1, 2. Omwa binywe by’omukwenda Yoane, Nyamuhanga abirithukangania athi ngoku thwanga mwanza?

KYASIBWE ndeke-ndeke ngoku enzira eyuwene eyo thatha anga kolesya erikangirirya abaana ly’eribya ky’erileberyako. Omukwenda Yoane mwahandika athi “thukanza kusangwa Nyamuhanga mwatsuka erithwanza.” (1 Yn. 4:19) Neryo kundi Yehova mwatsuka erithukangania ngoku thwanganza, nethu kikaleka ithwamwanza.

² Nyamuhanga “mwatsuka erithwanza” omu nziraki? Omukwenda Paulo mwabugha athi: “Nyamuhanga akakanganaya olhwanzo lhwiwe busana nethu, kusangwa omughulhu thwabya ithukine bakolha nabi, Kristo mwathuholera.” (Abar. 5:8) Yehova erikolha ekindu kingaha n’eki, eky’erihayo Mughalha wiwe-wiwe, ng’embanulho oko b’ikirirye—Yehova mwabya iniamathweghesya olhwanzo ngoku lhutholere ilhwakanganibwa. Lhukakanganibawa omw’ihithya, n’omw’iyihayo ahathe eriyikukumirira. Ekindu ky’olhwanzo lhunene ekya Nyamuhanga akolha eki kyabirileka ikyathokekana ithwe erimwasako n’erighasirwa omwa lhwanzo lhwiwe n’erimwanza.—1 Yn. 4:10.

3, 4. Thwanga kangania thuthi olhwanzo olhwa thuwithire Nyamuhanga?

³ Olhwanzo wa mubere mukulhu wa Yehova, kwesi ky’ekyaleka  Yesu iniasubirya oyuwamubulhaya ekihano ky’erimbere nga ky’ekyahi athi: “Wanze Omukama Nyamuhanga wawu n’omuthima wawu wosi, n’ekirimu kyawu, n’obulengekania bwawu bwosi, n’amaaka wawu wosi.” (Mk. 12:30) Ebinywe bya Yesu ebi bikakanganaya ngoku olhwanzo olhwa Nyamuhanga akatsemera lh’olhukalhua okwa muthima. Eryanza Yehova y’eyighulhu-ghulhu sikirimutsemesaya. Aliwe kandi thukalhangira ngoku thutholere ithwanza Nyamuhanga n’ekirimu kyethu kyosi, obulengekania n’amaaka wethu wosi. Eki kikanganaya ngoku eryanza Nyamuhanga sibugha omwa buno buyira. Thutholere ithwamwanza erilhua okwa muthima, n’akaghalha kethu kosi. Omuminyereri Mika akakanganaya ngoku ekyo kya Yehova akathuyithaghako.—Soma Mika 6:8.

⁴ Thwanga kangania thuthi kwenene ku thwanzire Thatha wethu w’elhubulha? Thutholere ithwamwanza ahathe eriyikukumirira. Ngoku Yesu anakanganaya, thutholere ithwamwanza n’amaaka wethu wosi aw’engebe, imwamuli n’amaaka aw’eriyitheghererya eby’obunyakirimu. Omwa mwatsi owahwa, muthwalebirye esyonzira ini esya Yehova akanganirayamu abaana biwe olhwanzo lhunene. Hathya thulebaye ngoku thwanga ghumya n’erikangania Yehova y’olhwanzo omwa mibere eyitholere, ey’akaligha.

5. Eky’erikolha ni kyahi erikangania ngoku thukasima ebya Yehova abirithukolera?

⁵ Wukabya wamahebwa ekihembo, wukakolhaki? Wukalhangira wuthi wukakanganaya erisima. Eryongera okw’ekyo, wukalhangira wuthi wukakikolesaya ndeke, isiwendi kighalhaghandya. Omukwenda Yakobo mwahandika athi, “Obuli lhusunzo lhubuya n’obuli lhusunzo lhuwene bikalhua oku Thatha, kandi bikasira oku Thatha w’ekyakakalha kyosi, oyuthebinduka kutse eriyihindulha.” (Yak. 1:17) Yehova akathuha ebya thukayithagha ebikaleka ithwabya ithuneho kandi ithunatsemire. Ekyo kikaleka nethu ithwamwanza.

6. Abaisraeli eritsumulhwa na Yehova, ni kyahi ekya babya batholere eribya ibanemukolha?

⁶ Abaisraeli mubaghunza myaka mingyi ibane omwa butheya bwa Yehova, mwabatsumulha kutsibu omwa by’ekinyamubiri na bunyakirimu. (Ebi. 4:7, 8) Aliwe erilholha embere ibanemutsumulhwa bathya, babya batholere ibalholha embere eritheya ebihano bya Nyamuhanga, eki imwamuli eribya ibanemuhayo mughulhu wosi ebyuwene by’okwa ‘bighuma ebikatsuka ery’era’ omo malima awabu. (Eri. 23:19) Erikolha ekyo, bangakanganirye ngoku bakasima olhwanzo lhwa Yehova n’emighisa yiwe.—Soma Eryibuka Ebihano 8:7-11.

