Mbwino wukalengekanaya ekighendererwa ky’engebe ly’erisatha, erikolha emibiiri, erithahya n’erithahibwa, eributha abaana, n’erikulha bisa? (Yobu 14:1, 2) E Biblia yikakanganaya ngoku nibya n’abandu b’amenge babiriyibulya ekyo.—Soma Omugambuli 2:11.

Mbwino hane ekilekire ithwabya n’engebe? Okw’eki, ambi ithwatsuka eriyibulya, Engebe yatsuka yithi? Abangyi babiriligha ngoku hane Omuhangiki ow’amenge oyuwathuha engebe omughulhu bakalhangira emikwikire y’obwongo n’omubiri wethu. (Soma Esyonyimbo 139:14.) Kyamabya kithya, kwesi hane enzumwa eyaleka iniathuhangika! Thwamaminyayo, ithukendi tsemera engebe yethu.

Nyamuhanga mwatsumulha abandu babiri ab’erimbere n’eribaha olhukwamirwa lhubuya. Aby’anzire ib’ikalha okwa kihugho kwa kera na kera ibakyusulya n’erikikolha mwa paradiso.—Soma Enzuko 1:28, 31.

Ekighendererwa kya Nyamuhanga eki muk’imanibwa busana n’abandu eriyisamambulha okwa buthabali bwiwe. Aliriryo Nyamuhanga mwathathulekerania—kutse ekighendererwa kiwe. E Biblia yikathukanganaya ngoku Nyamuhanga abirihira h’endegheka y’erilhamya abandu abathaleghulha, kandi ngoku akendi syaberererya ekyaleka iniahangika ekihugho! Neryo Nyamuhanga anzire iwabya omwa ngebe ey’athegheka! (Soma Esyonyimbo 37:29.) Soma e Biblia wanaminya ngoku wanga ghasirwa omwa bya Nyamuhanga abirilhagha.