Obuli mwaka thukahulhukaya n’erighaba esyomiliyoni n’esyomiliyoni sy’esyo Biblia n’ebitabu ebiseghemere okwa Biblia. Erithimba omwa kihugho kyosi, thukahimba esyofisi n’amakolero w’ebitabu byethu. Thukahimba emyanya y’eriramiryamo eyuwene eyikahulhawa mwa Bisenge by’Obwami omo esyongumi n’esyongumi sy’Abema ba Yehova bakahindanira. Esyosente esyosi esi sikalhuahi?

Omubiiri wethu akasighikawa omwa bya bandu bakahayo ahathe erikakwa. (2 Abanya Korinto 9:7) Omwa 1879, egazeti eyiri eno, eyabya yakabiri erihulhukibwa muyabugha yithi: “Thwasi ndeke-ndeke ngoku YEHOVA yukasighika e ‘Zion’s Watch Tower’ [egazeti eno ikuyik’ahulhwa yithya kera], kandi busana n’ekyo, siyendisya sabirirya kutse erisondya-sondya okwa bandu kw’obuwathikya.” Nahathya ebinywe ebyo bya thukinaghenderako.

Abakahayo banganathwamu erilebeka ebya bakahayo by’okwa ofisi yethu eyosi-yosi, kutse ibathogherya omwa kasanduku akakabya omwa buli Kisenge ky’Obwami. Sithulithuha endoboro, erilhabya mw’akibo, kutse erilihisya abathukakangiriraya kutse abathukaha ebitabu byethu. Sithuli hebawa musara busana n’erithulira, erikangirirya omwa kithunga, kutse erihimba okwa manyumba w’erihindaniramu. Nibya Yesu mwabugha athi: “Mwabiry’angirira butsira eririha, muhe abandi butsira eririhisya.” (Matayo 10:8) Abosi abakakolera okwa byaghanda byethu by’omuthahulha n’okwa kyaghanda kikulhu eky’ekihugho kyosi, imwamuli n’abali okwa Kathunga Akakasondolha ak’Abema ba Yehova sibalithunga musara.

Ebikahebawayo kandi bikakolesibawa omw’iwathikya abakawa kw’ebitsinduli. Abakristayo b’erimbere ibakatsemera eriwathikya abakayithagha obuwathikya. (Abanya Roma 15:26) Nethu thukawathikaya abawire kw’ebitsinduli omw’ibahimbira amanyumba wabu, Ebisenge byabu by’Obwami, eribaha ebyalya, esyongyimba n’omubatsi.