1. Munabwire eribya iwun’erire likalhangirawa lithi?

ABANDU bangyi sibakitsomene eky’eribya iban’erire. Omwa bihugho bingyi eky’erikolha emyatsi y’engyingo n’ow’olhubutho ng’olhwawu, kutse oyo muthe nayo omwa butheke sibikilhangirawa nga bibi. Okwa syotivi n’omwa bindi by’eriyitsemesya bakabya ibanemuwanirirya emitse mibi eyi. (Esy. 12:8) Eby’obutswatswa byabirikanyirira kutsibu erihika okw’ibya iwangana thika-thika nga hakine omundu oyuwangathoka eribya inian’erire. Aliwe okwa Bakristayo ab’okwenene kikathokekana busana n’obuwathikya bwa Yehova.—Soma 1 Abanya Tesalonika 4:3-5.

2, 3. (a) Busana naki thutholere ithwarwanisya esyongumbu nyibi? (b) Ni byahi ebya thukendi kaniako omo mwatsi ono?

² Thwamabya b’eribya ithun’erire, thutholere ithwayihighulha okwa syongumbu nyibi sy’obutswatswa. Ngoku ekyambu kikanathebaya erihere, erilengekania okwa by’obutswatswa lyanganaleka Omukristayo iniathebibwa. Busana n’obuthahikana bwethu ithwanganasa mw’omutse w’eryanza eby’obutswatswa. Neryo  endambi iyanganahika omutse oyo iniakukuliramu. Byamabirihika okwa lhulengo olho, n’omughombe wa Yehova iniakendi kolha ngoku esyongumbu siwe sikamulhaghira akaghisa kakabanika. Omwa kwenene, ‘esyongumbu sikabutha ebibi.’—Soma Yakobo 1:14, 15.

³ Thutholere ithwayitheya kutsibu kundi n’esyongumbu nyibi esyangasa hake omwa muthima syangana kolya okwa kibi ekikalire. Aliriryo ekibuya, thwamaghanira ighuma esyongumbu nyibi, isithwendiwa omwa by’obutswatswa n’ebitsibu ebikalhwiririramu! (Gal. 5:16) Thulebaye ebindu bisathu ebikendi thuwathikya erirwanisya esyongumbu nyibi: obughuma bwethu na Yehova, erihabulha eriri omwa Kinywe kiwe, n’obuwathikya bw’Abakristayo balikyethu abakulire bunyakirimu.

4. Busana naki ni kikulhu eriyithunda hakuhi na Yehova?

⁴ E Biblia yikahabulha abakanza ‘eriyithunda hakuhi na Nyamuhanga’ yithi: ‘Munabaye ebyalha byenyu, mweraye emithima yenyu.’ (Yak. 4:8) Thwamabya ithunatsomene obughuma bwethu na Yehova, ithukendi lengaho erikolha ekyosi-kyosi ekikamutsemesaya omwa ngebe yethu yosi, nibya n’omwa malengekania wethu. Ithukendianza eribya ‘bathunganene omwa malengekania’ omw’ihiragho okwa bibuyirire, ebyanganzwa, n’eby’erisimwa. (Esy. 24:3, 4; 51:6; Fil. 4:8) Ni kwenene, Yehova anasi obuthahikana bwethu. Anasi ngoku thwanganasa mw’esyongumbu nyibi. Aliriryo thunasi ngoku kikamuponesaya thwamayireka mw’amalengekania mabi omwakanya k’erikolha ekyosi-kyosi erirwanisyagho. (Enz. 6:5, 6) Eki kikaleka ithwalengaho kutsibu eribya ithunawithe amalengekania aw’erire.

5, 6. Erisaba lyanga thuwathikya lithi thukarwanisya esyongumbu nyibi?

⁵ Enzira ngulhu ey’erikanganiryamu ngoku thuyikethere kutsibu Yehova ly’erimusaba thukarwanisya amalengekania mabi. Omughulhu thukayithunda hakuhi na Yehova omwa musabe, nayu akayithunda hakuhi nethu. Akathuha omulimu wiwe abuyirire, neryo ithwathoka erirwanisya amalengekania mabi, neryo ithwabya ithun’erire. Kwesi thukanganaye Nyamuhanga ngoku thwanzire kutsibu erimutsemesya omwa malengekania w’omuthima wethu. (Esy. 19:14) Omw’iyikehya, thukanamusaba thuthi alebaye emithima yethu nga mune ‘eritheba,’ ni bugha ambu, esyongumbu nyibi syosi-syosi esyangakolya okwa kibi? (Esy. 139:23, 24) Thukanamusaba obuwathikya obw’eribya ithune batheleghulha omughulhu hangabya erilengwako?—Mt. 6:13.

