Cameron: Namatsema erithasyakulholhako, Jon. Mughulhu wosi ngatsemera erigha lyethu lye Biblia ery’obuli wiki. * Yiri wahi eno?

Jon: Thuneyo ndeke.

Cameron: Hakiri muneyo ndeke. Ekiro nabya hano, muthwakania okwa kikaleka Abema ba Yehova ibabugha bathi Obwami bwa Nyamuhanga bwatsuka erithabalha 1914. * Ngoku thwalhangira muthwabana obwema omwa buminyereri obuli omwa sura ya 4 ey’ekitabu kya Danieli. Wanam’ibuka ebirimo?

Jon: Ekilhotho ky’Omwami Nebukadeneza ekihambire okwa muthi munene.

Cameron: Ahaa. Omwa kilhotho, Nebukadeneza mwalhangira omuthi munene ow’aby’ahikire elhubulha. Mwowa omumalaika wa Nyamuhanga akalhaghira athi omuthi oyo akondawe, aliwe ekisiki n’emirihi yawu byabya by’erisighalha omwa kithaka. Enyuma w’obuthuku ‘bw’emighulhu irinda,’ omuthi angalhasire kandi. * Kandi muthwalhangira ekikaleka obuminyereri ibwabya ibuwithe eribererera ly’emirundi ibiri. Wukin’ibukire eribererera ly’erimbere?

Jon: Ni kindu ekyabya oku Nebukadeneza iyuwene-wene, kwa bithe? Mwabya musire habw’emyaka musanju.

Cameron: Kyan’ekyo. Nebukadeneza mwabya musire habw’obuthuku buke, neryo obuthabali bwiwe mubw’imanibwa hake. Aliwe omw’ibererera linene ly’obuminyereri, obuthabali bwa Nyamuhanga bwang’imanibirwe omwa nzira ndebe habw’obuthuku bw’emighulhu musanju. Ngoku thwalhangira emighulhu musanju yatsuka omwa 607 E.K.K. omughulhu e Yerusalemu yathoghothibawa. Eritsuka aho, okwa kihugho mukwabya isikukiri mwami wosi-wosi oyukimanira Yehova Nyamuhanga omw’ithabalha abandu biwe. Aliwe, okw’ihwererera ly’emighulhu musanju, Nyamuhanga angasombwere Omuthabali muhyaka oyuwangathabere abandu biwe—omundu oyuli elhubulha. Ni bugha mbu, emighulhu musanju yangabere yikahwa, Obwami bwa Nyamuhanga bwangatsukire erithabalha omwa lhubulha. Thwabya thwabiriminya emighulhu musanju nga yatsuka mughulhu wahi. Neryo thwamabiriminya emighulhu eyo nga muyaghunza buthuku bungahi, aho ibbwa imuthukendi minya Obwami bwa Nyamuhanga nga bwatsuka erithabalha mughulhu wahi. Aho thunakwamene?

Jon: Ee, eriyibukya eri lyamabiribukya obulengekania bwaghe.

Cameron: Ekyo kyuwene. Leka ibbwanu thutsuke, thuminye emighulhu musanju nga ni buthuku bungahi. Munganalhaba omo mwatsi oyu eriyibukya esyonzumwa ngulhu-ngulhu. Ng’ilengaho erisisoborera ngoku nangathoka.

Jon: Kale.

Cameron: Omw’ibererera ly’erimbere ery’obuminyereri obuhambire oku Nebukadeneza, emighulhu musanju muyabya myaka musanju eyonyine-nyine. Aliwe omw’ibererera linene lino erihambire oko Bwami bwa Nyamuhanga, emighulhu musanju yitholere ibwabya buthuku buuli kwilhaba emyaka musanju eyonyine-nyine.

Jon: Busana naki iwabugha wuthya?

Cameron: Kundi, wibuke emighulhu musanju yatsuka omughulhu e Yerusalemu yathoghothibawa omwa 607 E.K.K. Thwamutsuka eribara eritsuka oko mwaka oyo, emighulhu musanju iyikendi thukolya oko mwaka we 600 E.K.K. Aliwe sihali kindu ky’embaghane ekyabya omo mwaka oyo ekihambengene n’obuthabali bwa Nyamuhanga. Mbaghane n’ekyo, ngoku thwanalhangira, ebighana bingyi enyuma waho, Yesu iniakine hano okwa kihugho, mwakangania ngoku emighulhu musanju siyiri yahwa.

Jon: Kwenene. Nam’ibuka ibbwa.

Cameron: Neryo, omwakanya k’eribya ini myaka eyonyine-nyine, emighulhu musanju yitholere eribya ini buthuku buuli.

Jon: Ibbwa buthuku bungahi?

Cameron: Ekitabu kye Biblia eky’Eribisulirwa ekikanza erisosana ndeke n’ekya Danieli, kikathuwathikaya eriminya emighulhu musanju nga ni buthuku bungahi. Kikakanganaya ngoku obuthuku bw’emighulhu isathu n’embindi ni biro 1,260. * Kwesi, emighulhu musanju—ni kabiri emighulhu isathu n’embindi—yingene n’ebiro 2,520. Thunakwamene?

