1. Thuli omwa mighulhu eyiri yithi?

THULI omwa mughulhu ow’akalire kutsibu. Omughulhu ow’atsuka 1914 oyu, e Biblia yikahulhagho mwa “biro by’enyuma-nyuma.” Omwa mughulhu oyu, emibere yabiritsandira ighuma kwilhaba ngoku yabya omwaka oyu athe ahika. (2 Tim. 3:1-5) Kandi ibbwa ekihugho kikendi yongera eritsanda, kundi e Biblia yikabugha yithi “abandu babi, n’abathebya, basyakanyirira eribya babi.”—2 Tim. 3:13.

2. Omwa by’eriyitsemesya by’ekihugho kino muliki? (Lebaya ekisasani ekiri okw’itsuka.)

² Abandu bangyi bakayitsemesaya omw’irebya kutse erikolha ebya Biblia yikabugha yithi ni by’obwithi, eby’obutswatswa, eby’obukumu, n’ebindi ebyosi ebithetsemesaya Nyamuhanga. Ng’eky’erileberyako, okwa Intaneti, okwa syotivi, omwa syofilimu, n’omwa bitabu, emyatsi y’obwithi n’ey’obutswatswa yikakanganibawa ng’eyithawithe butsibu. N’emitse eyanabya yasibwe kwa ni mibi, hathya yinemuliwa n’esyogavumente omwa yindi myanya. Aliwe ekyo sikirimanyisaya kithi na Nyamuhanga  amalighirayo.—Soma Abanya Roma 1:28-32.

3. Abakaghendera okwa bihano bya Nyamuhanga, bakana lhangirawa bathi?

³ Abakristayo ab’omwa kighonye ky’erimbere mubayihighulha okw’iyitsemesya omwa bithuwene. Busana n’ekyo, kandi busana n’emibere yabu mibuya, abandi ibakabahemulikanaya n’eribenderererya. Ky’ekyaleka Petero iniahandika athi “bakasweka omughulhu muthesangira [Abakristayo] nabo omo syonye syabo sy’erithamira, neryo bakabatsuma.” (1 Pet. 4:4) Na munabwire, abakaghendera okwa bihano bya Nyamuhanga bakalhangirawa ng’abathalitheghere. Eryongera okw’ekyo, “abosi abanzire erikwama engebe y’erikenga Nyamuhanga n’erimathikana na Kristo Yesu, basyendereribwa.”—2 Tim. 3:12.

4. Amasako akathuhana athiki okwa by’ekihugho kino?

⁴ Amasako akahana abanzire erikolha erisonda lya Nyamuhanga ngoku sibatholere bakanza ekihugho n’emikolere yakyo. (Soma 1 Yoane 2:15, 16.) Amadini w’amabehi, ebithongole by’ekipolitiki, n’eby’ekisubure, n’emithahulha yosi eya bikalhabiraya kw’emyatsi, biri omwa busondoli bwa Sitani “nyamuhanga mubi w’ekihugho kino.” (2 Kor. 4:4; 1 Yn 5:19) Kwesi, ithwe ng’Abakristayo thutholere ithwalebya ndeke abathukanywana. E Biblia yikakikanganaya eki yikabugha yithi: “Simuthebibawe, abira babi bakatsandaya omuthima mubuya.”—1 Kor. 15:33.

5, 6. Ni bahi abathuthatholere thukanywana, kandi busana naki?

⁵ Thwamabya isithwanzire thukatsandya emibere yethu mibuya, sithutholere thukanywana abakakolha ebindu bibi. Eki sikirimanyisaya abathe Bema ba Yehova basa, aliwe nabo abakabugha bathi ni baramya ba Yehova kandi nibya ibanemuthwa ebihano biwe omw’ikighenderera. Abandu ng’abo bamathendi yisubamu, sithulisangira haghuma nabu omwa kyosi-kyosi.—Abar. 16:17, 18.

⁶ Thwamanywana abathekenga ebihano bya Nyamuhanga, ithwangananza erikolha ebya bakakolha nuku obunywani bulhole embere. Ng’eky’erileberyako, thwamanywana abanzire eby’obutswatswa, nethu ithwangana byanza. Eki kyabirihika okwa bandi Bakristayo, n’abandi babirihighithwa omwa kithunga busana n’erithendi yisubamu. (1 Kor. 5:11-13) Bamathendi yisubamu, ibakendibya omwa mibere eyo Petero akanayako.—Soma 2 Petero 2:20-22.

