1, 2. (a) Ni mighisa yahi ey’ekinyamubiri eya wulindirire kutsibu omwa kihugho Paradiso? (Lebaya ekisasani ekiri okw’itsuka.) (b) Ni mighisa yahi ey’obunyakirimu eyikendi syabya omwa kihugho kihya-kihya?

“ENGEBE EYIRI NGEBE KUNDU.” Ebinywe ebi bikaleka ithw’ibuka amaha w’engebe y’erikotha okwa kihugho Paradiso. Erithwalira haghuma, omukwenda Paulo mwakangania ngoku “engebe y’erikotha” “y’engebe eyiri engebe kundu.” (Soma 1 Timoteo 6:12, 19.) Thulindirire engebe ey’erisyabyaho kera na kera kandi eyikendi syathulethera etseme eyithabahwa. Sithwasi nga thukendi syayowa thuthi thukabuka buli kiro ithune n’amaghalha n’amalengekania awuwene kutsibu. (Isa. 35:5, 6) Thalengekania nga kikendi syatsemesya bungahi thukabya haghuma n’ab’okw’ithwe n’abanywani bethu, imwamuli n’ababirilhubukibwa! (Yn. 5:28, 29; Emib. 24:15) Kandi thukendi syabya n’akaghisa ak’eriminya ndeke eby’eseyansi, eby’esyonyimbo, eby’obuhimbe, n’ebindi-n’ebindi.

² Nomuthunalindirire ebibuya ebyosi ebi, kutsibu-tsibu emighisa y’embaghane eya thukendi syabana omwa kihugho kihya-kihya y’ey’obunyakirimu. Kikendi syatsemesya bungahi eriminya ngoku erina lya Yehova lyabiriyirwa mwa libuyirire kandi ngoku obuthabali bwiwe bwa buhikire! (Mt. 6:9, 10) Thukendi syatsema  kutsibu thukalhangira ebyo Yehova athegheka erimbere busana n’abandu n’ekihugho bikabererera. Kandi thalengekania ngoku kikendi syolhoba eriyithunda hakuhi na Yehova, thunemughenda thukabya bandu bahikene!—Esy. 73:28; Yak. 4:8.

3. Thutholere ithwabya ithunamuyitheghekeraki lino?

³ Thukendi syabana emighisa eyi kundi Yesu akathukakasaya athi “oku Nyamuhanga emyatsi yosi yikathokekana.” (Mt. 19:25, 26) Aliriryo thwamabya ithuli n’amaha aw’erisyabya omwa kihugho kihya-kihya ekyo—n’erisyalholha embere ithuneho enyuma w’Emyaka Rukumi ey’Erithabalha lya Kristo—eno y’endambi ey’erikanganiryamu ngoku “thuhambire ndeke” amaha w’engebe y’erikotha. Thutholere ithwabya ithunalindirire enduli y’ekihugho kibi kino, kandi ithwayira ekya thukakolha lino eriyitheghekera erisyabya omwa kihugho kihya-kihya. Thwanga kolha eki kya thuthi nibya ithukine omwa mughulhu mubi ono?

4. Iha eky’erileberyako ngoku thwanga yitheghekera lino erisyabya omwa kihugho kihya-kihya.

⁴ Lino thwanga yitheghekera thuthi erisyabya omwa kihugho kihya-kihya kya Nyamuhanga? Thuthabugha thuthi wukanza erihumira omwa kindi kihugho. Iwukendi yithegheka wuthi? Iwangana tsuka erigha omubughe ow’abandu ab’eyo. Erigha okwa mibere ey’ewabu ikikendi kughasira. Iwangana tsuka n’erilengesya erirya okwa byalya eby’omwa kihugho ekyo. N’okwa lhulengo lhulebe, ithwangana tsuka eriyithwalha ng’abikalhani ab’omwa kihugho ekyo. Kundi eyo ya mibere thukendisyeyayo thukahikayo. Kuthya, lino thwangana yitheghekera erisyabya omwa kihugho kihya-kihya, omw’irengaho eriyithwalha ng’abane mukyo. Thuthalebya ngoku thwanga kolha eki.

5, 6. Erighondera obusondoli bw’ekiteokrasi lino likendi thuwathikya lithi eriyitheghekera ekihugho kihya-kihya?