Jon: Ee, nganakwamire. Aliwe sindi nalhangira ngoku eki kikakanganaya ngoku Obwami bwa Nyamuhanga bwatsuka erithabalha 1914.

Cameron: OK, leka thulebaye nga thukayabihambanaya thuthi. Okwa bundi buthuku omwa buminyereri bwe Biblia, ekiro kik’imanira omwaka. * Thwamaghendera okwa kihano ky’ekiro busana n’omwaka, emighulhu musanju iyikendibya myaka 2,520. Eribara emyaka 2,520 eritsuka oko mwaka wa 607 E.K.K., yikathuhikaya oko mwaka wa 1914. Kwa thukahika thuthya oko mwaka wa 1914 ng’omwaka ogho emighulhu musanju yahweramo, iw’omwaka ogho Yesu atsukiramo erithabalha ng’Omwami w’Obwami bwa Nyamuhanga. Kandi eritsuka-tsukana n’omwaka wa 1914, ebindu ebikalha-kalire byabiribya—ebindu ebya Biblia yalhaghulha yithi bikendisyabya omwa biro by’enyuma-nyuma.

Jon: Ni bindu nga byahi?

Cameron: Thalengekania okwa bya Yesu abugha, ngoku kikanganibwe omu Matayo 24:7. Akakania okwa buthuku obw’angatsukiremo erithabalha, Yesu mwabugha athi: “Ekihanda kyasyalhwa n’ekindi kihanda, n’obwami bwasyalhwa n’obundi bwami, kandi hasyabya esyonzalha ehandi n’ehandi, n’emisiki ehandi n’ehandi.” Wanamalhangira ngoku Yesu mwalhaghulha athi hasyabya esyonzalha n’emisiki okwa buthuku obo. Ahathe erithika-thika ekihugho kyethu kyabiribyamo ebitsibu by’emiringo eyi omwa kighana ekihwere, kwa bithe?

Jon: Ekyo ni kwenene.

Cameron: Omwa mulhondo oyu, Yesu kandi mwalhaghulha athi hasyabya esyonyuhi omwa buthuku bw’eribyaho liwe ng’omwami w’Obwami bwa Nyamuhanga. Kandi n’ekitabu kye Biblia eky’Eribisulirwa mukyalhaghulha kithi omwa buthuku bw’enduli hangabere esyonyuhi butsira omo mwanya mughuma musa aliwe esyonyuhi esyanga hambire okwa kihugho kyosi. * Wangan’ibuka omughulhu olhuhi lhw’ekihugho kyosi olhw’embere lhwabya?

Jon: Lhwabya 1914, omwaka owanyine-nyine ogho wunemubugha wuthi gho Yesu atsukiramu erithabalha! Nabya isindi nathalengekania okw’ekyo.

Cameron: Thukabya thukahira ebyosi ebi bya haghuma—obuminyereri obuhambire okwa mighulhu musanju kuthya n’awandi maminyereri we Biblia aw’ahambire okwa buthuku bw’enduli—wukalhangira ekyo ikihikire. Abema ba Yehova bikirirye ngoku Yesu atsuka erithabalha ng’Omwami w’Obwami bwa Nyamuhanga omwa 1914 kandi ngoku ebiro by’enyuma-nyuma byatsuka omo mwaka iwan’oyo. *

Jon: Nganemulengaho eriyitheghererya ebyosi ebi.

Cameron: Ekyo kikayitheghereribawa. Ngoku nganalyakubwira, mukyanyithwalira buthuku eriyitheghereryabyo ndeke. Aliwe ngalengekanaya erikanirania lyethu lino lyanamakuwathikya erilhangira ngoku nomwakine indi omwaka wa 1914 syali omwa Biblia, Abema ba Yehova erikirirya omo mwaka oyu kiseghemere okwa Masako.

Jon: Ee, mughulhu wosi ngabasima busana n’ekyo—obuli kindu ekya mukabugha, mukakiseghemeraya okwa masako. Simulighendera okwa amalengekania wenyu. Aliwe nganemubulha ekikaleka omwatsi oyu iniakalha eriyitheghererya. Busana naki Nyamuhanga mwathakwama ky’erithubwira erilhabira omwa Biblia athi omwaka wa 1914 gho Yesu angatsukiremu erithabalha omwa lhubulha?

Cameron: Ekyo ni kibulyo ekyuwene, Jon. Erithwalira haghuma, omwa Masako mune myatsi mingyi eyikalire. Neryo ibbwa, ni kyahi ekyaleka Nyamuhanga iniahandikisya e Biblia omwa nzira y’eribya iyikendi yithaghisya abandu erihiraho akaghalha eriyitheghereryayo? Ithwangana syakania okw’ekyo ingathasyasubulha.

Jon: Aho kyuwene, wusyasa.