OMWATSI W’OKWA KIDIPA | ABAKAHOLHA
Abakaholha Bakayahi?
“Nabya ngasi indi hali myanya isathu eyo mundu angayamu akaholha: elhubulha, omwa muliro, kutse omwa buligatuli. Iningayowa nga sinanga tholera erighenda elhubulha kutse eritholera omuliro. Iningabulha n’abali omwa buligatuli nga bakabyayo bathi. Ebi nabya isindinathabibana omwa Biblia. Ininga byowira omwa bandu.”
—Lionel.
“Mubathweghesya ambu abandu abosi bakaghenda elhubulha bakaholha, aliwe isindi kiligha ndeke. Ingasi indi wamabiriholha, ibyamahwa
—isihali aha wamaya.” —Fernando.
Nawu wunewathayibulya bino: ‘Abaholi bali omwa mibereki? Mbwino banemwaghalhwa eya bali eyo? Thunemwendi syasabalholhako? Hane eby’erisubirya ebyanga yiketherwa?’ Wukasabawa erilebya ebya Masako akabugha. Erithatsuka, thuthalebya e Biblia nga yikakanaya yithiki okwa lhuholho. N’enyuma waho ithwakania okwa maha awahambire okwa baholi awali omwa Kinywe kya Nyamuhanga, e Biblia.
Abaholi bali omwa mibereki?
EKYA BIBLIA YIKABUGHA: “Abaliho banasi kwa bakendi syaholha. Nikwa abaholi sibasiki, kutse sibawithe olhuhembo; kusangwa eryibukabo lyabiribiriranwa. Ekinduki ekyo ebyalha byawu bikabana erikolha, wukikole n’amaaka wawu wosi, kusangwa sihali mubiiri, kutse eritheghekania, kutse amenge ekulimu eyo wukaya.” *
Omwa bikuhi, ekulimu yikimanira emibere eya baholi balimo ey’eribya isibakyasiki kandi isibangakolha kindu kyosi-kyosi. Omulhume muthaleghulha Yobu, iyo abya asi athi ekulimu niki? Abya iniabiriherya ebindu biwe byosi n’abaana biwe omwa kiro kighuma, n’enyuma waho amahambwa obulhwere obukalire obw’ebimatha okwa mubiri wosi. Neryo mwalemba-lemba Nyamuhanga athi: “Kumbe wanganyibisa omo Kulimu, kumbe wanganyibikamo bubiso-biso.” (Yobu 1:13-19; 2:7; 14:13) Kwesi, oku Yobu, ekulimu syabya mwanya w’eriaghalirwamu, kundi syangasabire eriyayo. Aliwe, abya asi ekulimu ng’ah’eriyalhuhukira.
Hane eyindi nzira eyanga thuwathikya eriminya emibere eya baholi balimo. Thwanganalebya emyatsi eyiri omwa Masako eyihambire okwa bandu munani abaghenda bakalhubuka.
Sihali n’omughuma okw’aba oyuwakanaya okw’ibya iniabya omwa tseme kutse omw’aghalhwa. Abalhubukibawa kubabya imubanabya omwa mibere ng’eyi ibanaholire, mbwino isibanga bwire abandu okwa mibere eyo? Byamabya imubyabya, ka byangana handikirwe omwa Biblia nuku thubiminye! Eki kikakanganaya ngoku abandu munani abo mubathakania kyosi-kyosi okwa myatsi ng’eyo. Busana naki? Kundi babya isibasiki, ibali ng’abali omwa thulho othuthe kw’ilhotha. Nibya e Biblia yikanakolesaya ekinywe othughotseri yikamanyisaya olhuholho. Ng’eky’erileberyako omughulhu Lazaro aholha, Yesu mwabugha athi aghotsere.
Neryo ibbwa, hali mahaki okwa babiriholha? Bangana buka omwa thughotseri othu?
^ olhup. 7 Ekinywe “ekulimu” omwa Kihebrania ni “Sheol” kutse “Hades” omwa Kigiriki. Aliwe eky’eribugha ambu ekulimu eyo y’abandu bakayabya ng’emirimu babiriholha, s’ikangirirya ly’Amasako.
