasi ngoku omwa buthuku obuthe bwahali, abosi abo alhamaya kandi bangalhwere n’abosi abo alhubukaya bangaholire kandi. Aliwe kandi, Yesu abya inianasi ngoku Obwami bwa Nyamuhanga bwanga ghunzireho ighuma ebitsibu ng’ebyo. Ky’ekyaleka Yesu iniathasubulira okw’ikolha ebithiko-thiko; kandi n’omuhwa munene mwathulhughania “engulhu yuwene y’Obwami.” (Matayo 9:35) Ebithiko-thiko bike ebyo akolha byakanganaya ebya Bwami bwa Nyamuhanga bukisiya ibwakolha okwa kihugho kyosi. Thulebaye ebya Biblia yikalhaghanisaya okwa buthuku obo.
Sihendi syasabya ebitsibu by’amaghalha.
“N’okwa mughulhu oyo ameso w’esyondimethime asyalibulhwa, n’amathwe w’abatsiha asyahundukalha. Okwa mughulhu oyo olhughatha lhwasyathwa ebiika ng’engabi, n’olhulimi lhw’erikiru lhwasyutha obwogho bw’obutseme.” Eryongera okw’ekyo, “sihali ndulhani eyikendi syabugha yithi, nyilhwere.”—Isaya 33:24; 35:5, 6.
Sihendi syasabya olhuholho.
‘Abathunganene basyikalha omwa kihugho mo buholho, n’erisighalyakyo kera na kera.’—Esyonyimbo 37:29.
“Asyaherya olhuholho busana na kera na kera. Omukama Omwami Mukulhu asyasangulha emisoni yosi okwa musu wosi.”—Isaya 25:8.
Ababiriholha bakendi syalhubukibwa.
“Abosi abali omwa masinda basyowa omulenge wiwe. Basyalhua omwa masinda wabo.”—Yoane 5:28, 29.
“Hasyabya erilhubuka.”—Emibiri 24:15.
Sihendi syasabya oyuthawithe ah’erikalha kutse omubiiri.
“Basyahimba amanyumba n’erikalha mugho. Basyahera amalima w’ebinyu n’erirya ebighuma byagho. Sibendi syahimba, n’owundi ak’ikalha muyo. Sibendi syabiba n’owundi akalyabyo. . . . Abayisoghawa baghe basyatsemera omubiiri w’ebyalya byabu emighulhu lyosi.”—Isaya 65:21, 22.
Sihendi syasabya esyonyuhi.
“Akakubaya amalhwa omo kihugho kyosi.”—Esyonyimbo 46:9.
“Ekihanda sikyendi syasumbira ekindi kihanda ky’omuyali, sibendisyaswayeghesya amalhwa.”—Isaya 2:4.
Sihendi syasabya enzalha.
“Ekithaka kyabiryerya esyombutho syakyo; Nyamuhanga, Nyamuhanga wethu, abirithutsumulha.”—Esyonyimbo 67:6.
“Engano yibyeho nene omwa kihugho; n’ehithwe hyusule mw’ebyalya.”—Esyonyimbo 72:16.
Sihendi syasabya obunakwa.
“Ab’obwagha sibendi syabiriranwa.”—Esyonyimbo 9:18.
“Asyalhamya abera abakamulhakira, n’abali n’obwagha, n’abakasighanibawa. Akaghanyira abera ,n’abandu bolho-bolho; akalhamaya esyongebe sy’abandu abali n’obwagha.”—Esyonyimbo 72:12, 13.
Wukabya wukalengekania okwa milhaghe eyihambire oko Bwami bwa Nyamuhanga, wukanalhangira ekyaleka Yesu inialhangira Obwami mo mwatsi mukulhu? Iniane okwa kihugho, aby’anzire kutsibu eribwira owosi-wosi oyukamuhulikirira oko Bwami bwa Nyamuhanga, kundi abya inianasi ngoku Obwami bwanga ghunzireho ebitsibu byosi ebyathukalhangira munabwire.
Emilhaghe ye Biblia eyihambire oko Bwami yanamakutsemesya? Kyamabya okwa kiri kithya, wang’igha wuthi bingyi oko Bwami? Kandi wangakolhaki erilhangira wuthi wukaghasirawa omwa mighisa yabo? Omwatsi w’erighunzerera omo myatsi eyikwamangene akendi subirya ebibulyo ebyo.
^ Omwatsi ono akakanaya okw’iyowa lya Yesu nga ni munabwire kundi Yesu aneho lino elhubulha, kandi erilhua aho akathasubira elhubulha, Obwami kikine kindu ekiri okwa muthima wiwe kwa kutsibu.—Luka 24:51.
^ Eribana omwatsi mungyi owahambire okwa kikaleka Nyamuhanga inialekereraho eriaghalhwa ahabw’akathambi, lebaya esura 11 ey’ekitabu E Biblia Kwenene Yikathukangiriraya Ki? ekyahulhukibawa n’Abema ba Yehova. Kandi kine n’okwa www.pr418.com.