⁵ Omwa kihugho kihya-kihya, obuthabali bwa Nyamuhanga busa bw’obukendi syabyaho. Obu bukendisyabya buthabali bwa mbaghane okwa buli omwa kihugho kya Sitani kino. Munabwire abandu banzire eriyithabalhako n’erikolha ekya banzire butsira erighendera okwa busondoli bwa Nyamuhanga. Eki mwabirilhwiririra eriaghalhwa, amalighe, nibya n’ebitsinduli. (Yer. 10:23) Ka thukakandira kutsibu omughulhu abandu bosi bakendi syaghondera obuthabali bwa Yehova obw’olhwanzo!

⁶ Kikendi syatsemesya erighenda-ghendania n’emitheghekere ya Yehova omwa kihugho kihya-kihya thukuwania ekihugho, erikangirirya abakalhubuka, n’erikolha erisonda lya Nyamuhanga. Neryo ibbwa thwamasyahebwa omubiiri owathuthabya thwanzire? Ithune mwendi syaghondera obusondoli obo n’erilengaho kutsibu erikolha omubiiri oyo ithunatsemire? Abanene, ithukendi bugha thuthi ee! Kyamabya ikwa kiri kithya, mbwino thunemughondera obusondoli bw’ekiteokrasi lino? Thwamabya ithunemukolha ekyo, obo ithunemuyitheghekera engebe y’erikotha omwa buthabali bwa Yehova.

7, 8. (a) Busana naki thutholere ithwabya n’omuthima w’erikolangana? (b) Ni mbinduka syahi esya bandi Bakristayo babiribana? (c) Ni kyahi ekya thutholere ithwabya ithunasi okwa ngebe omwa kihugho kihya-kihya?

⁷ Eryongera okw’ighondera emitheghekere ya Yehova eya munabwire, thukayitheghekera ekihugho kihyakihya n’omw’ilhangira thuthi lino thukabya n’omuthima w’eritsemera ebya thuwithe n’erikolangana n’abandi. Thwamakolangana ndeke n’abakathusondolha munabwire, obundi ng’eritsemera olhusunzo olhwa thwamahebwa, amalengekania ng’ayo iwathunemwendi syabya nagho omwa kihugho kihya-kihya. (Soma Abaebrania 13:17.)  Omwa Kihugho Ekya Lhaghanisibawa, emyandu y’Abaisraeli iyikaghabawa omw’ighereka. (Emig. 26:52-56; Yos. 14:1, 2) Ni kwenene munabwire sithwasi nga ni hayi ahathukendi syahebwa er’ikalha omwa kihugho kihya-kihya. Aliriryo, erikolangana likendi syathulethera etseme nene ithunemukolha erisonda lya Yehova ahosi-hosi aha thukendi syabya ithwikere okwa buthuku obo.

⁸ Sihali ekilengire olhusunzo lhw’eribya omwa kihugho kihya-kihya omw’ithabalha ly’Obwami! Busana n’ekyo kikathutsemesaya erikolangana n’ekithunga kya Yehova lino n’erikolha ekyosi-kyosi ekya thukahebawa erikolha. Aliwe endambi yangana hika emibere eyathulimu iyahinduka. Ng’eky’erileberyako, abandi balikyethu e Amerika mubab’iha okwa Beteli bamabasubya omwa yindi mibiiri y’omughulhu wosi. Banemutsemerayo n’eribana mw’emighisa mingyi. Busana n’emibere mirebe kutse erikulha omo myaka, abandi ababya balebererya abakabalhama, lino bakakolha ng’abatemburi b’embaghane. Thwamabya n’omuthima w’eritsemera ebya thuwitheko, thukasaba Nyamuhanga y’obuwathikya, n’erikolha ngoku thwanga thoka omwa mubiiri wiwe, ithukendi bana etseme n’eribana mighisa mingyi nibya n’omwa mughulhu owakalire ono. (Soma Emisyo 10:22.) Kandi ibbwa ithune omwa kihugho kihya-kihya? Thwangana syabya ithunawithe ahathwanzire ithw’ikalha, aliwe ibathubwira bathi thusube ahandi. Ahosi-hosi aha thukendi syabya ithuli n’ekyosi-kyosi ekya thukendi syabya ithukakolha okwa buthuku obo, thukendi syasima n’eritsema kutsibu.—Neh. 8:10.

9, 10. (a) Erighumisirizya lyangana syayithaghisibwa omwa mibere yahi omwa kihugho kihya-kihya? (b) Thwanga kangania thuthi ku thukaghumisirizaya?