7. Thwanga kolesya thuthi ebya thuwitheko erikangania ku thwanzire Yehova?

⁷ Kandi ibbwa ithwe? Nomwakine indi ithwe munabwire sithukiyithagha eriha obuhere ng’obwa kera, thunawithe omughisa w’erikangania ku thwanzire Nyamuhanga ‘omwa busoki bwethu,’ n’ibugha ambu, omwa bya thuwitheko. (Emi. 3:9) Ekyo thwanga kikolha thuthi? Ithwangana kolesya ebya thuwitheko omw’isighika omubiiri w’Obwami. Mbulha thuwithe bike kutse bingyi, eyi ni nzira mbuya ey’erikanganiryamu ku thwanzire Yehova. (2 Kor. 8:12) Aliwe hane esindi nzira nyingyi esyathwanga kanganiryamu ku thwanzire Yehova.

8, 9. Eriyikethera emilhaghe ya Yehova lihambene lithi n’erimwanza? Iha eky’erileberyako.

⁸ Wibuke ekya Yesu abwira abigha biwe athi sibahanga-hangaye nga bakendiryaki, kutse nga bakendyambalhaki, aliwe athi batsuke erisondya Obwami. Mwabugha athi Thatha wethu anasi ebya thukayithagha. (Mt. 6:31-33) Emibere thukakanganirayamu  ku thuyikethere omulhaghe oyo, iyikendi kangania nga thwanzire Yehova ya bungahi, kundi olhwanzo n’eriyikethera bikaghenda haghuma. Siwanga bugha wuthi wanzire omundu oyo wuthayikethere. (Esy. 143:8) Neryo ithwangana yibulya: ‘Engebe yaghe n’ebilhubirirwa byaghe omwa ngebe bikana kanganaya ngoku nganzire Yehova? Ebya ngakolha buli kiro bikana kanganaya ngoku ngayikethere indi Yehova anawithe obuthoki bw’erinyihererya ebya ngayithagha?’

⁹ Omukristayo oyukahulhawa mwa Mike mwakangania olhwanzo n’eriyikethera ng’eryo. Mike iniakine mulere, mwanza kutsibu erikolera Nyamuhanga omwa bindi bihugho. Mwathahya, amabutha abaana babiri, aliwe mwath’ibirirwa ekilhubirirwa kiwe. Ebingyi ebya Mike n’eka yiwe babya bakasoma ebihambire okw’ikolera eyiri obuyithawa bunene, mubyabahira mw’omuhwa, neryo bam’olhobya engebe yabu. Mubaghulya enyumba yabu neryo bamapangisya enyumba nyike. Mike aby’awithe omubiiri w’erisugha amanyumba. Mwakehya okwa by’abya akakolha omwa mubiiri oyo n’erigha ngoku ang’imanira omubiiri oyo iniane omwa kindi kihugho omw’ikolesya e Intaneti. Babere baghunza emyaka ibiri ibanemukolera omwa kindi kihugho, Mike mwabugha athi: “Muthwayilhangirira ekwenene y’ebinywe bya Yesu ebiri omu Matayo 6:33.”

10. Ngoku kyabya oku Dawudi, erighanirya okwa kwenene eyihambire oku Yehova lyanga lhwiririra mwaki?

¹⁰ Myaka nga 3,000 enyuma, Omwami Dawudi mwatsemera eby’alhangira omwa kyanya. Mwahandika athi: “Olhubulha lhukakanaya olhukengerwa lhwa Nyamuhanga, n’ekyanya kikabisulha ndeke eby’abirikolha.” Kandi abere atsemera amenge awali omwa bihano bya Nyamuhanga, mwabugha athi: “Emighambo y’Omwami Mukulhu yihikene, yikasubaya omuthima; Erithulhagho ly’Omwami Mukulhu ni kwenene, likaha amenge oko yukabulhagho.” Erighanirya eriri mw’erisima eri mulyalhwiririra mwaki? Dawudi mwathasyabugha athi: “Ebinywe byaghe n’amalengekania w’omuthima waghe birighawe omwa meso wawu, Iwe Mwami Mukulhu, Omuhanganiri n’Omuthongolya waghe!” Eki kikalhua ikyakangania ngoku muhabya obunywani ahakathi-kathi ka Dawudi na Nyamuhanga wiwe.—Esy. 19:1, 7, 14.