⁶ Aha thwakulira n’ebya thwabya thukakolha kera byanganabya ibyabirileka ithwanza ebya Yehova akapona. N’omwa mibere ng’eyi, iniakendi thuwathikya erikolha esyombinduka esikayithaghisibawa nuku thulhole embere erimukolera ngoku anzire. Omwami Dawudi mwaminya ekyo. Dawudi mwabya abirisingira na Batiseba, mwabwira Yehova athi: ‘Wuhangike omuthima owuwene omw’isi waghe kandi wuhire ekirimu kithunganene omw’isi waghe, wunyihanganaye.’ (Esy. 51:10, 12) Obuthahikana bwethu bwangana leka ithwanza ebithuwene, aliwe Yehova angana thuha omuthima ow’eryanza erighendera okwa bihano biwe. Esyongumbu nyibi nomusyangabya isyabirithusulhamu n’eryanza erikubathirya amalengekania wethu aw’erire, Yehova angana thusondolha nuku thughendere okwa bihano biwe n’erighasirwa mubyo. Angana kakirya ekyosi-kyosi ekibi ekyanga tsandya amalengekania wethu.—Esy. 119:133.

7. Ekinywe kya Nyamuhanga kyanga thuwathikya kithi eriyitheya okwa malengekania mabi?

⁷ Thwamasaba Yehova y’obuwathikya, angana subirya erilhabira omwa Kinywe kiwe, e Biblia. Amenge awali omwa Kinywe kya Nyamuhanga ni “mabuya” kutse erire. (Yak. 3:17) Erisoma e Biblia Mughulhu wosi n’erighanirya okwa bya thukasoma, kyangana thuwathikya erikakirya amalengekania mabi. (Esy. 19:7, 11; 119:9, 11) Eryongera okw’ekyo, omwa Biblia muli eby’erileberyako n’amahano awanga thuwathikya eriyihighulha okwa syongumbu nyibi.

8, 9. (a) Ni kyahi ekyaleka omulhwana mughuma iniakolha obusingiri? (b) Eky’erileberyako ekiri omwa Emisyo sura 7 kyangana lhangirika omwa mibere nga yahi munabwire?

⁸ Emisyo 5:8, hakabugha hathi: ‘Wuhire enzira yawu ya hali kw’iyo [omukali omusingiri]; siwuhike hakuhi n’olhukyo lhw’enyumba yiwe.’ Akabi ak’erigheghena ekihano eki kakakanganibawa omwa ky’erileberyako ekiri omwa Emisyo sura 7, ekikakanaya okwa mulhwana oyukayibunga-bungiraya hakuhi n’enyumba ey’omukali musingiri. Obuthuku buli kw’ira. Neryo omukali oyuwambere lhusingiri-singiri amamuhikako. Amamuwako n’erimulyatsirira. Ebinywe biwe by’olhuthetho mubyalethera omulhwana  y’esyongumbu nyibi isyangathasya thoka eriyikakirya. Neryo mubasingira. Omulhwana akabya nga syabya awithe ekighendererwa eky’erikolha obusingiri. Bwabya buthaminya n’erithendi thwamu ndeke. Nomwabine, ekyo mukithamubalya okwa bitsibu ebya lhwiririra omwa ky’akolha. Kw’anaminya akamubyako hali!—Emi. 7:6-27.

⁹ Mbwino nethu ithwangana yisanga ithwabirikangania omubere w’erithendi thwamu ndeke oyu, ng’eriyihira omwa mibere eyanga thuletha mw’esyongumbu nyibi? Ng’eky’erileberyako, omwa kiro, ab’esyotivi bangana hira kw’ekyosi-kyosi ekithuwene. Neryo ibbwa thwamabya ithukanabera erilebya etivi? Kutse obundi thwangana kwama kya kyungulha ekyosi-kyosi ekiri okwa Intaneti ekyangana thukolya okw’irebya eby’obutswatswa. Mbwino omwa mibere ng’eyi, sithwangayibana ithwamabiri lebya ebyangathuletha mw’esyongumbu nyibi neryo ikyathulemesya eribya ithun’erire?