⁹ Omwa kihugho kihya-kihya, thwangana syayithagha eribya n’erighumisirizya. Ng’eky’erileberyako, ithwangana syowa ngoku abandi babirilhubuka n’erilhangira abahughu n’abanywani babu ibabiritsema. Aliriryo ithwe ikyathuyithaghisya erilindirira erilhubuka ly’abanze bethu. Kyamasyabya kithya, thunemwendi syatsema n’abandi n’erighumisirizya? (Abar. 12:15) Erigha erilinda ithunaghumisirizirye eribererera ly’emilhaghe ya Yehova lino kikendi syathuwathikya erighumisirizya okwa buthuku obo.—Omu. 7:8.

¹⁰ Kandi thwangana yitheghekera ekihugho kihya-kihya omw’ibya n’erighumisirizya omughulhu hakabya eriyitheghererya lihya-lihya ery’ekwenene. Thukanasoma ndeke emyatsi eyi n’erikangania erighumisirizya thwamabya isithuthayitheghereryayo? Kyamabya ikwa kiri kithya, isikyendi syathukalira erighumisirizya omwa kihugho kihya-kihya Yehova akaghenda akabisulira abandu eby’akayithagha.—Emi. 4:18; Yn. 16:12.

11. Yehova lino anemuthukangirirya athiki okw’ibya bughuma n’abandi, kandi eki kikendi syathughasira kithi omwa kihugho kihya-kihya?

¹¹ N’owundi mubere owakayithaghisibawa lino erithoka erisyabya omwa kihugho kihya-kihya w’ow’erighanyira. Omw’Ithabalha ly’Emyaka Rukumi erya Kristo, kyangana syathwalha buthuku abathunganene n’abathathunganene erihwa mw’emibere ey’obuthahikana. (Emib. 24:15) Thunemwendi syathoka erikangania abandi b’olhwanzo okwa buthuku obo? Thwam’igha erighanyirana n’eriyihighulha okw’ikakakakania lino, ikikendi syathwolhobera okwa buthuku obo.—Soma Abanya Kolosai 3:12-14.

12. Busana naki lino thutholere ithwayitheghekera engebe omwa kihugho kihya-kihya?

¹² Erisyabya omwa kihugho kihya-kihya sibugha indi mughulhu wosi thwanganasyabya thukabana obuli ekya thukayithagha thukakyanza. Aliriryo, kikendisya thuyithayisya eritsemera emibere yosi-yosi eyathulimu ithunemughasirwa omw’ighondera obuthabali bwa Yehova obw’olhwanzo. Erithwalira haghuma, kikendi syayithaghisya  erikolesya emibere eya Yehova anemuthukangirirya lino. Neryo munabwire thukabya thukakulha-kulhania emibere ey’erisyikalha omwa kihugho kihya-kihya, thukabya ithukakulha-kulhanaya emibere eya thukendisyabya nayu kera na kera. Thukabya ithwamaghumya erikirirya lyethu ngoku ekihugho kihya-kihya kineyo. (Ebr. 2:5; 11:1) Eryongera okw’ekyo, thukabya ithukakandira kutsibu emibere y’erithunganene eyikendi syabya okwa kihugho omwa buthuku obo. Omo kwenene, thukabya ithukayitheghekera engebe y’erikotha omwa kihugho kihya-kihya.

13. Ni kyahi ekya thukendi syahira embere omwa buthuku obukasa?

¹³ Thuthasyalebaya eyindi nzira nguma ey’eriyitheghekera ekihugho kihya-kihya. Nomwakine indi thwabirilhaghanisibwa ebyalya bingyi n’ebindi bingyi omwa kihugho kihya-kihya, ekikendisyathutsemesya kutsibu ly’erisyughuthya ekiyithawa kyethu ky’eriminya ndeke Nyamuhanga. (Mt. 5:3) Eby’obunyakirimu bya thukendi syahira embere kutsibu, kandi thukendi syakangania ngoku thukatsemera Yehova. (Esy. 37:4) Omw’ihira eby’obunyakirimu by’embere lino, thukendibya ithukayitheghekera engebe kundu ey’omwa buthuku obukasa.—Soma Matayo 6:19-21.

14. Ni bilhubirirwa byahi eby’obunyakirimu ebya abalere bangayihiriraho?

¹⁴ Thwangongera thuthi etseme yethu omwa mibiiri y’ekiteokrasi? Enzira nguma ly’erihira h’ebilhubirirwa eby’obunyakirimu. Wamabya iwuli mulere kandi iwunanzire erikolha bingyi omwa mubiiri wa Yehova, iwanganalebya emibiiri muthina-muthina ey’omubiiri w’Obwami ow’omughulhu wosi neryo iwasombolhako nga mughuma eribya kilhubirirwa kyawu. * Kandi wangana kania n’omughuma w’okw’ababirighunza buthuku bunene omwa mubiiri w’omughulhu wosi. Omw’ikolha eki, wukendibya iwukayitheghekera erilholha embere erikolera Nyamuhanga omwa kihugho kihya-kihya, kandi eki kikendi syakughasira kutsibu.