11. Olhwanzo olhwa thuwithire Nyamuhanga lhutholere ilhwaleka ithwakolhaki busana n’ebingyi ebya thwabiriminya omwa Masako? (Lebaya ekisasani ekiri okw’itsuka.)

¹¹ Munabwire, thwabiriminya bingyi okwa bihangikwa bya Yehova n’eribererera ly’ekighendererwa kiwe. Ekihugho kikahira omwa bandu mw’omuhwa w’erisoma kali-kali. Kandi ibbwa eki kyabirileka erikirirya ly’abangyi n’olhwanzo lhwabu oku Yehova ibyahwa. Aliwe Yehova iyo syalisubulira okw’ithuwathikaya eriminya emyatsi, akathasya thuwathikaya n’eribya b’amenge. Akanza ebya thuk’igha ibyathughasira kandi ithwawathikya n’abandi. (Emi. 4:5-7) Nyamuhanga anzire “abandu bosi balhamibawe n’eriminya ndeke omwatsi w’ekwenene.” (1 Tim. 2:4) Thukakanganaya ngoku thwanzire Yehova thukayihwerya omwa mubiiri w’erithulha engulhu yuwene y’Obwami n’eriwathikya abandu eriminya ebya Nyamuhanga abatheghekere.—Soma Esyonyimbo 66:16, 17.

12. Omunyethu mughuma mwakangania athi erisima liwe okwa bya Yehova akathuha?

¹² N’abalere bangana kangania ku banzire Yehova omw’itsemera eby’obunyakirimu eby’akathuha. Shannon akabugha athi omughulhu abya awithe emyaka 11, iyo na mwali wabu w’emyaka 10 mubaghenda n’ababuthi  babu okwa lhuhindano lhwe Disitrikiti olhwabya n’omuthwe, “Godly Devotion.” Okwa lhuhindano, endambi muyahika bamabwira abalere bathi b’ikale omwa mwanya mulebe ibobene. Mwabya ng’amasagha, aliwe mwayayo. Mwatsema kutsibu akalhangira obuli munyethu akahebwa ekihembo eky’ekitabu Questions Young People Ask—Answers That Work. Eki mukyaleka Shannon iniayowa athi oku Yehova? Akabugha athi: “Ekyo ky’ekiro naminya ngoku Yehova kwenene aneho kandi ngoku anyanzire kutsibu ingye ng’omundu.” Akathasyabugha athi: “Ka thutsemire kutsibu eribya Nyamuhanga wethu Yehova iniangana thuha ebihembo ebyuwene kutsibu ng’ebi!”

13, 14. Ngoku thukathwalha erihabulha lya Yehova kikahamba kithi okwa lhwanzo olhwa thumuwithire?

¹³ E Biblia yikathw’ibukaya yithi, ‘Oyo Yehova anzire akamukunga, ngoku ise akakunga mughalha oyo akatsemera.’ (Emi. 3:12) Aliwe, erikunga eryo thutholere ithwalithwalha thuthi? Omukwenda Paulo mwabugha okwenene akahandika athi: “Erikunga lyosi riri nga bulighe oko kathambi kake, butsira butseme.” Paulo eribugha athya, sy’abugha athi erikunga ni ribi, kundi mwathasyabugha athi: “Nikwa enyuma likaletha emibiiri y’obuholho n’erithunganene omwa mithima yabu, okw’abo ababirikangiriribwa mulyo.” (Ebr. 12:11) Thwamabya ithunanzire Yehova, sithutholere thukagheghena erikunga liwe kutse thukahithana akathukunga. Abandi kikana bakalira. Aliwe eryanza Nyamuhanga likawathikaya.

¹⁴ Omwa buthuku bwa Malaki, Abayuda bangyi ibakapona erikunga lya Yehova. Mubakighenderera erithwa omughambo wa Yehova owahambire okwa buhere. Yehova mwabakunga kutsibu busana n’ekyo. (Soma Malaki 1:12, 13.) Mukyahithania Yehova ya bungahi? Thahulikirira eby’ababwira: “Nasyabathumira erithakira, kandi nasyathakira emighisa yenyu. Kandi kwenene nabirithakirayo kusangwa simuthabikayo [emighamabo yaghe] omwa muthima.” (Mal. 2:1, 2) Eki kikanganaya ngoku eribya n’omutse w’erigheghena kutse erithwa ebihano bya Yehova omw’ikighenderera ni kindu ky’akabi kutsibu.

