OMWATSI W’OKWA KIDIPA | ERIRWANISYA AMAGHANIRYO
Amaghaniryo Ali Ahosi-hosi!
“Munayaghulha ebyalya aliriryo nam’eya iyiri ehibbisikwiti buyira kandi ebbeyi yahyo iyabiryongera emirundi 10,000! Engyakya, omwa kathali mumwabya isimukiri n’ekyalya.”—Paul, owe Zimbabwe.
“Mwira waghe mwany’ikalya n’erimbwira athi amanyireka. Eki nanga kighumire indi? Kandi ibbwa abaana baghe?”—Janet, owe Amerika.
“Ngathibitha n’eriyalhambama ahisi ing’owa esyobbomu sikahutangika. Hakalhaba esyosaha nyingyi ebyalha byaghe ibikinatukumira.”—Alona, owe Israeli.
Thuli omwa mughulhu w’amaghaniryo, ‘emighulhu eyikalire.’ (2 Timoteo 3:1) Abangyi bawithe amaghaniryo w’eby’emingirirye, amaka erisambukalha, esyonyuhi, amalhwere awakalha-kalire, n’ebitsinduli ebikayibuthukira kutse ebikalethawa n’abandu. N’abandi bakabya ibanawithe amaghaniryo ng’ano: ‘Mbwino obukoni obwabanikire okwa mubiri waghe yikendibya kansa?’ ‘Abitsikulhu baghe bakendi kulire omwa kihugho ekiri kithi?’
Amaghaniryo wosi si mabi. Ni kya buli kiro omundu erikwa engitsi akayakolha ng’ekizamu, er’imana embere sy’abandu bangyi, kutse akayasubirya ebibulyo by’erihebwa omubiiri. Erikwa obuba likanathubalhaya okwa kabi. Aliwe eriyilhalikirira ery’olhughumerera ni ry’akabi. Erisekulya erya lino-lino okwa bandu 68,000 mulyakangenie ngoku n’amaghaniryo make buyira ow’olhughumerera anganaleka omundu iniaholha lhuba. Ky’ekyaleka Yesu iniabugha athi: ‘Nindi okw’inywe amayilhuhya busana n’amaghaniryo angathoka eriyithomekera okwa ngebe yiwe kwehi?’ Kandi kwenene, eriyihira omwa maghaniryo sikiwithe ekya kikawathikaya. Ky’ekyaleka Yesu iniahabulha athi: ‘Simuyilhuhaye n’amaghaniryo.’ (Matayo 6:25, 27) Aliwe ibbwa, omundu angana thoka?
Iniakendi thoka amakolesya ndeke amenge, eribya n’erikirirya erighumire omu Nyamuhanga, n’erithunga amaha awasikire. Thwanganabya isithuli omwa bitsibu ebikalire hathya, aliwe ibyasyabanika embere. Kwesi thulebaye ngoku ebi bya wathikaya Paul, Janet, na Alona omwa maghaniryo wabu.
