Thuli kithunga ekiri omwa kihugho kyosi. Sithuli muthahulha w’okwa dini yosi-yosi. Nomwakine indi ekyaghanda kyethu kikulhu kiri e Amerika, Abema ba Yehova bangyi ban’ikere omwa bihugho muthina-muthina. Thuli bandu nga miliyoni munani abanemukangirirya abandu be Biblia omwa bihugho ebilhabire omu 230. Thukaghendera okwa bya Yesu abugha athi: “Engulhu yuwene y’Obwami eyi yasyatsuka erithulhughanibwa omwa kihugho kyosi busana n’eriminyisya ebihanda byosi.”—Matayo 24:14.

Ithwe bosi aha thun’ikya, thukalhangira thuthi thukatheghaya ebilhayiro bye gavumente. Aliwe sithuliyingiraya omwa by’ekipolitiki. Eki ni busana n’erighendera okw’ihabulha erya Yesu aha Abakristayo ery’erithendibya b’ekihugho. Neryo busana n’ekyo sithuliy’ingiraya omwa myatsi y’ekipolitiki kutse erisighika eby’esyonyuhi. (Yoane 15:19; 17:16) Ng’omwa lhuhi olhw’ekihugho kyosi olhwakabiri, Abema ba Yehova mubabohwa, bamakolhwa nabi, n’abandi bam’ithibwa busana n’erighana erisighika eby’olhuhi. Oyuwabya bbisyopu omwa German mwahandika okwa Bema ba Yehova athi: “N’ibo basa abangabugha bathi mubathasighika eby’esyonyuhi omwa buthabali bwa Hitler.”

Ekyo sikirimanyisaya kithi thukayihighulha okwa bandi. Yesu mwasabira abigha biwe oku Nyamuhanga athi: ‘Sindikusaba nyithi wulhusayebo omwa kihugho.’ (Yoane 17:15) Neryo wangana thulhangira ithunemukolha n’abandi bandu, ithune omwa hithali, n’erighenda okwa masukuru.