15. Ni mubereki owali omwa kihugho owa thutholere ithwayitheyako?

¹⁵ Omwa kihugho munabwire muli eriyitsomana, n’abandu erithendyanza erihabulhwa kutse eribwirwa eky’erikolha. Nibya n’abakabya nga bamaligha erihabulhwa, kikabya isikirilhua okwa muthima. Nomwakine, Abakristayo bakahabulhawa indi ‘isibasosekanibawa n’emyatsi y’ekihugho kino.’ Thutholere ithwaminya n’erikwamana ‘erisonda lya Nyamuhanga erihikene.’ (Abar. 12:2) Yehova akathukunga okwa ndambi eyitholere erilhabira omwa kithunga kiwe okwa myatsi mingyi omwa ngebe yethu—ngoku thwanga kolangana n’ab’olhubutho olhuthe  ng’olhwethu, eby’abanywani, n’okwa by’eriyitsemesya. Thwamaligha n’erighendera okwa busondoli ng’obu, thukabya ithwamakangania erisima kandi ngoku thwanzire Yehova erilhua okwa muthima.—Yn. 14:31; Abar. 6:17.

16, 17. (a) Busana naki thutholere ithwatsuka erilengekania okw’isonda lya Yehova thuthe thwa thwamu? (b) Abaisraeli mubakangania bathi ngoku bathayikethere Yehova n’erimwanza?

¹⁶ Omwana akabya amalhangira akabi, eky’amalengekania akamubwira ly’erithibitha eyiri ababuthi biwe. Aliwe akabya anemughenda akakulha, akatsuka eriyithwiramu n’erighendera okwa malengekania wiwe. Aho akabya iniali mukulha. Aliwe omwana oyuwithe obunywani n’ababuthi biwe, nomwanga kulha, akabya inianemusaba ababuthi biwe b’obusondoli akanza erithwamu okwa mwatsi mulebe. Kwabine bithya oku Yehova n’abandu biwe. Yehova abirithuha omulimu wiwe, ow’akaleka “ithwaligha n’erikolha ebikamutsemesaya.” Thwamathwamu okwa kindu kirebe isithuthatsuka erilengekania okw’isonda liwe, ithukendibya ithwamakangania ngoku sithumuyikethere n’erimwanza.—Fil. 2:13.

¹⁷ Omwa buthuku bwa Samweli, Abaisraeli mubasingwa kutsibu omwa lhuhe lhw’Abafilisitini. Abandu ba Nyamuhanga babya omwa kabi, mubayithagha obutheya n’obuwathikya. Mubathwamu erikolhaki? Mubathwamu bathi, “Thuyende erisanduku ly’erilhaghana ly’Omwami Mukulhu e Silo, iryahika omo kathi-kathi kethu, n’erithulhamya omo byalha by’esyonzighu syethu.” Ni kyahi ekyalhwiririramu? “Muhabya erikwa inene; kusangwa oko Baisraeli, muhawa abandu 30,000 abakaghenda omo bisandu. N’erisanduku lya Nyamuhanga mulyanyeghwa.” (1 Sam. 4:2-4, 10, 11) Abaisraeli erighenda n’erisanduku kwenene babya ng’abakasonda obuwathikya bwa Yehova. Aliwe omwa kwenene, mubathasaba Yehova y’obusondoli; mubakwama amalengekania wabu, erighunzerera bamawa omwa kabi.—Soma Emisyo 14:12.

18. Eky’erisaba Yehova y’obusondoli, thutholere ithwakilhangira thuthi?

¹⁸ Omuhandiki w’esyonyimbo mwakangania ngoku abya anzire Yehova akahandika athi: ‘Ngendihira oku Nyamuhanga kw’amaha, kandi ngendi mupipa, Iyo Omulhamya waghe. Iwe Nyamuhanga waghe, omuthima waghe akalhua omonda. Kikaleka inakw’ibuka.” (Esy. 42:5, 6) Kwenene k’abya anzire Nyamuhanga ya kutsibu! Nawu wunanzire n’eriyikethera Yehova ya wuthya? Obundi iwanganabugha wuthi ee, aliwe ibbwa wutholere iwongera erimuyikethera kutsibu. Kundi e Biblia yithi: “Wikiriraye Omwami Mukulhu n’omuthima wawu wosi. Siwuyeghemeraye obuminya bwawu. Omwa syonzira syawu syosi wumwahule, nayu asyathunganania esyonzira syawu.”—Emi. 3:5, 6.

19. Wanzire iwakangania Yehova y’olhwanzo omu nzira nga syahi?

¹⁹ Omw’itsuka erithwanza, Yehova abirithukangirirya ngoku thwanga mwanza. Ambi mughulhu wosi ithwabya ithun’ibukire eky’erileberyako kiwe ky’olhwanzo eki. Kandi thwongere erikangania ngoku thumwanzire ‘n’omuthima wethu wosi n’ekirimu kyethu kyosi, n’obulengekania bwethu bwosi, n’amaka wethu wosi.’—Mk. 12:30.