Abema ba Yehova b’ikirirye ngoku “Amasako wosi Nyamuhanga yuwathegthekanayagho” kandi ngoku “ali n’endundi.” (2 Timoteo 3:16) Thukakolesaya e Biblia erithusondolha erigha okwa Muhangiki n’erithuwathikya eribya omwa ngebe eyuwene.

E Biblia yikabugha yithi: “Neryo abandu baminye bathi iwe, erina lyawu ni Yehova, n’iwe musa wuli Endatha Kutsibu okwa kihugho kyosi.” (Esyonyimbo 83:18, NW) Busana n’ekyo, thukaramaya Nyamuhanga Yehova musa, n’erilhangira thuthi ithwe ng’Abema biwe thukabwira abandu abosi okwa lina liwe.—Isaya 43:10-12.

Kundi thuli Bakristayo, thw’ikirirye ngoku Yesu, “Mughalha wa Nyamuhanga,” * mwasa okwa kihugho neryo amabya Masiya. (Yoane 1:34, 41; 4:25, 26) Yesu abere abiriholha, mwalhubuka amaya elhubulha. (1 Abanya Korinto 15:3, 4) Neryo enyuma waho amabya Mwami w’Obwami bwa Nyamuhanga. (Eribisulirwa 11:15) Obwami obo ni gavumente eyikendisyaletha Eparadiso okwa kihugho. (Danieli 2:44) E Biblia yikabugha yithi, “Abakayikehaya basy’ikalha ndeke omwa kihugho basyayitsemera omwa buholho bunene.”—Esyonyimbo 37:11, 29.

Abema ba Yehova b’ikirirye ngoku ebya Biblia yikakangiriraya bikaghasira abandu na munabwire. (Isaya 48:17, 18) Neryo busana n’ekyo, ebya yikakangiriraya bya thukaghenderako. Ng’eky’erileberyako, kundi e Biblia yikathuthanga eriyitsandya omwa mubiri, sithulinywa ethaba n’erikolesya nabi ebikathamiraya. (2 Abanya Korinto 7:1) Thukayihighulha n’okwa mitse eyikathangawa omwa Biblia, ng’erithamira, eby’obutswatswa, n’obwibi.—1 Abanya Korinto 6:9-11.