7. Ni bahi abathutholere ithwanywana?

⁷ Kwenene thutholere ithwatsomana abatheghendera okwa bihano bya Nyamuhanga, aliriryo sithutholere thukathunga nabu obunywani bw’ahakuhi. Neryo kwesi kiwire Omwema wa Yehova omuhuru eringira omwa buthethane n’omundu ng’oyo oyuthayihereyo oku Yehova kandi isimuthaleghulha n’erisikya ebihano biwe. Obuthaleghulha bwawu oku Yehova bulengire obuminywa obwa wangathunga busana n’erinywana abasibwe abakathwa ebihano bya Yehova. Aba thwanganywana batholere ibabya bandu abakakolha erisonda lya Nyamuhanga. Yesu mwabugha athi: “Oyukakolha erisonda lya Nyamuhanga, ya mughalha wethu, mwali wethu, na koyo.”—Mark 3:35.

8. Ni kyahi ekyahika okwa Baisraeli busana n’amanywani mabi?

⁸ Abaisraeli mubayilhangirira akabi akali omw’inywana abandu babi. Yehova abere akabalhusya omwa bunyewa mwe Misiri, mwasangwa ababwira okwa bandu abo bang’eghirye eya bakaya athi: “Siwusy’unamira esyonyamuhanga syabu kutse erikolerasyo kutse erikolha emibiiri yasyo; nikwa wasyathoghothyasyo, n’eritsutsanga esyonduhi  syasyo. Kandi mwasyakolera Omwami Mukulhu Nyamuhanga wenyu.” (Eri. 23:24, 25) Aliwe Abaisraeli bangyi mubathaghendera okwa busondoli bwa Nyamuhanga obu. (Esy. 106:35-39) Busana n’obuthowa bwabu, na Yesu mwabakaniako athi: “Mulebaye, oko wenyu kwamasighanibwa iko kwene.” (Mt. 23:38) Yehova mwaghana Abaisraeli, neryo amatsuka erikolangana n’ekithunga kihya-kihya ky’Ekikristayo.—Emib. 2:1-4.

9. Busana naki eby’okwa syotivi, okwa maradiyo, n’ebindi ng’ebyo byanganabya by’akabi?

⁹ Ebingyi ebikabya okwa syotivi, okwa maradio, n’ebindi ng’ebyo byangana tsandya obunyakirimu bw’Abakristayo. Emyatsi ng’eyi siyanga ghumya erikirirya lyethu omu Yehova n’emilhaghe yiwe. Aliwe, yikakanganaya ebilhubirirwa bibi by’ekihugho kya Sitani. Kwesi, thutholere ithwayitheya okw’irebya ebyanga thuletha “mw’esyongumbu sy’ekihugho.”—Tito 2:12.

10. Ni kyahi ekikendi hika okwa myatsi eyithuwene eyikasomawa n’erilebibwa?

¹⁰ Aha mbere aha, emyatsi eyithuwene ng’eyi eyikasomawa n’erilebibwa yikendibya isiyikiriho. Yikendihwaho ekihugho kya Sitani kikathoghothibwa. E Biblia yikabugha yithi: “Ekihugho, n’esyongumbu syakyo, byasyahwa. Nikwa oyukakolha erisonda lya Nyamuhanga asyakotha kera na kera.” (1 Yn 2:17) N’omuhandiki w’esyonyimbo mwabugha athi: “Abakolha-nabi basyahighwa; Nikwa abakayikethera Omwami Mukulhu basy’ikalha buholho omo kihugho. Nikwa abakayikehaya basy’ikalha ndeke omo kihugho, basyayitsemera omo buholho bunene.” Habw’omughulhu mungahi? “Abathunganene basy’ikalha omo kihugho mwa buholho, n’erisighalyakyo kera na kera.”—Esy. 37:9, 11, 29.