15. Ni bilhubirirwa byahi eby’obunyakirimu ebya bathuliri b’Obwami banga yihiriraho?

¹⁵ Ithwe ng’abathuliri b’Obwami, ni bilhubirirwa byahi eby’obunyakirimu ebya thwanga yihiriraho? Ithwangan’ongera eryuwania eyindi mibere ey’erithuliramu. Kutse ithwangana lengaho kutsibu eriyitheghererya ndeke emisingyi ye Biblia n’erighendera kuyo. N’ekindi, ithwangan’ongera erisoma n’erikania ndeke kutse erisubirya omwa mihindano. Iwangana lengekania n’okwa sindi nzira. Enzumwa y’eno: Erihira h’ebilhubirirwa by’obunyakirimu  kikendi leka iwongera eribya n’omuhwa omwa mibiiri y’ekiteokrasi, kandi eki kikendi kuwathikya eriyitheghekera erisyabya omwa kihugho kihya-kihya.

16. Busana naki sihali ekirengire erikolera Yehova?

¹⁶ Omughulhu thukakolesaya endambi yethu thukayitheghekera ekihugho kihya-kihya, mbwino thukabya ithukayithalhaya okwa ngebe eyuwene munabwire? Eyihi nahake! Sihali ekilengire erikolera Yehova. Sithulimukolera nga thukakakawa kutse busana n’erithanza eribalha okwa bulighe bunene. Erikolera Yehova ky’ekikathulethera etseme nene, kandi thuhangikirwe ikya thutholere erikolha. Sihali ekilengire erighendera okwa busondoli bwa Yehova n’erikanganibwa olhwanzo lhwiwe. (Soma Esyonyimbo 63:1-3.) Si bugha mbu thuthanethwalinda ekihugho kihya-kihya imuthwabana emighisa y’obunyakirimu eyikalhwiririra omw’ikolera Yehova n’omuthima wosi—emighisa eyo yineho na lino! Kandi kwenene, abandi omw’ithwe bamabirighunza myaka mingyi ibanemubana emighisa eyi, kandi thwabiriyilhangirira ngoku sihali ekindi ekyanga thulethera etseme ng’erikolera Yehova.—Esy. 1:1-3; Isa. 58:13, 14.

17. Busana naki eby’omundu anzire n’eby’eritsemesya bikendi syabya ibitholere omwa Paradiso?

¹⁷ Ebya thwanzire n’ebikathutsemesaya sibyendi syabulha omwa kihugho kihya-kihya kya Nyamuhanga. Ekyo thukakiminya thuthya, kundi Yehova yuwanathuhira mw’omubere ow’erianza eriyitsemesya ndeke kandi anayitheghekire eriberererya obwagha obu omwa buswire. (Omu. 2:24) Omw’eki n’omwa yindi mibere, Yehova akendi ‘syughuthya obwagha bw’abosi.’ (Esy. 145:16) Eriyitsemesya litholere, aliriryo etseme eyikalhwiririramu yikongera thwamahira obughuma bwethu na Yehova bw’embere. Kwa kinemwendi syabya kithya omwa kihugho kihya-kihya. Ka kyangabya ky’amenge erigha erihira ebya thwanzire by’omo mwanya wabyo ithune muhira Obwami bw’embere n’erikwamirira emighisa y’obunyakirimu eyiriho busana n’abandu ba Yehova munabwire!—Mt. 6:33.

18. Thwanga kangania thuthi ngoku thunemuyitheghekera engebe y’erikotha omwa Paradiso?

¹⁸ Omwa Paradiso, thukendisyabya n’etseme nene eya thuthe thwathabana nakera. Kwesi thukanganaye ngoku thwanzire kutsibu engebe eyiri ngebe kundu omw’iyitheghekerayo lino. Ambi ithwakulha-kulhania emibere eyikakenga Nyamuhanga n’eribana etseme nene omw’isangira n’omuhwa omwa mubiiri ow’erithulhughania Obwami owathwabirihebwa. Ambi ithwatsemera erihira eby’obunyakirimu by’embere. Kandi ithunayikethere ndeke emilhaghe ya Yehova, ka thuyitheghekere lino erisyikalha omwa kihugho kihya-kihya!