10. Busana naki eriyanzirirya ni ry’akabi? (Lebaya ekisasani ekiri okw’itsuka)

¹⁰ Eyindi nzira eya Biblia yikathuwathikirayamu ly’erithuhabulha ngoku thwanga kolangana n’abathe b’olhubutho ng’olhwethu. (Soma 1 Timoteo 5:2.) Erihabulha ng’eri likakanganaya ngoku sithutholere thukayanzirirya. Abandi bakalengekanaya bathi ebinywe, esyosayini, n’emisamalire eyikakanganaya nga wanzire omundu sibiwithe kabi. Aliriryo eriyanzirirya, kutse erilighira omundu ayanziriraye okw’ithwe, lyanganaleka ithwasa mw’amalengekania awangana thwingirya omwa by’obusingiri. Eki kyabiribya okwa bangyi—nawu kyangana kubyako.

11. Ni ky’erileberyako kyahi kibuya ekya Yozefu akathuhiriraho?

¹¹ Yozefu iyo mwakolha omwa menge. Omughulhu mukali wa Mukama wiwe, Potifa, abya akamuthetha-thetha, Yozefu mwaghanira ighuma. Muka Potifa mwamuhathikana. Obuli kiro iniakabugha athi basibe haghuma. (Enz. 39:7, 8, 10) Oyusomire ebye Biblia akabugha athi, muka Potifa abya ng’oyukabugha athi: “‘Ithwanasiba haghuma,’ nuku Yozefu angayira eky’akabugha.” Aliriryo Yozefu iyo mwathaligha nahake eby’olhuthetho ebyo. Yozefu mwath’angirira eriyanzirirya eryo, kutse iyo eriyanzirirya kw’iyo, kyamamuwathikya erithendiasa mw’esyongumbu nyibi. Omukali oyo abere akanza erimuhamba athi aghotsere nayu, Yozefu mwayira eky’akakolha omwa byalhuba. ‘Mwasigha olhukimba lhwiwe omwa byalha bya muka Potifa, mwathibitha, mwahulhukira eyihya.’—Enz. 39:12.

12. Ni kyahi ekikakanganaya ngoku erisamalira lyangana thuhambako?

¹² E Biblia kandi yikathukanganaya ngoku n’ameso wethu angana thuthebya. Erisamalira omwa lhukumbu-kumbu lyanganaletha omwa mundu mw’esyongumbu sy’emyatsi y’engyingo. Yesu mwabugha athi ‘obuli mundu oyukasamalira omukali omwa ngumbu nyibi iniamabiri singira nayu omwa muthima wiwe.’ (Mt. 5:28) Th’ibuka ekyabya okwa Mwami Dawudi. ‘Okwa lhuthwe lhw’enyumba [Dawudi] mwasamalira omukali ak’ogha.’ (2 Sam. 11:2) Mwathalhusyayo ameso n’erihira amalengekania w’ahandi. Ekyo mukyaleka amayighomba muka bene n’erihika okw’isingira nayu.

13. Busana naki thutholere ithwakolha ‘endaghano n’ameso wethu,’ kandi mwamuli erikolhaki?

¹³ Erirwanisya amalengekania w’eby’obutswatswa, thutholere ‘ithwakolha endaghano n’ameso wethu,’ ng’omuthaleghulha Yobu kw’akakolha. (Yobu 31:1, 7, 9) Thutholere ithwathwamu erithendi samalira abandi omwa meso w’olhuthetho-thetho. Kandi sithutholere thukasamalira n’ebisasani by’obutswatswa, mbulha biri okwa kombyuta, okwa byapa, omwa bitabu, kutse ahosi-hosi.

14. Erihabulha ery’eribya ithun’erire lyanga thughasira mughulhu wahi?

 ¹⁴ Omwa byamakanibwako ebi mwamabya imune ekyamakuhambako, wutholere iwakikolhako omwa byalhuba. Ligha erighendera okw’ihabulha eriri omwa Kinywe kya Nyamuhanga. Eki kikendi leka iwayihighulha okwa bithatholere neryo iwasighalha iwun’erire.—Soma Yakobo 1:21-25.