11. Nyamuhanga akaha athi abandu biwe by’ebyalya by’obunyakirimu?

¹¹ Erithendi sosana n’eby’ekihugho kino kikahulhukaya, ebya kithunga kya Yehova kikahulhukaya omwa biro by’enyuma-nyuma bino ibyo bikahira omwa bandu mw’omuhwa w’erikolha ebyanga bakolya okwa ngebe y’erikotha. Yesu abere akasaba oku Yehova, mwabugha athi: “Eyi ni ngebe y’erikotha, abandu bakuminye, iwe Nyamuhanga mughuma w’okwenene, n’eriminya Yesu Kristo, oyo wathuma.” (Yn. 17:3) Erilhabira omwa kithunga kiwe, Thatha wethu w’elhubulha anemuthuha ebyalya bingyi by’obunyakirimu ebikathuhimba. Ka thuli b’omughisa eribya ithunemubana esyogazeti, esyobrokyuwa, ebitabu, esyovidiyo, n’emyatsi okwa Intaneti ebikasighika eriramya ly’okwenene! Kandi ekithunga kya Yehova kyabirithuhirira h’emihindano omwa bithunga ebilhabire omu 110,000 omwa kihugho kyosi. Okwa mihindano eyo, imwamuli n’eminene-minene, thukabanira kw’emyatsi eyikalhua omwa Biblia eyikahimba erikirirya lyethu omu Nyamuhanga n’omwa milhaghe yiwe.—Ebr. 10:24, 25.

12. E Biblia yikamanyisayaki yikabugha yithi ambi iw’ingira omwa butheke n’oyuli “Mukristayo kwenene.”

¹² Abakristayo abahuru, kutsibu-tsibu batholere ibalebya ndeke aba bakanywana. E Biblia yikabugha ndeke-ndeke yithi: “Simumathikane n’abathikirirye; Kusangwa ekithunganene kyangasangira kithi n’ekibi kwehi? Kutse ekyakakalha kyanganasakana n’omwirima kwehi?” (2 Kor. 6:14) E Biblia yikahana abaghombe ba Nyamuhanga abakasondaya ow’eringira nayu omwa butheke yithi ambi ibabana omwanze oyuli ‘Mukristayo kwenene,’ ni bugha ambu, oyuwabiriyihayo n’eribatizibwa, oyukaghendera okwa  biri omwa Masako. (1 Kor. 7:39) Eki ikikendi leka iniabya omwa butheke n’omundu oyuwanga muwathikya eribya iniane muthaleghulha oku Yehova.

13. Nyamuhanga mwahana Abaisraeli b’athiki okwa butheke?

¹³ Yehova anasi ekitholere abaghombe biwe. Kandi eritsuka kera, abiribya inianemubabwira amalengekania wiwe okwa butheke. Erilhabira omu Musa, mwaha Abaisraeli b’ekihano ekilhangirikire ndeke, akabathanga erimathikana n’ab’ebindi bihanda abathabya bakaramya Yehova athi: “Simusyesimolhanaya nabu; Na mwali wawu siwusyemuha mughalha wiwe, kutse mwali wiwe, siwumuherukiraye mughalha wawu. Kusangwa asyabindulha mughalha wawu, iniathanyikwama, ibakolera esindi nyamuhanga; neryo erihithana ly’Omwami Mukulhu iryabaghulhumirako, kandi iniabathoghothya lhuba.”—Ebi. 7:3, 4.

14, 15. Erigheghena ekihano kya Yehova mulyakolya Solomona y’okuki?

¹⁴ Solomana, mughalha wa Dawudi, abere akatsuka erithabalha, mwasaba erihebwa Amenge. Na Nyamuhanga mwamuhagho omwa buswire. Neryo Omwami Solomona mwaminywa kutsibu ng’omuthabali w’amenge manene. N’omwami-kali we Seba abere abungira Solomona, mwakangania erithika liwe, athi: “Mund’ikirirya ebinywe inde nasa n’erilhangirabyo omo meso waghe. Neryo lebaya mondabwirwa n’embindi; amenge wawu n’erikamaha lyawu birengire engulhu nowa.” (1 Bam. 10:7) Aliwe erighunzerera, ekyabya oku Solomona mukyakangania akabi akali omw’ithendi ghendera okwa kihano kya Yehova eky’erithendi ingira omwa butheke n’oyuth’ikirirye.—Omu. 4:13.

¹⁵ Nyamuhanga nomw’anamukolera bindu bingyi, Solomona mwathaghendera okwa kihano kya Yehova eky’erithendi thahya abakali b’ebindi bihanda abathabya bakaramya Yehova. Solomona “mwanza abakali bangyi b’ehandi,” erihika okw’ibya n’abakali 700 n’abaraghane 300. Mumwalhwiririraki? Solomona abere abirikulha, abakali biwe abo “mubabindulha omuthima wiwe erikwama esindi nyamuhanga;  . . na Solomona mwakolha ekibi omo meso w’Omwami Mukulhu.” (1 Bam. 11:1-6) Abakali abo Solomona athwamu erithahya mubaleka iniabya ng’oyuthawithe menge n’erileka iniasighania eriramya ly’okwenene. Eri ka n’isomo okwa Bakristayo abanga lengekania okw’ingira omwa butheke n’omundu oyuthanzire Yehova!

