Paul oyuthahirye kandi inianawithe abaana babiri akabugha athi: “Omwa kihugho ky’ewethu ebbeyi y’ebindu muyayihanika kutsibu, ebyalya byamakalha n’eribulha. Ithuk’imana okwa mulhondo thukayaghulha ebyalya, nibya n’abandi ibyabahwerako. Abandu mubabonda n’eritsuka eriyithiningira omwa syonzira busana n’enzalha. Ebbeyi y’eby’erikolesya buli kiro muyahika omwa syomiliyoni, yamahika n’omwa syobbiliyoni. Endambi muyahika, esyosente syamabya isisikiwithe mughaso. Munabya isinanga thasyalhusya okwa banka kwa sente, isingakiwithe e insurance, kandi isingakithunga n’omusara wosi-wosi.”

Paul abya inianasi ngoku ab’eka yiwe erithoka erilhama, atholere iniakolesya “amenge.” (Emisyo 3:21) Akabugha athi: “Nabya ngasomire eby’amasanyarazi, aliwe munabya ngakolha omubiiri wosi-wosi ogho namabana, nomubangabya ibakendimba sente nyike kutsibu. Abandi ibakanyithuha omwa byalya n’abandi ibamba ebindu by’omwa nyumba. Ibakabya bamamba emithi ng’ini y’esabbuni, iningakolesaya ibiri inaghulya eyibiri. Endambi muyahika namathoka erighulha ehyana 40 ehy’esyongoko. Musyabya syabirikulha, munasighulya namaghulha ebindi byana 300. Enyuma w’aho, munahingisya esyongoko 50 mw’esyokilo 100 sy’obusara bw’ebikusa. Obusara obo mubwawathikya eka yaghe n’abandi habw’omughulhu muuli.”

Paul kandi abya inianasi ngoku ekikulhu kutsibu ly’eriyikethera Nyamuhanga. Akathuwathikaya thwamaghendera okwa bihano biwe. Okwa mwatsi w’eribana ebiyithawa by’engebe, Yesu mwabugha athi: ‘Simuhanga-hangaye emithima. Kusangwa Thatha wenyu anasi ebibali bwagha.’​—Luka 12:29-31.

Eky’obulighe, Sitani, enzighu ngulhu ya Nyamuhanga, abiriletha omwa bandu bangyi mw’omuthima w’eritsomana eby’ekinyamubiri bisa omwa ngebe yabu yosi. Abandu bakahanga-hangaya kutsibu busana n’ebiyithawa byabu, kandi ibayihira n’omwa maghaniryo manene w’eryanza eribana n’ebya batheyithagha. Abangyi bakayihira n’omwa mabanza ib’ibirirwa ngoku  ‘omuyibweki ni mughombe w’oyukamubweka.’​—Emisyo 22:7.

Abandi bakatsuka n’erithwamu nabi. Paul akabugha athi: “Abanene mubasighania amaaka n’abanywani babu busana n’erisondekania ‘engebe eyuwene’ omwa bindi bihugho. Abandi mubaghenda isibawithe ebipapura ebikabalighira, neryo bamabya isibanga bana emibiiri. Ibakabera eribisama abapolisi n’erighotsera omwa syobbalazi. Mubathayikethera Nyamuhanga. Aliriryo ingye n’eka yaghe muthwathwamu erighumira ebitsibu ebi, thwamayikethera Nyamuhanga.”

Paul ak’ongera athi: “Yesu mwabugha athi: ‘Neryo simuyilhuhaye n’amaghaniryo busana n’omwa ngyakya, kusangwa engyakya yasyabya n’amaghaniryo wayo. Obuli kiro kiwithe obulighe bwakyo.’ Neryo obuli kiro iningasaba Nyamuhanga indi ‘wuthuhe munabwire akalyo kethu akathutholere’ nuku thuthoke eribya ithuneho. Kandi kwenene mwathuwathikya, ngoku Yesu anabugha. Aliwe isithulibera eribana ebya thwanzire. Munan’imana okwa mulhondo, isingasi nga ni byalyaki ebikaghulibawa. Nabere nahika embere namalhangira ini yoggati. Isindyanza eyoggati. Aliriryo y’eyabyaho ng’ebyalya. Ekiro ekyo muthwalhalirayo. Ngasima Nyamuhanga kundi omwa buthuku obwosi obo, muhathabya ekiro thwakesirye nzalha.” *

“Lino emibere siyikithukalire nga kera. Aliwe omwa bya thwabirilhabamu thwabiriminya ngoku omubatsi w’amaghaniryo lyan’eriyikethera Nyamuhanga. Yehova * syanga thulekerania thwamabya ithunemukolha erisonda liwe. Thwabirilhangira eribererera ly’ebiri omwa Esyonyimbo 34:8 bino: ‘Wulenge, wulebaye Yehova kw’ali mubuya! Obutseme buli oko mundu oyukamusaghirako!’ Ekyo kikaleka ithwabya isithwanga yilhalikirira, eby’esyosente nomubyanga thasyatsanda.

“Lino thwabiriyilhangirira ngoku omubiiri kutse esyosente siby’ebikaleka omundu iniabyaho, aliwe by’ebyalya. Thulindirire eribererera ly’omulhaghe wa Nyamuhanga ow’akabugha athi: ‘Engano yibyeho nene omwa kihugho kyosi.’ Aliwe ekyo kithe kyabya, ‘thwamabya n’akalyo, n’eky’eriyiswika, thukendi thatsemera ebyo.’ Ebinywe bye Biblia bino bikathughumaya: ‘Simukwamirire eryanza esyofranka, nikwa mutsemere ebyo muwithe. Kusangwa Nyamuhanga abiribugha athi, Singendi syakuleka na kera, kandi, singendi syakusighania nahake.’ Kikaleka ithwabugha butsira eryubaha thuthi: ‘Yehova ni muwathikya waghe, singendi syubaha!’ *

Kikayithagha erikirirya erighumire erithoka ‘erilendera haghuma na Nyamuhanga’ nga Paul n’eka yiwe. (Enzuko 6:9) Thwamabya ithune omwa kitsibu ky’eby’esyosente ng’eki kutse kyamasyathwasira, thutholere ithw’ighira oku mughalha wethu Paul erikolesya amenge n’eribya n’erikirirya.

Ibbwa ebitsibu by’amaka byamabya ibya bikathulethera amaghaniryo?