15. Esyongumbu sy’erikolha eby’obutswatswa syamabya isinemukulyambya, busana naki wutholere iwasondya obuwathikya?

¹⁵ Ahandi ahawanga bana obuwathikya esyongumbu sy’eby’obutswatswa syamabya isinemukulyambya, b’Abakristayo balikyethu. Ni kwenene sikyolho eribwira abandi okwa kitsibu ng’eki. Aliwe thwama thendi yisaghirira, neryo thukabwira Omukristayo oyukulire bunyakirimu, ikikendi thuwathikya erithendi gheghena amalengekania w’eby’obutswatswa. (Emi. 18:1; Ebr. 3:12, 13) Eribwira Omukristayo oyukulire bunyakirimu obutseke bwawu kyangana kuwathikya eriminya ahawang’uwania. Eki ikikendi kuwathikya erikolha esyombinduka nuku wuyibike omwa lhwanzo lhwa Yehova.

16, 17. (a) Abasyakulhu bangawathikya bathi abane mulyambibwa n’esyongumbu nyibi? Iha eky’erileberyako. (b) Busana naki abakalebaya eby’obutswatswa batholere ibasaba obuwathikya omwa byalhuba?

¹⁶ Kwilhabirirya abasyakulhu b’ekithunga b’abatholere erithuwathikya. (Soma Yakobo 5:13-15.) Mughalha wethu mughuma e Brazil mwaghunza myaka mingyi esyongumbu nyibi isinemumulyambya. Akabugha athi, “Nabya inganasi ngoku ebikabera eryasa omwa malengekania waghe sibiritsemesaya Yehova, aliwe ini ngabikwira isoni eribibwira kw’abandi.” Eky’omughisa, omusyakulhu oyutsomene omwa kithunga kiwe mwamuhikako n’erimuhabulha athi asabe obuwathikya. Enyuma waho, mughalha wethu oyu akabugha athi: “Nabere nakania n’abasyakulhu, munasweka ingalhangira ku banyitsomene, ibanyitsomene kwilhaba ngoku ngalhue ingalengekania. Mubahulikirira ndeke ingababwira ebitsibu byaghe. Mubakolesya amasako erinyikangania ngoku Yehova akinanyanzire, kandi bamasaba haghuma naghe. Ekyo mukyaleka ikyanyolhobera eriligha erihabulha lye Biblia erya banyiha.” Enyuma w’aho abere abirikulha-kulhana bunyakirimu, mwabugha athi: “Hathya nabiriminya ngoku ni ky’omughaso erisaba obuwathikya omwa kanya k’eriyihunira n’ebitsibu byawu.”

¹⁷ Ni kikulhu erisaba obuwathikya wamabya iwukasa mw’esyongumbu nyibi habw’omutse wawu ow’erilebya eby’obutswatswa. Wamalindirirya erisaba obuwathikya, esyongumbu nyibi esyo isikendi kukuliramu imwalhwiririra ekibi ekyanga hamba n’okwa bandi n’eritsandya erina lya Yehova. Busana n’eryanza eritsemesya Yehova n’eryanza eribya ibane omwa kithunga kyabirileka abaghombe ba Yehova bangyi ibaligha erihabulhwa.—Yak. 1:15; Esy. 141:5; Ebr. 12:5, 6.

18. Erithwamu lyawu ni ryahi?

¹⁸ Omughulhu emibere eyiri omwa kihugho ekiri omwa buthoki bwa Sitani yinemw’ongera eritsandira ighuma, Yehova k’angabya iniakatsema akalhangira abaghombe biwe bakahiraho akaghalha eribya n’obulengekania obw’erire n’erighendera okwa misingyi yiwe! Neryo kwesi, obuli mughuma w’okw’ithwe athwemu eribya iniane bughuma na Yehova n’eriligha obusondoli obw’akathuha erilhabira omwa Kinywe kiwe n’ekithunga ky’Ekikristayo. Eribya ithun’erire kikaleka ithwayowa ndeke kandi ithwabya n’amalengekania awathekene. (Esy. 119:5, 6) Sitani akendisyabya abirilhusibwaho, thukendisyabya n’olhusunzo olhw’eribyaho kera na kera omwa kihugho ekihenirye kandi ekithe mw’obuthebya bwiwe.