16. Abali omwa butheke n’oyuthe Mwema wa Yehova, e Biblia yikabahabulha yithiki?

¹⁶ Kandi ibbwa wamabya iwigha ekwenene iwabir’ingira omwa butheke? E Biblia yithi: “Inywe bakali mwowe abiba nywe, neryo abathyowa ekinywe kya Nyamuhanga bathoke erisingwa n’erikirirya busana n’emighendere y’abakali babu.” (1 Pet. 3:1) Ebinywe ebi bikakanaya okwa bakali, aliwe bikahamba n’okwa mulhume oyuwangasa omwa kwenene inianathahirye. Omwa bikuhi, e Biblia yikahabulha yithi: Wubye mubuya embere sy’omwanze wawu n’erighendera okwa bya Nyamuhanga akabugha okwa butheke. Abangyi babiriligha ekwenene bakalhangira bira babu kutse bakali babu bakahindulha emibere yabu busana n’eritsuka erighendera okwa bihano bya Nyamuhanga.

17, 18. Ni kyahi ekyaleka Noa n’Abakristayo b’omwa kighonye ky’erimbere ibalhamibwa?

¹⁷ Ni kwenene amanywani mabi akatsandaya omuthima mubuya, aliwe awuwene akalhwiririra mw’ebibuya. Noa ni ky’erileberyako ekyuwene. Nomwanabya omwa kihugho ekitsandire, mwathanywana abandu bamu. Okwa buthuku obo, “Omwami Mukulhu mwalhangira obubi bw’abandu  ibwamabya bungyi omo kihugho kandi obuli bulengekania bw’erighanirya ly’omuthima wabu bwabya bubi busa-busa emighulhu yosi.” (Gen. 6:5) Neryo Nyamuhanga mwathwamu erithoghothya ekihugho kibi ekyo omwa maghetse. Aliriryo, “Noa abya muthunganene. Iniahikene omo syondengo siwe. Noa abya akalendera haghuma na Nyamuhanga.”—Enz. 6:7-9.

¹⁸ Ahathe erithika-thika, Noa mwathanywana abandu abathekenga Nyamuhanga. Iyo n’abandi musanju ababya omw’eka yiwe mubayihwerya omw’ikolha omubiiri wa Nyamuhanga, imwamuli n’erihimba obwathu. Eryongera okw’ebyo, Noa abya “muthuli w’erithunganene.” (2 Pet. 2:5) Omubiiri wa Noa ow’erithulira, erihimba obwathu, n’eribya bughuma n’ab’eka yiwe basa abanzire Yehova mukyamuthokesya eribya inianemukolha ebikatsemesaya Nyamuhanga. Eki mukyaleka Noa n’eka yiwe ibalhama okw’Ighunga ly’Amaghetse. Thutholere ithwabasima, kundi ithwe bosi munabwire thulhuire omu Noa, mukali wiwe, baghalha biwe, na bakali babu—abandu abakolera Yehova buthaleghulha. Kuthya, Abakristayo abathaleghulha ab’omwa kighonye ky’erimbere mubayihighulha okwa bandu abathe kenga ebihano bya Nyamuhanga neryo kyamaleka ibalhama omughulhu e Yerusalemu yathoghothibwa omo mwaka wa 70 E.K.—Lk. 21:20-22.

19. Thutholere ithwakolhaki thwamanza erisimwa na Nyamuhanga?

¹⁹ Ithwe baramya ba Yehova, thutholere ithwagherererya Noa n’ab’eka yiwe, n’Abakristayo abatheleghulha ab’omwa kighonye ky’erimbere. Thutholere ithwayihighulha okwa mibere mibi eyithuthimbireko n’erisondya abanywani omwa balikyethu bangyi abangana thuhimba. Erilholha embere ithunanywene abakasondolhawa n’amenge wa Nyamuhanga ikikendi thuwathikya eribya “ithunasikire omw’ikirirya” omwa mughulhu owakalire ono. (1 Kor. 16:13; Emi. 13:20) Kandi thalengekania okwa mighisa eyathulindirire! Nethu thwamalebya ndeke aba thwanganywana omwa biro by’enyuma-nyuma bino, ithwangana lhama okw’ithoghothibwa ly’omughulhu mubi ono n’eringira omwa kihugho ekyuwene ekyo Yehova abirithulhagha.